អានតួអត្ថបទ
រុស្ស៊ី

នៅ​ទីបំផុត​រុស្ស៊ី​នឹង​ចូល​មែន​ក្នុង​អង្គការ​ពាណិជ្ជកម្ម​ពិភពលោក

ស្លាកសញ្ញា​របស់​អង្គការ​ពាណិជ្ជកម្ម​ពិភពលោក
ស្លាកសញ្ញា​របស់​អង្គការ​ពាណិជ្ជកម្ម​ពិភពលោក
ដោយ៖ កែវ ឆាយា
១៦ នាទី

លទ្ធភាព​បែបនេះ​កើតមាន​នៅ​ពីមុខ​រុស្ស៊ី ក្រោយពី​ថ្ងៃ៩វិច្ឆិកា​កន្លងទៅ នៅឯ​ទីក្រុង​ Geneve មាន​ចុះបាន​កិច្ចព្រមព្រៀង​ឈរលើ​ការ​ធ្វើ​សម្បទាន​ទៅវិញ​ទៅមក រវាង​រុស្ស៊ី និង​ហ្សកហ្ស៊ី ស្តីអំពី​ការ​ត្រួតពិនិត្យ​លើ​ចរាចរណ៍​ទំនិញ នៅត្រង់​ព្រំដែន​រវាង​ប្រទេស​ទាំង២។ កិច្ចព្រមព្រៀងនេះ​តាក់តែង​ឡើង​ដោយ​ប្រទេសស្វ៊ីស ជា​អន្តរការី​ជួយ​ដើរការ​ឲ្យ​រុស្ស៊ី និង ហ្សកហ្ស៊ី ដែល​៣ឆ្នាំ​ចុងក្រោយ ក្លាយ​ទៅជា​គូសត្រូវ​នឹងគ្នា បន្ទាប់ពី​រុស្ស៊ី​បាន​ធ្វើ​អន្តរាគមន៍​យោធា ទៅលើ​ហ្សកហ្ស៊ី ក្នុង​ឆ្នាំ​២០០៨។

ផ្សាយពាណិជ្ជកម្ម

កិច្ចព្រមព្រៀង​ដែល​មាន​ចុះ​នេះ គឺ​បើកផ្លូវ​ឲ្យ​រុស្ស៊ី​ចូល​ជា​សមាជិក នៃ​អង្គការ​អន្តរជាតិ​ខាង​គ្រប់គ្រង​លើ​របៀបរបប​ធ្វើ​ពាណិជ្ជកម្ម​នៅក្នុង​លោក ហៅថា OMC។ ដ្បិត​មកទល់​ឥឡូវ មានតែ​ហ្សកហ្ស៊ី​មួយគត់ ដែល​តែង​បាន​រាំងរា​ផ្លូវ​ទល់នឹង​សមាជិកភាព​របស់​រុស្ស៊ី​ក្នុង​OMC។ ស្របនឹង​ក្បួនខ្នាត ប្រកាន់យក​ដោយ OMC ដើម្បី​ចូលជា​សមាជិក​អង្គការ​នេះ ប្រទេស​បេក្ខជន ​ពោលគឺ រុស្ស៊ី​ត្រូវ​ទទួល​ការ​យល់ព្រម​ពីខាង​គ្រប់តែ​ប្រទេស​សមាជិក​របស់​វា ដែល​បច្ចុប្បន្ន មាន​១៥៣ប្រទេស ហើយ​បើ​មាន​ការ​ប្រកែក​ដោយ​ប្រទេស​ណាមួយ​ជា​សមាជិក​នោះ គឺ​មិនអាច​ត្រូវ​ទទួល​ឲ្យ​ចូល​ឡើយ។ ក្នុង​ករណី​ដែល​មាន​ហ្សកហ្ស៊ី ដែល​តែង​បាន​ជំទាស់​នោះ ជា​សមាជិក OMC តាំងពី​ឆ្នាំ​២០០០​ម៉្លេះ។

មូលហេតុ​នៃ​ការ​ប្រកែក​នោះ គឺ​មក​ពី​នា​កិច្ចចរចា រុស្ស៊ី​តែង​បាន​ច្រានចោល​ការ​ទាមទារ​របស់​ហ្សកហ្ស៊ី ឲ្យ​មាន​ពួក​អ្នកតំណាង​របស់​ហ្សកហ្ស៊ី​ផ្ទាល់​វត្តមាន​នៅ​ប៉ុស្តិ៍គយ ត្រង់​ព្រំដែន​រវាង​រុស្ស៊ី និង​ដែនដី Abkhazie និង​ត្រង់​ព្រំដែន​រវាង​រុស្ស៊ី​និង​ដែនដី Ossetieខាងត្បូង ដោយ​ហ្សកហ្ស៊ី​ចាត់ទុក​ដែនដី​ទាំងពីរ​នេះ ជា​ដែនដី​អបគម​របស់​ខ្លួន។ ប៉ុន្តែ​រុស្ស៊ី ដែល​តាំងពី​ឆ្នាំ២០០៨​មក ទទួលស្គាល់​ឯករាជ្យ​ដែនដី​ទាំងពីរ​នេះ គូសបញ្ជាក់​ថា Abkhazie និង Ossetieខាង​ត្បូង ជា​រដ្ឋ​ឯករាជ្យ​ទៅហើយ លែង​អាស្រ័យ​នឹង​ហ្សកហ្ស៊ី​ទៀតឡើយ។

រីឯ​ខ្លឹមសារ​នៃ​ការ​ធ្វើសម្បទាន​ទៅវិញ​ទៅមក ដែល​មាន​ចែង​ក្នុង​កិច្ចព្រមព្រៀង​ទើបនឹង​ចុះនោះ គឺ​ហ្សកហ្ស៊ី​សុខចិត្ត​ឈប់​ទាមទារ​ឲ្យមាន​ពួក​អ្នកតំណាង​របស់​ខ្លួន​វត្តមាន​នៅតាម​ប៉ុស្តិ៍គយ ត្រង់​២កន្លែង​នោះ។ ចំណែក​រុស្ស៊ី​វិញ គឺ​យល់ព្រម​ឲ្យ​មាន​ពួក​អ្នក​ត្រួតពិនិត្យ​អន្តរជាតិ​របស់ “សហគ្រាស​ឯកជន​ដែល​ឯករាជ្យ​ម្ចាស់ការ” វត្តមាន​នៅតាម​ចុង​ទាំងសងខាង នៃ​ច្រក​ចេញចូល ៣កន្លែង សម្រាប់​កត់ត្រា​អំពី​ប្រភេទ និង​បរិមាណ​គ្រប់​ទំនិញ ដែល​ចេញចូល រវាង​រុស្ស៊ី និង​ហ្សកហ្ស៊ី ពោលគឺ ៖
ទី១- ច្រក រវាង​រុស្ស៊ី​និង​ហ្សកហ្ស៊ី​ផ្ទាល់ នៅត្រង់​ប៉ុស្តិ៍យ ដែល​មាន​ឈ្មោះ​ថា Lars
ទី២- ច្រក រវាង​រវាងរុស្ស៊ី និង​ដែនដី Abkhazie
ទី-៣ ច្រក រវាង​រុស្ស៊ី និង​ដែនដី Ossetie ខាងត្បូង

ថ្ងៃ១០វិច្ឆិកានេះ ក្រុមការងារ​ផ្សំឡើង​ពី ៦២ប្រទេស នា​កិច្ចប្រជុំ​នៅ​ក្រុង Geneve ត្រូវ​ប្រកាស អំពី​កាលបរិច្ឆេទ សម្រាប់​ទទួល​រុស្ស៊ី​ ដែល​ខំ​ធ្វើ​កិច្ចចរចា អស់​១៨ឆ្នាំ​ហើយ ឲ្យចូល ជា​សមាជិក ទី១៥៤ របស់ “អង្គការ​ពាណិជ្ជកម្ម​ពិភពលោក” OMC ហៅថា “ក្លឹប​នៃ​សេដ្ឋកិច្ច​ទីផ្សារ”៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ