អានតួអត្ថបទ
រុស្ស៊ី

មហាសន្និបាត​អ.ស.ប. គាំទ្រ​សំណើ​រុស្ស៊ី​កុំឲ្យ​ផ្តល់ “វីរភាព” ដល់​ពួក Nazi

ដោយ៖ កែវ ឆាយា
១៤ នាទី

សំណើរុស្ស៊ីនេះ តាក់តែងឡើង ដោយ​មាន​ការចូលរួម នៃ៤២ ប្រទេស បាន​ទទួល ការអនុម័ត​យប់មិញ ដោយ​១២០ប្រទេស សមាជិក អ.ស.ប.។ ជំទាស់​គឺតែ ស.រ.អា.,កាណាដា និង​រដ្ឋកោះ Marshall ចំណែក ៥៧ប្រទេស បាន​ប្រកាន់​ឥរិយាបថ​អនុប្បវាទ។

ផ្សាយពាណិជ្ជកម្ម

ឯកសារអនុម័តយប់មិញ ដោយ​មហាសន្និបាត អ.ស.ប. មានឈ្មោះ​ថា “សេចក្តីសម្រេច ដែល​ព្រមាន​បណ្តា​ប្រទេស​ក្នុងលោក កុំបណ្តោយ​ឲ្យមាន វីរភាវូបនីយកម្មពួក Nazi  ហើយ អំពាវនាវ​កុំឲ្យភ្លេច អំពើ​ឧក្រិដ្ឋកម្ម​រកលេខដាក់គ្មាន ប្រព្រឹត្ត​ដោយ​ពួកនោះ សម័យ​សង្គ្រាមលោក​លើកទី២”។

ឯកសារនេះ សំដែងក្តីព្រួយបារម្ភ​មែនទែន ចំពោះ​ការកើនឡើង​នៅ​ទ្វីបអឺរ៉ុប និង​នៅតាម តំបន់​ឯទៀត​នៃ​ផែនដី ជាចលនា​ជ្រុលនិយម​ដែល​ឃោសនា លទ្ធិ​ពូជសាសន៍​និយម និង សម្អប់​មនុស្សជាតិ ព្រមទាំង​ផ្សព្វផ្សាយ​ឧត្តមគតិ​ហ្វាស៊ីស្ត លើក​ពូជសាសន៍​មួយ ឲ្យខ្ពស់​ជាង រាល់​ពូជសាសន៍​ឯទៀត។

មិនតែប៉ុណ្ណោះ សេចក្តីសម្រេច​របស់​មហាសន្និបាត អ.ស.ប. ឆ្លុះឲ្យឃើញ​ពី​ក្តីថប់កង្វល់ ចំពោះ​ការប៉ុនប៉ង​គ្មាន​ឈប់ប្រមាថ និង​បំផ្លាញ​រូបសំណាក​និង​បូជនីយស្ថាន​​ណា ដែល​មាន​សាងសង់ឡើង រំលឹកដល់​វិញ្ញាណក្ខន្ធ អ្នកដែលបាន​ប្រយុទ្ធ​ទល់នឹង​ពួក Nazi សម័យ​សង្គ្រាម​លោក​លើកទី២។ ឯកសារនោះ ក៏សំដែង​នូវ​ក្តីថប់កង្វល់​ចំពោះ ទង្វើ​អាជ្ញាធរ​ប្រទេស​ខ្លះ ដែល​គាស់​ដោយ​ខុសច្បាប់​យកធាតុ​អ្នកតស៊ូ​ទាំងនោះ ទៅកប់​នៅកន្លែងផ្សេង​ដែល​មិនគប្បីសោះ។

អត្ថបទនៃសេចក្តីសម្រេច ផ្តន្ទាទោស​ចំពោះ ការ​សង់ឡើង ជា​រូបសំណាក​និង​បូជនីយស្ថាន ដែល​ឧទ្ទិស​ដល់ “វីរភាព” ពួក Nazi ព្រមទាំង​ថ្កោលទោស ពិធីប្លែកៗ ជាកិត្តិយស​ដល់​ពួកនោះ ដែល​នាប៉ុន្មានឆ្នាំ​ចុងក្រោយ ក្លាយទៅជា​មាន​លក្ខណៈ​រឿយៗ ក្នុង​ប្រទេស​មួយចំនួន នៅ​មាត់សមុទ្រ​បាល់ទិក ជាបឋម គឺ​នៅប្រទេស ឡេតូនី និង អេស្តូនី។

តំណាងរុស្ស៊ី ថ្លែងក្នុងមហាសន្និបាតនេះ រំលឹក​អំពី​ឧក្រិដ្ឋកម្ម​យោធា​ច្រើន​រាប់មិនអស់ ប្រព្រឹត្ត ដោយ​ពួក Nazi ប្រឆាំង​មនុស្សជាតិ ហើយ​ការបដិសេធ ឬបំភ្លេច​អំពី​រឿងនេះ គឺ​មានន័យថា សាកល្បង សរសេរ​ប្រវត្តិសាស្ត្រ​ឡើងវិញ។ រុស្ស៊ី​ជឿជាក់​ថា ការអនុម័ត​ឯកសារនោះ ដោយ​សំឡេង​ភាគច្រើន​ដាច់ខាត របស់​ប្រទេស​សមាជិក​អ.ស.ប.មុខជា​នឹង​រួមវិភាគទាន​ជាក់លាក់ ទៅក្នុង​បុព្វហេតុ​គាស់រំលើង​ឫស នៃ​លិទ្ធិ​ប្រកាន់​ពូជសាសន៍ ស្អប់ជាតិ​ដ៏ទៃ។

ចំណែកគណៈប្រតិភូស.រ.អា. ដែល​បោះឆ្នោត​ជំទាស់ សំអាង​លើ​លេស​ថា សេចក្តីសម្រេច​នោះ ហាក់បី​បញ្ច្រាស​នឹង​គោលការណ៍​នៃ​សេរីភាព​បញ្ចេញមតិ និង​ថា គេ​មិនអាច​ប្រយុទ្ធ​ទល់នឹង លទ្ធិ​ពូជសាសន៍​និយម ដោយ​វិធីផ្តន្ទាទោស តាមផ្លូវ​ព្រហ្មទណ្ឌ​ឡើយ៕​

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ