រុស្ស៊ី

ការបោះឆ្នោត​ប្រធានាធិបតី​រុស្ស៊ី​នឹង​ប្រព្រឹត្ត​ទៅ​នៅ​ថ្ងៃទី​៤មីនា​ឆ្នាំ​២០១២

លោក​ពូទីន (ឆ្វេង) ដែល​នឹង​ឈរឈ្មោះ​ជា​បេក្ខជន​ប្រធានាធិបតី​ នៅឆ្នាំក្រោយ
លោក​ពូទីន (ឆ្វេង) ដែល​នឹង​ឈរឈ្មោះ​ជា​បេក្ខជន​ប្រធានាធិបតី​ នៅឆ្នាំក្រោយ REUTERS/Yekaterina Shtukina/RIA Novosti/Kremlin

កាលបរិច្ឆេទ​នេះ​ទើប​ចែង​ក្នុង​អនុក្រឹត្យ អនុម័ត​ព្រឹកមិញ ដោយ​ព្រឹទ្ធសភា​រុស្ស៊ី ក្នុង​សម័យ​ប្រជុំ​ពេញអង្គ។ ដ្បិត​ស្របនឹង​រដ្ឋធម្មនុញ ការ​កំណត់ពេល​ធ្វើ​ការ​បោះឆ្នោត​ប្រធានាធិបតី​នៅ​រុស្ស៊ី ជា​កាតព្វកិច្ច​របស់​សភា​ជាន់លើ ពោលគឺ ព្រឹទ្ធសភា។

ផ្សាយពាណិជ្ជកម្ម

សាច់រឿង​ដែល​មាន គឺថា អនុក្រឹត្យ​ស្តីអំពី​កាលបរិច្ឆេទ​បោះឆ្នោត​នោះ​ត្រូវ​ព្រឹទ្ធសភា​ចេញ​ខានមិនបាន ឲ្យបាន​ក្នុង​ចន្លោះពេល ពី៩០ ទៅ១០០ថ្ងៃ មុន​ដល់​ថ្ងៃ​បោះឆ្នោត​ផ្ទាល់។ ហើយ​ស្របនឹង “ច្បាប់​បោះឆ្នោត” ការ​បោះឆ្នោត​រើស​ប្រធានាធិបតី​នៅ​រុស្ស៊ី ត្រូវ​ប្រព្រឹត្តទៅ គឺ​នៅ​ថ្ងៃ​អាទិត្យ​ទី២ នៃ​ខែ ដែល​មាន​ធ្វើ​ការបោះឆ្នោត​លើកមុន។

ចំណែក​ការ​បោះឆ្នោត​រើស​ប្រធានាធិបតី​នៅ​រុស្ស៊ី កាលពី​៤ឆ្នាំ​មុន គឺ​ក្នុង​ខែមីនា​ឆ្នាំ២០០៨។ ដូច្នេះ ការ​បោះឆ្នោត​លើកនេះ តាមពិត គឺ​ត្រូវ​ប្រព្រឹត្តទៅ នៅ​ថ្ងៃអាទិត្យ ទី១១ មីនា ឆ្នាំ២០១២។ ប៉ុន្តែ ថ្ងៃអាទិត្យ ១១មីនា​ឆ្នាំក្រោយ ស្រាប់តែ​ប្រែទៅជា​ថ្ងៃ​ធ្វើការ​ទៅវិញ ដើម្បី​សង​ថ្ងៃសុក្រ ទី៩មីនា ដែល​ប្រែ​ទៅជា​ថ្ងៃ​ឈប់ ដើម្បី​ឲ្យ​ប្រជាពលរដ្ឋ​រុស្ស៊ី ឈប់​បាន​បីថ្ងៃ​ជាប់ ក្នុង​ឱកាស​បុណ្យ​នារី ទិវា​៨មីនា គឺ​ឈប់​ថ្ងៃ​ព្រហស្បតិ៍ ៨មីនា ថ្ងៃសុក្រ​៩មីនា និង​ថ្ងៃសោរ៍១០មីនា ជា​ថ្ងៃ​ឈប់​ស្រាប់។ ម្ល៉ោះហើយ បានជា​ថ្ងៃ​បោះឆ្នោត​ប្រធានាធិបតី​នៅ​រុស្ស៊ី ឆ្នាំក្រោយ ត្រូវ​ព្រឹទ្ធសភា​លើក​មក​ធ្វើ​ នៅ​ថ្ងៃអាទិត្យ​ទី៤​មីនា​វិញ។

តាមដែលគេ​រង់ចាំ រូបលោក​នាយករដ្ឋមន្ត្រី ពូទីន ជា “បុរស​ខ្លាំង” នៅ​រុស្ស៊ី ដែល​ធ្លាប់​ធ្វើ​ជា​ប្រធានាធិបតី​អស់​២អាណត្តិ​ទៅហើយ ពី​ឆ្នាំ២០០០​ដល់​២០០៨ ហើយ​ដែល​២ខែ​មុន ត្រូវ​បាន​លោក​ប្រធានាធិបតី​បច្ចុប្បន្ន មេដវេដេវ ស្នើឲ្យ​ឈរឈ្មោះ​ជាថ្មី ជា​បេក្ខជន​ប្រធានាធិបតី គឺ​នឹង​ត្រូវ​បក្ស​កាន់អំណាច​នៅ​រុស្ស៊ី ប្រកាស​ជា​ផ្លូវការ ជា​បេក្ខជន​របស់​បក្ស​នេះ ក្នុង​មហាសន្និបាត​ខ្លួន នៅ​ថ្ងៃអាទិត្យ ទី២៧​វិច្ឆិកា​ខាងមុខ។

មកទល់ឥឡូវ នៅ​រុស្ស៊ី មាន​អ្នកនយោបាយ​៤នាក់​ទៅហើយ​បាន​ប្រកាស​ពី​បំណង​ខ្លួន ចូល​ប្រឡូក ក្នុង​ការ​បោះឆ្នោត​ឆ្នាំ​ក្រោយ ដើម្បី​ដណ្តើមយក​តំណែង​កំពូល​នោះ។ ពោលគឺ ប្រធាន​បក្ស​កុម្មុយនិស្ត លោក Ziouganov ប្រធាន​បក្ស​ជាតិនិយម លោក Zhirinovski ប្រធាន​បក្ស​កំណែទម្រង់​និយម លោក Yavlinski មេដឹកនាំ​បក្ស​ប្រឆាំង​ដៃដល់​ជាងគេ ដែល មាន​ឈ្មោះថា “ប្រទេស​រុស្ស៊ី​ត្រូវ​មាន​មុខមាត់​ផ្សេង” លោក Limonov។

ដើម្បី​ឲ្យគ.ជ.ប.កត់ត្រា​ទៅជា​បេក្ខជន​ស្រប​ច្បាប់ សាមីជន​ត្រូវ​អង្គាស​ហត្ថលេខា​បណ្តាជន​ម្ចាស់ឆ្នោត ដែល​គាំទ្រ​ខ្លួន​ឲ្យបាន​ម្នាក់ៗ យ៉ាងហោចណាស់​ចំនួន​២លាន​នាក់។

គ.ជ.ប. នឹងចេញ​បញ្ជី​ផ្លូវការ រាយឈ្មោះ​បេក្ខជន​ដែល​នឹង​ប្រជែងគ្នា​នោះ គឺ​លុះ​នៅ​កណ្តាល ខែធ្នូ​ខាងមុខ៕

នៅរុស្ស៊ី អាណត្តិប្រធានាធិបតី ចាប់ពីឆ្នាំក្រោយទៅ នឹងមានរយៈពេលដល់៦ឆ្នាំ មិនមែន ត្រឹម៤ឆ្នាំ ដូចសព្វថ្ងៃឡើយ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI