កម្ពុជា

លោក​សម រង្ស៊ី ត្រូវបាន​រដ្ឋសភា​បញ្ចប់​សមាជិកភាព​ពី​អ្នក​តំណាង​រាស្ត្រ

លោក សម រង្ស៊ី ប្រធាន​គណបក្ស​សមរង្ស៊ី
លោក សម រង្ស៊ី ប្រធាន​គណបក្ស​សមរង្ស៊ី ©ម៉េងហួរ/RFI

ប្រធានរដ្ឋសភា លោក ហេង សំរិន បានប្រកាស​ជា​លាយលក្ខណ៍អក្ស​រថា លោក សម រង្ស៊ី ត្រូវ​បាត់បង់​ទាំងស្រុង​នូវ​សិទ្ធិ បុព្វសិទ្ធិ និង​សមាជិក​ភាពជា​អ្នកតំណាងរាស្ត្រ មណ្ឌល​ខេត្ត​កំពង់ចាម ចាប់ពី​ថ្ងៃ​ទី​១៥​មីនា​​២០១១​ទៅ។ សេចក្តីសម្រេច​ដូច្នេះ ដោយសារតែ​សាលដីកា​របស់​តុលាការ​កំពូល ដែល​បាន​ផ្តន្ទាទោស​លោក សម រង្ស៊ី ដាក់ពន្ធនាគារ ពីរ​ឆ្នាំ ក្នុង​រឿង​ដក​តម្រុយ​បង្គោល​ព្រំដែន នៅ​ខេត្ត​ស្វាយរៀង បាន​ចូល​ជា​ស្ថាពរ កាលពី​ថ្ងៃ​១៥​មីនា​ម្សិលមិញ​។​

ផ្សាយពាណិជ្ជកម្ម

សេចក្តីរាយការណ៍​របស់ លី ម៉េងហួរ ពី​ភ្នំពេញ

ដើម្បី​សម្រេច​បញ្ចប់​សមាជិកភាព​ជាតំណាងរាស្រ្ត​របស់​​លោក​សម រង្ស៊ី ប្រធានរដ្ឋសភា​​កម្ពុជា​បាន​លើកយក​មូលដ្ឋាន​ច្បាប់​មួយចំនួន គឺ ​ប្រការ ៨៣ នៃ​បទបញ្ជាផ្ទៃក្នុង​របស់​រដ្ឋសភា​, មាត្រា ១៤ នៃ​ច្បាប់ ស្តីពី​លក្ខន្តិកៈ​អ្នកតំណាងរាស្ត្រ​, មាត្រា ១២០​ថ្មី នៃ​ច្បាប់​ស្តីពី​វិសោធនកម្ម​ច្បាប់​ស្តីពី​ការបោះឆ្នោត​ជ្រើសរើស​តំណាងរាស្ត្រ និង​យោង​តាម​សាលដីកា​របស់​តុលាការ​កំពូល ចុះ​ថ្ងៃ​ទី​១​៥មីនា​ឆ្នាំ​២០១១​។​

​​តុលាការ​ទាំង​បី​ថ្នាក់​របស់​ប្រទេស​កម្ពុជា​បានសម្រេច​ផ្តន្ទាទោស​​ដោយ​កំបាំងមុខ ឲ្យ​លោក​សម រង្ស៊ី ​ជាប់ពន្ធនាគារ​រយៈពេល ពីរ​ឆ្នាំ ក្នុង​សំណុំរឿង​ដក​តម្រុយ​បង្គោល​ព្រំដែន​កម្ពុជា​-​វៀតណាម ក្នុង​ខេត្ត​ស្វាយរៀង​។ សាលដីកា​របស់​តុលាការ​កំពូល បាន​ចូល​ជា​ស្ថាពរ កាលពី​ថ្ងៃ​១៥​មីនា​ម្សិលមិញ​។​

​គឺ​នៅ​ថ្ងៃ​១៥​មីនា​ម្សិលមិញ​នេះឯង លោក ហេង សំរិន ប្រធានរដ្ឋសភា បាន​ចេញ​សេចក្តីប្រកាស​ជាពិសេស បញ្ជាក់ថា លោក សម រង្ស៊ី ត្រូវ​បាត់បង់​សិទ្ធិ បុព្វសិទ្ធិ និង​សមាជិក​ភាព​ជា​សមាជិក​រដ្ឋសភា មណ្ឌល​កំពង់ចាម អាណត្តិ​ទី​៤​។​

​មាត្រា ១២០ ថ្មី នៃ​ច្បាប់​ស្តីពី​វិសោធនកម្ម​ច្បាប់​ស្តីពី​ការបោះឆ្នោត​ជ្រើសរើស​តំណាងរាស្ត្រ បាន​កំណត់​ថា សមាជិក​រដ្ឋសភា​ត្រូវ​បាត់​បង់​សមាជិកភាព​របស់​ខ្លួន ទៅតាម​ករណី សា​មី​ខ្លួន​នោះ ត្រូវ​តុលាការ​ផ្តន្ទាទោស ដាក់ពន្ធនាគារ​ពី​បទឧក្រិដ្ឋ ឬ​បទមជ្ឈិម​ណាមួយ​។ គណបក្ស​នយោបាយ​នោះ អាច​ស្នើ​ជ្រើសតាំង​សមាជិក​ថ្មី​ជំនួស ដោយ​ជ្រើសតាំង​ក្នុងចំណោម​បេក្ខជន​ដែល​មានឈ្មោះ តាម​លំដាប់​លេខ​រៀង ក្នុង​បញ្ជី​បេក្ខជន​ឈរឈ្មោះ​បោះឆ្នោត​នៃ​មណ្ឌល​បោះឆ្នោត​របស់​សា​មី​ខ្លួន មក​ជំនួស​ដោយ​មិនបាច់​បោះឆ្នោត​ឡើងវិញ​។​

​យ៉ាងណាក៏ដោយ ចំពោះ​ការសម្រេច​របស់​រដ្ឋសភា​យ៉ាង​ដូច្នេះ ត្រូវបាន​លោក គង់ គាំ ប្រធានស្តីទី​គណបក្ស​ស​ម​រង្ស៊ី ចាត់ទុក​ជា​រឿង​មិន​ត្រឹមត្រូវ និង​ជា​សេចក្តីសម្រេច ដោយ​អយុត្តិធម៌​។​ ​លោក គង់ គាំ បាន​លើកឡើង​ថា លោក​តំណាងរាស្ត្រ​សមរង្ស៊ី មិន​មាន​កំហុស​អ្វី​ទេ ប៉ុន្តែ​ការសម្រេច​របស់​តុលាការ​ទាំង​បី​ថ្នាក់ និង​ការសម្រេច​របស់​រដ្ឋសភា គ្រាន់តែ​ជា​ការចង់​ផាត់​លោក​សម​រង្ស៊ី ចេញពី​ឆាកនយោបាយ​នៅ​កម្ពុជា​ប៉ុណ្ណោះ​។​

​ចាប់តាំងពី​មាន​រឿងរ៉ាវ​ដក​បង្គោល​តម្រុយ​ព្រំដែន​កម្ពុជា​វៀតណាម នៅ​ខេត្ត​ស្វាយរៀង កាលពី​ថ្ងៃ​ទី​២៥​តុលា ឆ្នាំ​២០០៩ លោក សម រង្ស៊ី បាន​និរទេស​ខ្លួន ទៅ​ស្នាក់នៅ​ប្រទេស​បារាំង។ មេ​បក្ស​ប្រឆាំង​រូបនេះ ក៏​ត្រូវ​តុលាការក្រុង​ភ្នំពេញ កាលពីខែកញ្ញា ឆ្នាំ២០១០ សម្រេច​ផ្តន្ទាទោស​កំបាំងមុខ ដាក់​ពន្ធនាគារ​រយៈពេល ១០ ឆ្នាំ ក្នុង​សំណុំរឿង​ផែនទី​ក្លែងក្លាយ​។ សំណុំរឿង​ថ្មី​នោះ កំពុងស្ថិត​នៅ​តុលាការ​សាលាឧទ្ធរណ៍​៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI