កម្ពុជា

គណបក្ស​សម រង្ស៊ី​អំពាវនាវ​ឲ្យ​មាន​ការ​ផ្សះផ្សា​នយោបាយ​នៅ​កម្ពុជា

លោកនាយករដ្ឋមន្រ្តី ហ៊ុន សែន និង​លោកសម រង្ស៊ី
លោកនាយករដ្ឋមន្រ្តី ហ៊ុន សែន និង​លោកសម រង្ស៊ី (រូបថតឯកសារ)

គណបក្ស​សម រង្ស៊ី ​ដែល​ជា​បក្ស​ប្រឆាំង​ធំ​ជាងគេ​នៅ​កម្ពុជា​បាន​អំពាវនាវ​រក​ការ​ផ្សះផ្សា​ជាមួយ​គណបក្ស​កាន់​អំណាច​ដើម្បី​បើក​ច្រក​ឲ្យ​លោក​សម រង្ស៊ី​បាន​វិល​ត្រឡប់​ចូល​ស្រុក​វិញ​ជាពិសេស​ចូល​រួម​ការ​បោះឆ្នោត​ជ្រើសរើស​តំណាងរាស្ត្រ​នៅ​ឆ្នាំ​២០១៣។ ​ប៉ុន្តែ ​សម្រាប់​លោក​នាយក​រដ្ឋមន្ត្រី ​ហ៊ុន សែន ​ករណី​លោក​សម រង្ស៊ី​គឺជា​រឿង​ផ្លូវ​ច្បាប់​មិន​មែន​ជា​រឿង​នយោបាយ​ទេ។ នេះ​អាច​ចាត់ទុក​ជា​ចម្លើយ​អវិជ្ជមាន​មួយ​ចំពោះ​បក្ស​ប្រឆាំង។

ផ្សាយពាណិជ្ជកម្ម

ក្រុម​អ្នក​តំណាងរាស្ត្រ​គណបក្ស​សម រង្ស៊ី ​បាន​ចេញ​សេចក្តី​ថ្លែងការណ៍​រួម​គ្នា​មួយ ​នៅ​ចុង​សប្តាហ៍​នេះ​ ដោយ​អំពាវនាវ​ឲ្យ​មាន​ការ​ផ្សះផ្សា​នយោបាយ ​រវាង​គណបក្ស​កាន់អំណាច​ និង​គណបក្ស​ប្រឆាំង។ ​ការ​អំពាវនាវ​បែប​នេះ​បាន​ធ្វើ​ឡើង ​ដោយ​យោង​ទៅ​លើ​ប្រសាសន៍​របស់​ លោក​ ស៊ូរិយា ​ស៊ូប៊េឌី​ អ្នករាយការណ៍​ពិសេស​ខាង​សិទ្ធិ​មនុស្ស​របស់​អង្គការ​សហប្រជាជាតិ​ប្រចាំ​កម្ពុជា ​ដែល​ចង់​ឃើញ​ការ​បង្រួប​បង្រួម​ផ្សះផ្សា​គ្នា​ រវាង​កម្លាំង​នយោបាយ​សំខាន់​ទាំងពីរ។​

ក្នុង​ដំណើរ​ទស្សនកិច្ច​រយៈពេល ​៦ថ្ងៃ ​នៅ​កម្ពុជា ​កាលពី​សប្តាហ៍​មុន​ លោក ​ស៊ូរិយា ​ស៊ូប៊េឌី ​បាន​មាន​ប្រសាសន៍​ថា​ កិច្ចប្រឹងប្រែង​ក្នុង​គោល​បំណង​ស្ថាបនា​ឡើង​នូវ​មាគ៌ា​ផ្សះផ្សា ​រវាង​រដ្ឋាភិបាល​ និង​គណបក្ស​ប្រឆាំង ​នឹង​ក្លាយជា​ការពង្រឹង​ដំណើរការ​ប្រជាធិបតេយ្យ​នៅ​កម្ពុជា។​
នៅ​ក្នុង​ន័យ​នេះ ​ក្រុម​តំណាងរាស្ត្រ​គណបក្ស ​សម រង្ស៊ី ​បាន​បញ្ជាក់​នៅ​ក្នុង​សេចក្តី​ថ្លែងការណ៍​របស់​ខ្លួន​ថា​ គណបក្ស​សម រង្ស៊ី​មាន​ឆន្ទៈ​ក្នុង​ការ​ឆ្លើយតប​ជា​វិជ្ជមាន ​ចំពោះ​ការ​អំពាវនាវ​រក​ការ​ផ្សះផ្សា​ជាតិ​ ពី​សំណាក់​តំណាង​អង្គការ​សហប្រជាជាតិ។ ​គណបក្ស​ សម រង្ស៊ី ​ក៏​សង្ឃឹម​ថា ​គណបក្ស​ប្រជាជន​កម្ពុជា​នឹង​បង្ហាញ​នូវ​មេត្រីភាព​ដ៏​មាន​តម្លៃ​នេះ​ ដើម្បី​សម្រេច​បាន​លទ្ធិ​ប្រជាធិបតេយ្យ​ពិតប្រាកដ​មួយ​នៅ​កម្ពុជា។​

ទន្ទឹម​នឹង​នោះ​ដែរ​ គណបក្ស​ប្រឆាំង​ក៏​បាន​អំពាវនាវ​ឲ្យ​រដ្ឋាភិបាល​អន្តរជាតិ​ជួយ​ដាក់​សម្ពាធ​​ទៅ​លើ​រដ្ឋាភិបាល​ក្រុងភ្នំពេញ​ ដើម្បី​សម្រេច​គោល​ដៅ​នេះ។​ ក្រុម​តំណាងរាស្ត្រ​គណបក្ស ​សម រង្ស៊ី ​អះអាង​ថា ​វត្តមាន​លោក​សម រង្ស៊ី ​នៅ​ក្នុង​ប្រទេស​កម្ពុជា ​មុន​ការ​បោះឆ្នោត​ជាតិ​នៅ​ឆ្នាំ​២០១៣ ​មាន​សារៈសំខាន់​ណាស់​ក្នុង​ការធានា​នូវ​ការ​ប្រកួត​ប្រជែង​ជាមួយ​លោក​នាយក​ រដ្ឋមន្ត្រី ​ហ៊ុន សែន​ នៃគណបក្ស​ប្រជាជន​កម្ពុជា ​ដើម្បី​ទទួល​បាន​នូវ​ការបោះឆ្នោត​ដែល​អាច​ជឿជាក់​បាន។​

នៅ​មិន​ទាន់​មាន​ការ​ឆ្លើយ​តប​ភ្លាមៗ​ពី​គណបក្ស​ប្រជាជន​កម្ពុជា​នៅ​ឡើយ​ទេ​ក្នុង​ពេល​​ភ្លាមៗ​នេះ។ ​ប៉ុន្តែ ​នៅ​ក្នុង​លិខិត​មួយ​របស់​លោក​នាយករដ្ឋមន្ត្រី​ហ៊ុន សែន​ ឆ្លើយ​តប​ទៅ​នឹង​សំណួរ​របស់​តំណាងរាស្ត្រ​បក្ស​ប្រឆាំង​ ចំពោះ​ករណី​លោក ​សម រង្ស៊ី​ ដែល​ត្រូវ​បាន​គេ​ផ្សព្វផ្សាយ​នៅ​ចុង​សប្តាហ៍​នេះ​ដែរ​ ប្រមុខ​រដ្ឋាភិបាល​បក្ស​កាន់​អំណាច​បាន​បញ្ជាក់​ថា ​ករណី​លោក​សម រង្ស៊ី ​គឺជា​រឿង​ផ្លូវ​ច្បាប់​ មិន​មែន​ជា​រឿង​នយោបាយ​ឡើយ។​ លោក​នាយក​រដ្ឋមន្ត្រី​ ហ៊ុន សែន​ ដែល​ហៅ​លោក ​សម រង្ស៊ីថា​ជា ​«ទណ្ឌិត»​នោះ​ បាន​ចោទ​មេដឹកនាំ​បក្ស​ប្រឆាំង​ថា​ បាន​ប្រព្រឹត្ត​អំពើ​ខុស​ឆ្គង​ ដូច​ដែល​មាន​ក្នុង​សាលក្រម ​និង​សាលដីកា​របស់​តុលាការ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI