រុស្ស៊ី

នៅ​រុស្ស៊ី ប្រធានាធិបតី​មាន​អំណាច​ច្រើន​ជ្រុល

លោក​មេវេដេវ ប្រធានាធិបតី​រុស្ស៊ី
លោក​មេវេដេវ ប្រធានាធិបតី​រុស្ស៊ី ©Reuters

ដំណឹង​គួរឲ្យ​ភ្ញាក់ផ្អើល​នេះ ទើបបាន​ត្រូវ​ចុះផ្សាយ​ដោយ​កាសែត​ដ៏ធំ​នៃ មជ្ឈដ្ឋាន​ពាណិជ្ជកម្ម គឺ​កាសែត​ Kommersant យោងទៅលើ​មតិ​អ្នកប្រាជ្ញ​ខាង​ច្បាប់​ធម្មនុញ្ញ ដែល​ពន្យល់​បំភ្លឺ​ថា អំណាច​ច្រើនជ្រុល​បែបនេះ បាន​ត្រូវ​ប្រគល់​ទៅក្នុង​ដៃ​ប្រធានាធិបតី​ដោយ​សភា​ឌូម៉ា​ខ្លួនឯង តាមរយៈ​ច្បាប់​នានា​ ដែល​ពួក​អ្នកតំណាងរាស្ត្រ​ខ្លប​ត្រចៀក ខាង​បក្ស​កាន់អំណាច​រមែង​អនុម័ត។

ផ្សាយពាណិជ្ជកម្ម

សេចក្តីរាយការណ៍​របស់ កែវ ឆាយា ពីម៉ូស្គូ

តាមកាសែត Kommersant ក្នុង​២០ឆ្នាំ​កន្លងទៅ នៃ​ប្រវត្តិ​ថ្មី​របស់​រុស្ស៊ី តាំងពី​មាន​បង្កើត​ជា​មុខតំណែង​ប្រធានាធិបតី​មក ប្រមុខរដ្ឋ​រុស្ស៊ី​ទទួល​បាន​អំណាច​បន្ថែម ដល់ទៅ​ចំនួន​៤៦៩​អំណាច។ និយាយ​លម្អិត គឺថា ប្រធានាធិបតី​ទី១ លោក Yeltsin បាន​ទទួល​អំណាច​បន្ថែម​នេះ ចំនួន ១៦៨ លោក​ Poutine បាន​ចំនួន​ដល់​២៣៤ រីឯ​លោក Medvedev គិត​មកទល់​ចុង​ឆ្នាំ​២០១០​កន្លងទៅ បាន​ទទួល​អំណាច​បន្ថែម​ចំនួន​៦៧។ អំណាច​បន្ថែម​នេះ គឺ​អំណាច​ដែល​លើសពី​មានចែង​ក្នុង​រដ្ឋធម្មនុញ្ញ។

ទាក់ទងនឹង​រឿង​នេះ មេដឹកនាំ​បក្ស​កុម្មុយនិស្ត​ ដែល​ជា​បក្ស​ប្រឆាំង​ធំ​ជាងគេ​នៅ​រុស្ស៊ី មាន​៥៧​អាសនៈ​ប្រចាំ​នៅ​សភា​ឌូម៉ា ពោលគឺ លោក Guenadiy Ziouganov ​បាន​បញ្ចេញ​មតិ​ថា ប្រធានាធិបតី​រុស្ស៊ី​សព្វថ្ងៃ​មាន​អំណាច​ច្រើនជាង​អំណាច​ស្តេច​ Tsar រុស្ស៊ី បូក​ជាមួយ​អំណាច​អគ្គលេខា​មជ្ឈិមបក្ស​កុម្មុយនិស្ត​សូវៀត បូក​ជាមួយ​អំណាច​មេទ័ព​ម៉ុងហ្គោលី ឈ្មោះ Gengis Khan ដែល​ធ្លាប់​បាន​ច្បាំង​ដណ្តើមយក​ទឹកដី​ប្រទេស​ជាច្រើន​សម័យ​សតវត្ស​ទី១២-ទី១៣។

អ្នកប្រាជ្ញ​រុស្ស៊ី​ដ៏​ល្បីល្បាញ ខាង​ច្បាប់​ធម្មនុញ្ញ លោក Mikhail Krasnov កត់សំគាល់​ថា រដ្ឋធម្មនុញ្ញ​ចែង​អំពី​ការ​ទទួលខុសត្រូវ​របស់​ប្រធានាធិបតី តែ​ខាង​វិស័យ​សន្តិសុខ​ជាតិ, ខាង​នយោបាយ​ក្រៅ​ប្រទេស, ខាង​សម្របសម្រួល​ការងារ​នៃ​អង្គការ​រដ្ឋអំណាច និង​ខាង​ភាគមួយ​នៃ​នយោបាយ​ក្របខ័ណ្ឌ។

ប៉ុន្តែ សភា​ឌូម៉ា​វិញ តាមរយៈ​ច្បាប់​ប្លែកៗ អនុម័ត​ដោយ​ពួក​អ្នកតំណាងរាស្ត្រ ខាង​បក្ស​កាន់អំណាច មាន​អាសនៈ​ច្រើន​លើសលុប ដល់​ទៅ ៣១៥​ឯណោះ ពីក្នុង​ចំណោម ៤៥០​អាសនៈ អាងយ៉ាង​ក្នុង​សភា​តែម្តង គឺ​ប្រគល់​អំណាច​បន្ថែម​ទៅក្នុង​ដៃ​ប្រធានាធិបតី​ បែបយ៉ាង​ខាង​វិស័យ​សេដ្ឋកិច្ច វប្បធម៌ សិក្សាធិការ និង​ខាង​ចាត់ចែង​សកម្មភាព​អង្គការ​រដ្ឋអំណាច​ជាដើម។

ចំណែក​ប្រតិកម្ម​ពី​ខាង​តំណាង​ប្រធានាធិបតី​រុស្ស៊ី ដែល​ប្រចាំ​នៅ​សភា​ឌូម៉ា លោក​ Garry Minh ដែល​ជា​អ្នកច្បាប់​ដែរ គឺថា បើ​ស្របនឹង​ច្បាប់​នេះ ឬច្បាប់​នោះ អនុម័ត​ដោយ​សភា​ឌូម៉ា ស្រាប់តែ​មាន​អំណាច​ជាក់លាក់​ឆ្លងទៅ​ក្នុង​ដៃ​ប្រធានាធិបតី នោះ​គឺ​វា​មិនដែល​លយ​ចេញ​ពី​បរិវេណ​រដ្ឋធម្មនុញ្ញ​ឡើយ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI