រុស្ស៊ី​ប្រកាស​ថា​បាន​បញ្ជូន​មីស៊ីល​សម្រាប់​បាញ់​យន្តហោះ​និង​នាវា​ទៅ​ឲ្យ​ស៊ីរី

សំឡេង ០៤:៣៥
F-22 Raptor ដែលជា​យន្តហោះ​ចម្បាំង​ទំនើប​បំផុត​របស់​អាមេរិក
F-22 Raptor ដែលជា​យន្តហោះ​ចម្បាំង​ទំនើប​បំផុត​របស់​អាមេរិក AFP

កាលពីថ្ងៃ​សុក្រ​ម្សិលមិញ អគ្គនាយក​ក្រុមហ៊ុន​នាំចេញ​សព្វាវុធ​រុស្ស៊ី​បាន​ថ្លែង​ថា ក្រុមហ៊ុន​របស់​លោក​បាន​បញ្ជូន​ទៅ​ឲ្យ​ស៊ីរី នូវ​​មីស៊ីល​ទំនើបៗ​ ដែល​អាច​ប្រើ​សម្រាប់​បាញ់​ទម្លាក់​យន្តហោះ​ចម្បាំង និង​បាញ់​ពន្លិច​នាវាចម្បាំង ក្នុងករណី​មាន​អន្តរាគមន៍​យោធា​ពី​អាមេរិក ឬ​ប្រទេស​ណាមួយ​ផ្សេងទៀត នៅ​ស៊ីរី។ ក្នុងពេល​ជាមួយ​គ្នា​នេះ អាមេរិក​ក៏​​បាន​ទទួលស្គាល់ដែរ​ថា ខ្លួន​បាន​បញ្ជូន​បរិក្ខា​សម្រាប់​ទាក់ទង​ទំនើបៗ​ទៅ​ឲ្យ​ក្រុមឧទ្ទាម​ស៊ីរី។

ផ្សាយពាណិជ្ជកម្ម

 

លោក Anatoly Isaykin អគ្គនាយក​ក្រុមហ៊ុន Rosoboronexport ដែល​ជា​ក្រុមហ៊ុន​រដ្ឋ​របស់​រុស្ស៊ី ទទួលបន្ទុក​ខាង​លក់​គ្រឿង​សព្វាវុធ​រុស្ស៊ី​ទៅ​បរទេស បាន​ថ្លែង​​ក្នុង​បទសម្ភាសន៍​ដល់​សារព័ត៌មាន​ថា មីស៊ីល​ទំនើបៗ​ដែល​ក្រុមហ៊ុន​របស់​លោក​បាន​បញ្ជូន​ទៅ​ឲ្យ​ស៊ីរី​ អាច​ប្រើ​ក្នុង​ការ​ទប់ទល់​នឹង​ការ​វាយប្រហារ​តាមអាកាស ឬ​តាម​ផ្លូវ​សមុទ្រ។ លោក​បាន​បញ្ជាក់ថា នេះ​មិនមែន​ជា​ការ​គំរាម​ដល់​ប្រទេស​ណាមួយ​ទេ ក៏ប៉ុន្តែ អ្នកណា​ក៏ដោយ ដែល​មាន​បំណង ឬ​មាន​ផែនការ​ចង់​វាយប្រហារ​លើ​ស៊ីរី គួរ​គិត​ឲ្យ​បាន​ហ្មត់ចត់​ ​អំពី​​ប្រព័ន្ធមីស៊ីល​ការពារ​ដែន​អាកាស​នេះ។

យោងតាម​លោក Isaykin មីស៊ីល​​ទាំងនេះ​អាច​មាន​ប្រសិទ្ធភាព​បាញ់​ទម្លាក់​យន្តហោះ ដែល​ហោះ​នៅ​រយៈកំពស់​រហូតដល់ ២៥​គីឡូម៉ែត្រ និង​ក្នុង​រង្វង់​ ២០គីឡូម៉ែត្រ ឬ​ឆ្ងាយ​ជាងនេះ។ ចំពោះ​ប្រភេទ​មីស៊ីល​ប្រឆាំង​នាវាវិញ គឺ​អាច​បាញ់​ពន្លិច​នាវា ដែល​ស្ថិត​នៅ​ចម្ងាយ​ប្រមាណ ២៨៨​គីឡូម៉ែត្រ​ពី​ឆ្នេរ។

អ្នកជំនាញ​ខាង​យោធា​វិញ​បាន​លើកឡើង​ថា មីស៊ីល​ដែល​រុស្ស៊ី​បញ្ជូន​ទៅ​ស៊ីរី​នេះ មិនមែន​ជា​ប្រភេទ​មីស្ស៊ីល​ធុន​ទំនើប​បំផុត​របស់​រុស្ស៊ី​នោះទេ ហើយ​វា​ក៏​មិន​អាច​ទប់ទល់​នឹង​យន្តហោះ​ទំនើបៗ​របស់​អាមេរិក និង​សម្ព័ន្ធមិត្ត​បានដែរ។

ក៏ប៉ុន្តែ ទោះជានេះ​ក៏ដោយ រុស្ស៊ី​ទំនង​ជា​ចង់​ព្រមាន​​ដល់​លោក​ខាងលិច​ថា យ៉ាងហោចណាស់​ ដែន​អាកាស​ និង​ដែន​សមុទ្រ​របស់​ស៊ីរី​​មិនមែន​គ្មាន​អ្វី​ការពារ​សោះ ដូចជា​នៅ​លីប៊ី​នោះទេ។ ដូច្នេះ បើសិន​ជា​គេ​ចង់​វាយប្រហារ​ ឬ​ត្រឹមតែ​បង្កើត​តំបន់​គ្មាន​ការ​ហោះហើរ​នៅស៊ីរី គឺ​គេប្រាកដ​ជា​ត្រូវ​ប្រើ​ធនធាន​ច្រើន ហើយ​អាច​ត្រូវ​ប្រឈមមុខ​នឹង​ការ​បាត់បង់​នាវា ឬ​យន្តហោះ ឬ​រហូតដល់​បាត់បង់​ជីវិត​ទាហាន​ក៏​អាច​ថាបាន។

កាន់តែ​សំខាន់​ជាងនេះ​ទៅទៀត រុស្ស៊ី​ប្រហែល​ជា​ចង់​រំឭក​ដល់​អាមេរិក និង​សម្ព័ន្ធមិត្ត​ឲ្យ​នឹកឃើញ​ពី​សម័យ​សង្រ្គាម​ត្រជាក់ ដែល​ប្លុក​សូវៀត និង​ប្លុក​លោកខាងលិច តែងតែ​ប្រឈមមុខ​​ដាក់គ្នា​ដោយ​ប្រយោល​ខាង​ផ្នែក​យោធា តាមរយៈ​ការ​លូកដៃ​ជួយ​ភាគី​ជម្លោះ​ក្នុង​សង្រ្គាម​ស៊ីវិល នៅ​តាម​ប្រទេស​មួយចំនួន។ ចំពោះ​ករណី​ស៊ីរី​នៅពេលនេះ ប្រសិន​បើ​អាមេរិក និង​សម្ព័ន្ធមិត្ត​​ហ៊ាន​ធ្វើ​អន្តរាគមន៍​យោធា គឺ​នឹង​ត្រូវ​ប្រឈមមុខ​ខាង​ផ្នែក​យោធា​ដោយ​ប្រយោល​ជាមួយ​រុស្ស៊ី ដូច​កាល​ពី​សម័យ​សង្រ្គាម​ត្រជាក់​ដូច្នេះ​ដែរ។

លោក​អូបាម៉ា​គ្រោង​ជួប​ជជែក​ជាមួយ​លោក​ពូទីន ប្រធានាធិបតី​រុស្ស៊ី នៅ​ថ្ងៃ​ចន្ទ​ខានស្អែក​នេះ នៅ​ក្រៅ​ជំនួបកំពូល​នៃ​ក្រុមប្រទេស G20 នៅ​ក្នុង​ប្រទេស​ម៉ិកស៊ិក ដើម្បី​ពិភាក្សា​រកដំណោះស្រាយ​វិបត្តិ​ស៊ីរី៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI