អ៊ីរ៉ង់

Reuters ៖ អ៊ីរ៉ង់ បង្ក្រាប​បាតុករ​ ស្លាប់​អស់​ជាង​១៥០០នាក់​

យុទ្ធមិត្ត​និងគ្រូសារ​ជន​រងគ្រោះ លើ​ស្លាក​និង​រូបថត​មរណជន ដែល​ស្លាប់​ក្នុង​បាតុកម្ម​នៅ​អ៊ីរ៉ង។
យុទ្ធមិត្ត​និងគ្រូសារ​ជន​រងគ្រោះ លើ​ស្លាក​និង​រូបថត​មរណជន ដែល​ស្លាប់​ក្នុង​បាតុកម្ម​នៅ​អ៊ីរ៉ង។ Reuters

ថ្ងៃ​អង្គារ ទី​២៤ធ្នូ​ អាជ្ញាធរ​អ៊ីរ៉ង់នៅតែ​បាន​បន្ត​ចាប់​ខ្លួន​ក្រុម​គ្រួសារ​របស់​បាតុករ។ បាតុករ​​ប្រុស​ម្នាក់ដែលត្រូវ​រដ្ឋអំណាច​អ៊ីរ៉ង់​បាញ់​សម្លាប់ ហើយ​ពេ​លនេះ គ្រួសាររបស់​​គេ​ក៏ត្រូវ​ប៉ូលីស​អ៊ីរង់​ចាប់ខ្លួន​ថែមទៀត។ គួរ​ជ្រាបថា បាតុករ​អ៊ីរ៉ង់​រាប់​រយ​ពាន់​នាក់ បាន​ងើប​បះបោល​ ប្រឆាំង​នឹង​រដ្ឋាភិបាល​អ៊ីរ៉ង់​ដែល​ដំឡើង​តម្លៃប្រេងសាំង​ ហើយ​កំហឹងពលរដ្ឋ​ឈាន​ដល់​ទាមទារ​ឱ្យ​ផ្លាស់ប្តូរ​រដ្ឋា​ភិបាល​ទៀតផង កាលពី​ពាក់កណ្តាល​ខែ​វិច្ឆិកា​កន្លងទៅនេះ។​ ទីភ្នាក់​​កាសែត​​ Reuters បាន​បញ្ជាក់នៅ​ដើម​សប្តាហ៍ ថានៅក្នុង​បាតុកម្ម​នេះ​  រដ្ឋអំណាច​អ៊ីរ៉ង់ បាន​បង្ក្រាប​បាតុករ​​​​​​ ស្លាប់​អស់​ជាង​១​៥០០នាក់​។

ផ្សាយពាណិជ្ជកម្ម

ទីភ្នាក់កាសែត Reuters រាប់​ឃើញសកសព​​ក្រុម​បាតុករបាត់បង់​ជីវិត មាន​ចំនួន​ជាង១៥០០នាក់ គឺ​តាម​រយៈ​ចុះ​សម្ភាស​ជាមួយ​ថ្នាក់ដឹកនាំ​ជាន់​ខ្ពស់​នៃរដ្ឋអំណាចអ៊ីរ៉ង់​, ទៅ​តាមដាន​រាប់​នៅ​ស្នង​ការប៉ូលីស, នៅកន្លែង​កើត​ហេតុ, រាប់​នៅ​កន្លែង​តម្កល់សព​ និង​នៅតាម​បណ្តា​មន្ទីរពេទ្យ​នានា​​។ ក្នុង​ចំណោម​មរណជន​ទាំង​នោះ​ គឺមានមនុស្ស​ស្រី ជាង​៤០០នាក់, ក្មេងៗជំទង់ យ៉ាងហោច ​១៧នាក់ ហើយ ​ អ្ន​កស្លាប់ ក៏​មានដែរ កងកម្លាំង​សមត្ថកិច្ច​។

ទីភ្នាក់កាសែត Reuters របស់អង់គ្លេស ផ្សាយ​​ចំនួន​អ្នក​ស្លាប់​សម្រាប់ជា​​តុល្យការ​បឋម​នេះ គឺដោយស្រង់​ប្រសាសន៍​បញ្ជាក់​ និង​ផ្ទៀង​ផ្ទាត់​ជាមួយ​មន្ត្រី​​ទទួល​ខុស​ត្រូវ​ជាន់​ខ្ពស់​ ចំនួន​បីនាក់ ធ្វើ​ការ​នៅ​ក្រសួង​មហាផ្ទៃ​អ៊ីរ៉ង់។

ក៏ប៉ុន្តេ ចំនួន​ទិន្នន័យ​នេះ​ គឺត្រូវ​ច្រាន​ចោល​ដោយ​រដ្ឋ​អំណាច​អ៊ីរ៉ង់។ តាម​ការ​ចុះផ្សាយ​របស់​កាសែត​ក្នុង​ស្រុក, អ្នកនាំពាក្យ​របស់​ក្រុមប្រឹក្សា​​ជាន់​ខ្ពស់​ទទួល​បន្ទុក​សន្តិសុខ​ជាតិអ៊ីរ៉ង បាន​បដិសេធ​ថាតុល្យការ​ចំនួន​អ្ន​កស្លាប់​របស់​ទីភ្នាក់​ងារ​កាសែត​បរទេស​នេះ គឺ​មិន​ពិត​ទេ ជា​ព័ត៌មាន​ក្លែង​ក្លាយ ​ហើយ​និង​​ចាត់​ទុក​ថា នេះជារឿង​ដែល​គួរ​ឱ្យ​អស់​សំណើច​ ទៀត​ផង។

ទោះ​ជាយ៉ាងនេះក៏ដោយ តាម​ប្រភព​របស់​ទីភ្នាក់កាសែត Reuters គឺ​មាន​អ្នក​បញ្ជាក់ ថា«​ប្រមុខ​ថ្នាក់​ដឹកនាំ​កំពូល​នៃ​សាសនា​អ៊ីស្លាមអ៊ីរ៉ង់ អាលី ខាមេណី បាន​ចេញ​បញ្ជា​ដាច់ខាត ​​ឱ្យ​កម្ទេច​ហ្វូង​ក្រុម​បាតុករ ដែល​លោកអាញ៉ាតុឡា អាលី ខាមេណី យល់ថា ជាក្រុម​​កុប្បករ និង​ថា រដ្ឋ​អ៊ីរ៉ង់ កំពុងតែ​ត្រូវ​រងគ្រោះភ័យ​ដោយ​ពួកបាតុករនេះ។ ដូច្នេះ ត្រូវតែ​ធ្វើ​អ្វីៗគ្រប់​យ៉ាង​ ដើម្បី​បញ្ចប់​ស​កម្មភាព​បាតុកម្ម​»។

គួររម្លឹកជូន​ថា កាលពីពាក់កណ្តាលខែវិច្ឆិកាកន្លងទៅនេះ បាតុករអ៊ីរ៉ង់ពេញផ្ទៃប្រទេស​ បានក្រោកឈរ​​ប្រឆាំងនឹងរដ្ឋាភិបាលដែលដំឡើងតម្លៃសាំង ហើយទាមទារឱ្យផ្លាស់ប្តូររដ្ឋាភិបាល។​ រដ្ឋាភិបាលដែលពួក​គេ​យល់ថា គ្រប់​គ្រងដោយ​ក្រុមពុករលួយ និង​ គ្មាន​សមត្ថភាព​៕​

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI