អានតួអត្ថបទ
ស៊ីរី

សេចក្តីព្រាង​សេចក្តីសម្រេច​របស់​ក្រុមប្រឹក្សា​សន្តិសុខ​ទាមទារ​ឲ្យ​លោក​អាសាដ​ចុះ​ពី​តំណែង

ក្រុមប្រឹក្សា​សន្តិសុខ​អ.ស.ប.​
ក្រុមប្រឹក្សា​សន្តិសុខ​អ.ស.ប.​ Mario Tama/Getty Images
ដោយ៖ សេង ឌីណា
១៩ នាទី

កាលពី​ល្ងាច​ថ្ងៃ​សុក្រ ២៧ មករា ម្សិលមិញ​នេះ ក្រុមប្រឹក្សា​សន្តិសុខ​អ.ស.ប.​បាន​បើក​កិច្ចប្រជុំ នៅ​ទីក្រុង​ញូវយ៉ក ដើម្បី​ពិភាក្សា​គ្នា​លើ​ដំណោះស្រាយ​វិបត្តិ​ស៊ីរី ដែល​ស្នើ​ឡើង​ដោយ​សម្ព័ន្ធ​អារ៉ាប់។ ផែនការ ដែល​ស្នើ​ឡើង​តាមរយៈ​ប្រទេស​ម៉ារ៉ុក ទាមទារ​ឲ្យ​លោក​​បាស្ហា អាល់​អាសាដ ចុះចេញ​ពីតំណែង ដើម្បី​បើក​ផ្លូវ​ឲ្យ​មាន​ដំណោះស្រាយ​នយោបាយ បញ្ចប់​អំពើ​ហិង្សា​នៅ​ស៊ីរី។ រុស្ស៊ីបាន​ជំទាស់​យ៉ាង​ដាច់អហង្ការ​ចំពោះ​សេចក្តីព្រាង​នេះ។

ផ្សាយពាណិជ្ជកម្ម

ដោយ​មិន​អាច​បញ្ចប់​​អំពើ​ហិង្សា​នៅ​ស៊ីរី​បាន សម្ព័ន្ធ​អារ៉ាប់​បាន​សម្រេច​បញ្ជូន​សំណុំរឿង​ស៊ីរី ទៅ​ឲ្យ​ក្រុមប្រឹក្សា​សន្តិសុខ​វិញម្តង។ ដំណោះស្រាយ ដែល​កើតចេញ​ពី​ការផ្តួចផ្តើម​គំនិត​របស់​សម្ព័ន្ធអារ៉ាប់ ត្រូវ​បាន​បញ្ជូន​ទៅកាន់​ក្រុមប្រឹក្សា​សន្តិសុខ តាមរយៈ​ប្រទេស​ម៉ារ៉ុក ដែល​ជា​សមាជិក​សម្ព័ន្ធ​អារ៉ាប់ និង​ជា​សមាជិក​មិនអចិន្រ្តៃយ៍​នៃ​ក្រុមប្រឹក្សា​សន្តិសុខ។

សម្ព័ន្ធ​អារ៉ាប់​ចង់​ឲ្យ​​ក្រុមប្រឹក្សា​សន្តិសុខ​អនុម័ត​សេចក្តីសម្រេច​មួយ ដើម្បី​បង្ខំ​ឲ្យ​លោក​បាស្ហា​ អាល់អាសាដ ចុះចេញ​ពី​តំណែង ហើយ​ផ្ទេរ​អំណាច​ទៅ​ឲ្យ​អនុប្រធានាធិបតី​ស៊ីរី។ បន្ទាប់​មក ក្នុងរយៈពេល​២ខែ​យ៉ាងយូរ អនុប្រធានាធិបតីស៊ីរី ត្រូវ​បង្កើត​រដ្ឋាភិបាល​រួបរួម​ជាតិមួយ ដែល​​មាន​ការ​ចូលរួម​ពី​សំណាក់​​ក្រុមប្រឆាំង។ ក៏ប៉ុន្តែ សេចក្តីព្រាង ដែល​ស្នើ​ឡើង​ដោយ​ប្រទេស​ម៉ារ៉ុក​នេះ មិនមាន​និយាយ​អំពី​អន្តរាគមន៍​យោធា នៅ​ស៊ីរី​នោះទេ។

នៅថ្ងៃ​អង្គារ តំណាង​សម្ព័ន្ធ​អារ៉ាប់​នឹង​ទៅឆ្លើយ​បំភ្លឺ នៅ​ចំពោះ​មុខ​ក្រុមប្រឹក្សា​សន្តិសុខ អំពី​​លទ្ធផល​នៃ​បេសកកម្ម​របស់​ក្រុម​អ្នក​សង្កេតការណ៍​នៅ​ស៊ីរី។ ឯកអគ្គរាជទូត​អង់គ្លេស​ប្រចាំ​អ.ស.ប.​បាន​ឲ្យដឹង​ថា ក្រុមប្រឹក្សា​សន្តិសុខ​អាច​នឹង​យក​​សេចក្តីព្រាងនេះ ទៅ​ប្រជុំ​អនុម័ត នៅថ្ងៃ​ពុធ។

ក៏ប៉ុន្តែ រុស្ស៊ី ដែល​ជា​សមាជិក​អចិន្រ្តៃយ៍​ បានព្រមាន​ថា ខ្លួន​នឹង​ជំទាស់​នឹង​រាល់​សេចក្តីសម្រេច​ណា ដែល​ទាមទារ​ឲ្យ​លោក​អាសាដ​ចុះចេញ​ពី​តំណែង ឬ​មាន​ចែង​អំពី​ទណ្ឌកម្ម​លើ​ស៊ីរី។

គួរ​រំឭក​ឡើងវិញ​ថា កាល​ពី​ខែ​តុលា រុស្ស៊ី រួមជាមួយ​នឹង​ចិន បាន​ប្រើ​សិទ្ធិវ៉េតូ​ម្តង​រួចមកហើយ លើ​សេចក្តីសម្រេច​ចិត្ត​របស់​ក្រុមប្រឹក្សា​សន្តិសុខ ដែល​ថ្កោលទោស​រដ្ឋាភិបាល​ស៊ីរី ជុំវិញ​ការ​ប្រើ​កម្លាំង​បង្ក្រាប​បាតុកម្ម។

ស៊ីរី គឺ​ជា​សម្ព័ន្ធមិត្ត​ដ៏ជិតស្និទ្ធ​របស់​រុស្ស៊ី នៅ​ក្នុង​តំបន់​ដើមបូព៌ា។ រុស្ស៊ី​មាន​កំពង់ផែ​សម្រាប់​នាវា​ចម្បាំង នៅ​ស៊ីរី។ ស៊ីរី គឺ​ជា​អតិថិជន​ដ៏សំខាន់​នៃ​ទីផ្សារ​គ្រឿង​សព្វាវុធ​រុស្ស៊ី។ ស៊ីរី​ទិញ​គ្រឿង​សព្វាវុធ​ពី​រុស្ស៊ី គិត​ជា​ទឹកប្រាក់​ប្រមាណ​ជា ៧០០​លាន​ដុល្លារ ក្នុង​មួយ​ឆ្នាំៗ។ កាលពីពេល​ថ្មីៗ​នេះ រុស្ស៊ី​ទើប​នឹង​ចុះ​កិច្ចសន្យា​លក់​យន្តហោះ​ចម្បាំង​ចំនួន ៣៥​គ្រឿង (៥៥០លាន​ដុល្លារ) ទៅ​ឲ្យ​ស៊ីរី៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ