អានតួអត្ថបទ
កម្ពុជា

យុវជន​គណបក្ស​សមរង្ស៊ី​ប្តឹង​នាយក​រដ្ឋមន្ត្រី​ហ៊ុន សែន ចំពោះ​ហេតុការណ៍​មនុស្ស​ស្លាប់​នៅ​កោះពេជ្រ

ហេតុការណ៍​​​ផ្អើល​រត់ជាន់​គ្នា​លើ​ស្ពាន​កោះពេជ្រ កាល​ពី​បុណ្យ​អុំទូក ឆ្នាំ​២០១០ បណ្តាល​ឲ្យ​ស្លាប់​មនុស្ស​​​យ៉ាង​តិច ៣៤៥នាក់​
ហេតុការណ៍​​​ផ្អើល​រត់ជាន់​គ្នា​លើ​ស្ពាន​កោះពេជ្រ កាល​ពី​បុណ្យ​អុំទូក ឆ្នាំ​២០១០ បណ្តាល​ឲ្យ​ស្លាប់​មនុស្ស​​​យ៉ាង​តិច ៣៤៥នាក់​ ©Reuters
ដោយ៖ លី ម៉េងហួរ
៣៣ នាទី

​នៅ​ព្រឹក​ថ្ងៃ​សុក្រ ទី​៣០ ខែ​វិច្ឆិកា​នេះ ប្រធាន​ចលនា​យុវជន​របស់​គណបក្ស សម រង្ស៊ី លោក សួង សុភ័ណ្ឌ បាន​ដាក់​ពាក្យបណ្តឹង ទៅកាន់​តុលាការ​ក្រុងភ្នំពេញ ប្តឹង​លោក​នាយករដ្ឋមន្ត្រី ហ៊ុន សែន ពីបទ​មនុស្សឃាត​គិតទុក​ជាមុន​។ ពាក្យបណ្តឹង ដែល​ក្រឡាបញ្ជី​បាន​បោះត្រា​ទទួលយក​នោះ បាន​ចោទប្រកាន់​ថា លោកនាយក​រដ្ឋមន្ត្រី ហ៊ុន សែន ជា​អ្នកទទួលខុសត្រូវ ក្នុង​ហេតុការណ៍ មនុស្ស​ផ្អើល​រត់​ជាន់គ្នា​ស្លាប់ នៅ​យប់​បង្ហើយ នៃ​ពិធី​បុណ្យ​អុំទូក កាលពី​យប់​ថ្ងៃ​ទី​២២ ខែវិច្ឆិកា ឆ្នាំ​២០១០​។ ចំពោះ​មន្ត្រី​រដ្ឋាភិបាល បាន​ច្រានចោល​ការចោទប្រកាន់ ហើយ​ចាត់​ទុក​ពាក្យបណ្តឹង​នោះ ថា​ជា​ការប្រមាថ​លើ​កិត្តិយស​របស់​ប្រមុខ​រដ្ឋាភិបាល​។ រដ្ឋាភិបាល​ក៏​អាចនឹងប្តឹង​បក​ប្រឆាំង​នឹង​ប្រធាន​ចលនា​យុវជន​គណបក្ស សម រង្ស៊ី ផងដែរ​។​

ផ្សាយពាណិជ្ជកម្ម

ពាក្យបណ្តឹង​របស់​ប្រធាន​ចលនា​យុវជន​គណបក្ស​សម​រង្ស៊ី លោក សួង សុភ័ណ្ឌ ប្រឆាំងនឹង​លោកនាយក​រដ្ឋមន្ត្រី ត្រូវបាន​ក្រឡាបញ្ជី​ទទួលយក កាលពី​ព្រឹក​ថ្ងៃទី​៣០ ខែវិច្ឆិកា ឆ្នាំ​២០១២។​

 
​បន្ទាប់ពី​ដាក់​ពាក្យបណ្តឹង​នៅ​តុលាការ នា​ព្រឹក​មិញ លោក សួង សុភ័ណ្ឌ បាន​ថ្លែង​ទៅកាន់​ក្រុមអ្នកកាសែត​ថា លោក​ប្តឹង​ចោទប្រកាន់​លោកនាយក​រដ្ឋមន្ត្រី ហ៊ុន សែន ពី​បទ​មនុស្សឃាត​គិតទុក​ជាមុន ចំពោះ​ព្រឹត្តិការណ៍​នៅ​យប់​ថ្ងៃទី​៣ នៃ​ពិធី​បុណ្យ​អុំទូក ថ្ងៃទី​២២ ខែវិច្ឆិកា ឆ្នាំ​២០១០ នៅ​ស្ពាន​កោះ​ពេជ្រ ដែល​បាន​សម្លាប់​មនុស្ស ៣៥៣ នាក់ និង​របួស​ជាង ៤០០ នាក់ ដោយសារតែ​លោកនាយក​រដ្ឋមន្ត្រី ជា​អ្នកគ្រប់គ្រង​ប្រទេស តែ​មិន​បាន​អើពើ នាំឲ្យ​មាន​ហេតុការណ៍​សោកនាដក​ម្ម​នោះ​កើតឡើង​។​

​លោក សួង សុភ័ណ្ឌ​៖ “​យើង​ឃើញថា ការរៀបចំ​បុណ្យជាតិ និង​ការគ្រប់គ្រង​ស្ថានការណ៍​ទាំងអស់នោះ លោកនាយក​រដ្ឋមន្ត្រី ហ៊ុន សែន គឺជា​អ្នកគ្រប់គ្រង​។ លោក ហ៊ុន សែន គឺជា​អ្នកគ្រប់គ្រង​ស្ថានការណ៍​ទាំងអស់នោះ​។ ប៉ុន្តែ​លោក ហ៊ុន សែន គាត់​បាន​បណ្តោយ​ឲ្យ​ស្ថានការណ៍​នោះ សម្លាប់​មនុស្ស​យ៉ាង​ច្រើន​នាក់ រាប់រយ​នាក់ រាប់ពាន់នាក់​។ ដូច្នេះ ក្នុងនាម​ខ្ញុំ​ជា​យុវជន ក្នុងនាម​ខ្ញុំ ដែល​ប្រកាន់​គោលជំហរ​ស្រលាញ់​យុវជន ប្រកាន់​គោលជំហរ​ដើម្បី​យុវជន គឺ​យើង​មិន​អាច​បណ្តោយ​ឲ្យ​ស្ថានការណ៍​នេះ យក​ទៅ​លាក់ទុក ជាពិសេស​លោក​នាយករដ្ឋមន្ត្រី ហ៊ុន សែន បាន​លើក​ឡើង​ច្បាស់​ណាស់​ថា នឹង​យក​ថ្ងៃទី​២២​វិច្ឆិកា ២០១០ ជា​ថ្ងៃ​បុណ្យ​ជាតិ ហើយ​មួយវិញទៀត លោក​បាន​លើកឡើង​ថា នឹង​គោរព​ជា​រៀងរាល់ឆ្នាំ​។ ប៉ុន្តែ​ផ្ទុយទៅវិញ យើង​ឃើញ​ពីរ​ឆ្នាំ​កន្លងមកនេះ គ្មាន​ការគោរព​វិញ្ញាណក្ខន្ធ ដែល​លោកនាយក​រដ្ឋមន្ត្រី ដែលជា​អ្នក​រៀបចំ​សោះឡើយ​"​។​

​លោក សួង សុភ័ណ្ឌ ក៏​បាន​បញ្ជាក់ថា លោក​បាន​ភ្ជាប់​ជាមួយ​ពាក្យបណ្តឹង​នូវ​ភស្តុតាង​ជា​រូបថត និង​ខ្សែ​វីដេអូ ជាដើម ដែល​បង្ហាញ​ពី​អំពើ​មនុស្សឃាត​គិតទុក​ជាមុន លើ​អ្នក​ស្លាប់​នៅលើ​ស្ពាន​កោះ​ពេជ្រ កាលពី​ពីរ​ឆ្នាំមុន រួមមាន​៖ អាជ្ញាធរ​បណ្តោយ​ឲ្យមាន​មនុស្ស​ស្លាប់ អាជ្ញាធរ​បិទផ្លូវ ហើយ​បាញ់​ទឹក​លើ​ជនរងគ្រោះ នាំ​ឲ្យ​ថប់ដង្ហើម​ស្លាប់ ដោយ​មិន​ជ្រើស​យក​វិធានការ​ជួយ​សង្គ្រោះ​ផ្សេង តាមរយៈ​ការ​កាត់​បង្កាន់ដៃស្ពាន ឬ​ក៏​ប្រើ​ឧទ្ធម្ភាគចក្រ ជាដើម​។​

​ចំពោះ​សំនួរ​ថា ហេតុការណ៍​នៅ​កោះ​ពេជ្រ បាន​រំលង​ផុតពីរ​ឆ្នាំ​ទៅ​ហើយ ហេតុ​អ្វី​ទើប​លោក សួង សុភ័ណ្ឌ ដាក់​ពាក្យបណ្តឹង ទៅ​តុលាការ នៅពេលនេះ​?​។ លោក សួង សុភ័ណ្ឌ ឆ្លើយតប​ថា លោក​ទុកពេល​ប្រមូល​ភស្តុតាង និង​រង់ចាំ​មើល​ចំណាត់ការ​របស់​រដ្ឋាភិបាល លើ​ករណី​នោះ​។

​លោក សួង សុភ័ណ្ឌ បានបញ្ជាក់​ថា "​ខ្ញុំ​រង់ចាំ​អស់ពីរ​ឆ្នាំ​ហើយ​។ រង់ចាំ​ឲ្យ​រដ្ឋាភិបាល ក៏ដូចជា​លោក ហ៊ុន សែន ចាត់វិធានការ​។ ប៉ុន្តែ​ផ្ទុយទៅវិញ លោក ហ៊ុន សែន បាន​ចាត់វិធានការ​រៀបចំ​គណៈ​កម្មា​ធិ​ការបែ​បឡមៗ​។ រៀបចំ​គណៈកម្មាធិការ​គ្នាឯង ហើយ​ស៊ើបអង្កេត ហើយ​លើសពីនេះ​ទៀត លោកនាយក​រដ្ឋមន្ត្រី ហ៊ុន សែន បាន​ជំទាស់​រាល់​សំណូមពរ​របស់​អង្គការ​សង្គម​ស៊ីវិល​ជាតិ និង​អន្តរជាតិ ក្នុងករណី​ស៊ើបអង្កេត​លើ​ករណី​កោះ​ពេជ្រ​។ ដូច្នេះ​យើង​មើល​រូបភាព គឺ​ឃើញថា លោក ហ៊ុន សែន កំពុង​តែ​ព្យាយាម​លុបបំបាត់​ក៏ដូចជា​ឲ្យ​ភ្លេច​ករណី​កោះ​ពេជ្រ​នេះ​"​។​

​ចំពោះ​ការដាក់​ពាក្យបណ្តឹង​ខាងលើនេះ ត្រូវបាន​លោក ទិត សុធា អនុប្រធាន​អង្គភាព​ព័ត៌មាន និង​ប្រតិកម្ម​រហ័ស របស់​ទីស្តីការគណៈរដ្ឋមន្ត្រី បាន​ព្រមាន​ថា ប្រសិនបើ​ការប្តឹង​ចោទប្រកាន់​នោះ មិន​មាន​ភស្តុតាង​ច្បាស់លាស់ រដ្ឋាភិបាល ពិសេស​លោក​នាយករដ្ឋមន្ត្រី មាន​សិទ្ធិ ក្នុង​ការពារ​នូវ​កិត្តិយស​របស់​ខ្លួន ដើម្បី​នឹង​ប្តឹង​បក​វិញ​។​

​លោក ទិត សុធា បាន​បន្ថែមថា "​នេះ​ជា​ការយក​កិត្តិយស និង​ជា​ការ​ជាន់ឈ្លី​កិត្តិយស​របស់​ប្រមុខ​រាជរដ្ឋាភិបាល តាមរយៈ​កម្សោយ​​នៃ​ជីវិត​នយោបាយ​របស់​ក្រុម​ខ្លួន មក​ភ្ជាប់​បញ្ហា ទម្លាក់កំហុស​មកលើ​រដ្ឋាភិបាល ដែល​ជា​អ្នករក្សា​នូវ​ស្ថិរភាព​សង្គម ហើយ​រាជរដ្ឋាភិបាល​យកចិត្ត​ខ្ពស់ ក្នុង​ការដោះស្រាយ នៅពេល​មាន​ឧបទ្ទវហេតុ​ចៃដន្យ នៅ​កោះ​ពេជ្រ​នោះ​កើតឡើង​។ រដ្ឋាភិបាល មាន​​វិធានការ ជា​បន្តបន្ទាប់ និង​មាន​ការសោកស្តាយ​ជុំវិញ​គ្រោះថ្នាក់ ដែល​កើតឡើង ជា​យថាហេតុ​នោះ​។ មិន​គួរ​ត្រូវ​បាន​ក្រុមយុវជន នៃ​គណបក្ស​ប្រឆាំង​យក​សាកសព​របស់​ពល​រដ្ឋ​រងគ្រោះ មក​ធ្វើជា​ល្បែង​នយោបាយ ដើម្បី​ភាព​ឡប់ឡែ​របស់ខ្លួន​នោះ​ទេ​។ ម្យ៉ាងទៀត ការ​ធ្វើ​អ្វីមួយ ត្រូវ​ស្ថិត​នៅក្នុង​ក្របខណ្ឌ​នៃ​ច្បាប់ ដែល​ត្រូវ​គិត​អំពី​កិត្តិយស​របស់​អ្នកដទៃ​ផង​"​។​

​បន្ទាប់ពី​ដាក់​ពាក្យបណ្តឹង​ប្រឆាំងនឹង​លោក​នាយក​រដ្ឋ​ម​ន្រី្ត នៅថ្ងៃនេះ ប្រធាន​ចលនា​យុវជន​គណបក្ស​សម​រង្ស៊ី ក៏​គ្រោង​នឹង​ដាក់​ពាក្យបណ្តឹង​ដូចគ្នានេះដែរ ប្រឆាំងនឹង​លោក គង់ សំអុល រដ្ឋមន្ត្រី​ព្រះបរមរាជវាំង និង​ជា​ប្រធាន​គណៈកម្មាធិការ​ជាតិ​រៀបចំ​បុណ្យជាតិ និង​អន្តរជាតិ ព្រមទាំង​លោក ទូច ណារ៉ុថ អតីត​ស្នងការ​ប៉ូលិស​ក្រុងភ្នំពេញ និង​លោក កែប ជុតិមា អភិបាលក្រុង​ភ្នំពេញ ក្នុង​រឿងហេតុ ដែល​នាំឲ្យ​មាន​មនុស្ស​ស្លាប់ នៅ​កោះ​ពេជ្រ ក្នុង​យប់​បង្ហើយ​នៃ​ពិធី​បុណ្យ​អុំទូក កាលពី​ថ្ងៃ​ទី​២២​វិច្ឆិកា ឆ្នាំ​២០១០​។​

​លោក សួង សុភ័ណ្ឌ បាន​បន្ថែមថា នៅ​ខែ​ធ្នូ​ខាង​មុខ​ឆាប់ៗ​នេះ លោក​នឹង​ធ្វើដំណើរ​ទៅកាន់​ប្រទេស​ហូ​ឡង់ ដើម្បី​ដាក់​ពាក្យបណ្តឹង​ដូចគ្នា ទៅកាន់​តុលាការ​យុត្តិធម៌​អន្តរជាតិ ទី​ក្រុង​ឡាអេ ប្រឆាំងនឹង​លោកនាយក​រដ្ឋមន្ត្រី ហ៊ុន សែន ក្នុងរឿងមនុស្សស្លាប់ នៅកោះពេជ្រ​។​

​មេដឹកនាំ​ចលនា​យុវជន​គណបក្ស សម រង្ស៊ី ក៏​បាន​បញ្ជាក់ថា លោក​មិន​ខ្លាច​ញញើត​នឹង​ការប្តឹងប​ក​របស់​លោក​នាយករដ្ឋមន្ត្រី ប្រឆាំង​រូបលោក​វិញ ដូច​ករណី​លោក​ស្រី មូរ សុខ​ហួរ អ្នកតំណាងរាស្ត្រ​គណបក្ស សម រង្ស៊ី កាលពី​ឆ្នាំ​២០០៩ ឡើយ​៕​

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ