កម្ពុជា

លោក​សម រង្ស៊ី ដឹក​នាំ​បាតុករ​យក​ញត្តិ​ទៅ​ប្រគល់​ជូន​តំណាង​អង្គការ​សហ​ប្រជាជាតិ​

ក្រុម​អ្នក​គាំទ្រ​គណបក្ស​សង្គ្រោះជាតិ ដើរហែក្បួន​ នៅ​ថ្ងៃទី២៣ តុលា ឆ្នាំ២០១៣។
ក្រុម​អ្នក​គាំទ្រ​គណបក្ស​សង្គ្រោះជាតិ ដើរហែក្បួន​ នៅ​ថ្ងៃទី២៣ តុលា ឆ្នាំ២០១៣។ RFI/Siv Channa

ដូច​ការ​គ្រោង​ទុក លោក​សម រង្ស៊ី និង​លោក កឹម សុខា បាន​ដឹកនាំ​បាតុករ ដង្ហែ​ញត្តិ​ទៅ​ប្រគល់​ជូន​ការិយាល័យ​ឧត្តម​ស្នងការ​សហប្រជាជាតិ​ប្រចាំ​ទី​ក្រុង​ភ្នំពេញ​រួច​ហើយ​ នៅ​រសៀល​ថ្ងៃ​ពុធ​នេះ។ មហា​បាតុកម្ម​គណបក្ស​សង្គ្រោះ​ជាតិ​នៅ​រសៀល​ថ្ងៃ​នេះ ​មាន​មនុស្ស​ចូលរួម​យ៉ាង​ច្រើន​កុះករ។ មហា​បាតុកម្ម​នេះ​នឹង​បន្ត​ធ្វើ​រយៈពេល​៣​ថ្ងៃ​ជាប់​គ្នា ​ដើម្បី​ទាមទារ​រក​យុត្តិធម៌​ក្នុង​ការ​បោះឆ្នោត។

ផ្សាយពាណិជ្ជកម្ម

ញត្តិ​ដែលមាន​ស្នាម​មេដៃ​ពលរដ្ឋ​ជាង២លាន​នាក់​ ត្រូវបាន​បញ្ជូន​ទៅដល់​ការិយាល័យ​ឧ​ត្ត​ម​ស្នងការ​សហប្រជាជាតិ​ទទួលបន្ទុក​សិទ្ធិមនុស្ស​ហើយ ​នៅ​រសៀល​ថ្ងៃ​ពុធ​នេះ។ ក្រុមបាតុករ​ច្រើន​ពាន់​នាក់​ដឹកនាំ​ដោយ​លោក សម រង្ស៊ី និង​លោក​កឹម សុខា បាន​ដើរ​ដង្ហែ​ញត្តិ​នោះ​ចេញពី​ទីលាន​ប្រជាធិបតេយ្យ​ ឆ្ពោះទៅកាន់​ការិយាល័យ​ឧ​ត្ត​ម​ស្នងការ​សហប្រជាជាតិ​ទទួលបន្ទុក​សិទ្ធិមនុស្ស​ប្រចាំ​ទីក្រុង​ភ្នំពេញ​ ដែល​ស្ថិតក្នុង​សង្កាត់​បឹង​កេងកង។

មុនពេល​ចេញពី​ទីលាន​ប្រជាធិបតេយ្យ មេដឹកនាំ​គណបក្ស​សង្គ្រោះ​ជាតិ​បាន​ថ្លែង​ទៅកាន់​ក្រុមបាតុករ​ដែល​កកកុញ​ក្នុង​ទីលាន​ប្រជាធិបតេយ្យ​អំពី​គោលបំណង​នៃ​ការធ្វើ​មហា​បាតុកម្ម​នេះ​ថា ដើម្បី​ទាមទារ​រក​យុត្តិធម៌​ក្នុងការ​បោះឆ្នោត និង​ទាមទារ​ឲ្យ​មានការ​ផ្លាស់ប្តូរ​នៅ​កម្ពុជា។

គ្មាន​ការវាយតម្លៃ​ជាក់លាក់​ណាមួយ​ស្តីពី​ចំនួន​អ្នកចូលរួម​ឲ្យ​បាន​ពិតប្រាកដ​ទេ។ គណបក្ស​សង្គ្រោះ​ជាតិ​អះអាងថា ​មាន​អ្នកចូលរួម​ប្រមាណ​ជា ៦ម៉ឺន​នាក់ ខណៈដែល​អង្គការ​សង្គម​ស៊ីវិល​ថា មាន​ចំនួន​ប្រហែល​ជាង ៤ម៉ឺន​នាក់។ ប៉ុន្តែ អ្វីដែល​គេ​អាច​កត់សម្គាល់​នោះ​គឺមាន​អ្នកចូលរួម​ប្រហាក់ប្រហែល​នឹង​បាតុកម្ម​លើកមុនៗដែរ។

លោក ចាន់ សូ​វ៉េ​ត មន្ត្រី​អង្គការសិទ្ធិមនុស្ស​អាដ​ហុក​ដែល​បាន​តាម​ដាន​ព្រឹត្តិការណ៍​នេះ​យ៉ាង​យកចិត្តទុកដាក់​ បាន​ប្រាប់​វិទ្យុ​បារាំង​អន្តរជាតិ​ថា មហា​បាតុកម្ម​ថ្ងៃនេះ​បាន​ប្រព្រឹត្តទៅដោយ​គ្មាន​អំពើហិង្សា​ទេ។ នៅថ្ងៃនេះ​ដែរ ក្រសួងមហាផ្ទៃ​ក៏បាន​ចេញ​សេចក្តីអំពាវនាវ​ឲ្យ​បាតុករ​និង​សមត្ថកិច្ច​ប្រកាន់ខ្ជាប់​នូវ​គោលការណ៍​បាតុកម្មអហិង្សា និង​ដោយ​សន្តិវិធី។

ដោយឡែក នៅតាម​បណ្តា​ច្រកចូល​ភ្នំពេញ អាជ្ញាធរ​មិនបាន​រារាំង​អ្នកដំណើរ​ដែល​មក​ចូលរួម​បាតុកម្ម​ទេ ប៉ុន្តែ គ្រាន់តែ​មានការ​ឆែកឆេ​រខ្លះៗប៉ុណ្ណោះ។ នេះ​បើ​យោងតាម​លោក សួន ប៊ុនស័ក្តិ លេខាធិការ​ប្រតិបត្តិ​នៃ​គណៈកម្មាធិការ​ប្រព្រឹត្តិកម្ម​នៃ​អង្គការ​សមាគម​ការពា​រ​សិទ្ធិមនុស្ស។ ការឆែកឆេរ​របស់​ស​ម​ត្ថ​កិច្ច​បាន​បង្ក​ការរំខាន​ខ្លះ​ដល់​អ្នកដំណើរ។ យ៉ាងណាក៏ដោយ លោក សួន ប៊ុន​ស័ក្តិ កត់សម្គាល់ថា អាជ្ញាធរ​ហាក់ដូច​ជាមាន​ការ​សម្រប​សម្រួល​​ឲ្យ​បាតុករ​បាន​ចូលមក​ធ្វើបាតុកម្ម​នៅ​ទីក្រុង​ភ្នំពេញ។

មហា​បាតុកម្ម​នឹង​បន្តធ្វើ​រយៈពេល​បី​ថ្ងៃជាប់ៗគ្នា។ នៅ​ថ្ងៃស្អែក និង​ថ្ងៃ​បន្ត​បន្តា​ប់​ទៀត ក្រុមបាតុករ​ដឹកនាំ​ដោយ​គណបក្ស​សង្គ្រោះ​ជាតិ​ នឹង​ដង្ហែ​ញត្តិ​ស្នាម​មេដៃ​របស់​អ្នកគាំទ្រ​ទៅជូន​ស្ថានទូត​បរទេស​នានា​នៅ​ទីក្រុង​ភ្នំពេញ​ផងដែរ​ ដើម្បី​សុំ​ឲ្យ​សហគមន៍​អន្តរជាតិ​ជួយ​ដោះស្រាយ​បញ្ហា​បោះឆ្នោត៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI