អានតួអត្ថបទ
កម្ពុជា

គណ​បក្សសង្គ្រោះ​ជាតិ​រឹត​បន្តឹង​សន្តិ​សុខនៅ​ថ្ងៃអាទិត្យ​នេះ​

ក្រុម​អ្នក​ចូលរួម​ មហាបាតុកម្ម របស់​គណបក្ស​សង្គ្រោះជាតិ ក្នុង​ពេល​កន្លងទៅ​
ក្រុម​អ្នក​ចូលរួម​ មហាបាតុកម្ម របស់​គណបក្ស​សង្គ្រោះជាតិ ក្នុង​ពេល​កន្លងទៅ​ RFI/Siv Channa
ដោយ៖ ស៊ុន មេសា
១៥ នាទី

នៅ ថ្ងៃអាទិត្យ​ទី២២ធ្នូ​នេះ អ្នកគាំទ្រ​គណបក្ស​សង្គ្រោះ​ជាតិ​ បានបង្ហាញ​វត្តមាន​កាន់តែច្រើន​នៅលើ​ទីលាន​ប្រជាធិបតេយ្យ។ ដោយ​ចាត់ទុកថា ការជួបជុំ​ថ្ងៃអាទិត្យ​នេះ គឺជា​ថ្ងៃ​មហា​បាតុកម្ម​ធំ គណបក្ស​សង្គ្រោះ​ជាតិ​ក៏បាន​បង្កើន​កំលាំង រឹតបន្តឹង​សន្តិសុខ​ជាង​សព្វដង។ ទោះយ៉ាងណា​ក៏ដោយ មន្ត្រី​គណបក្ស​សង្គ្រោះ​ជាតិ បាន​អំពាវនាវ​អោយ​បាតុករ​របស់ខ្លួន​​ប្រកាន់​គោលការណ៍​អហិង្សា។

ផ្សាយពាណិជ្ជកម្ម

គណបក្ស​សង្គ្រោះ​ជាតិ​ប្រកាស​រឹតបន្តឹង​សន្តិសុខ​ដោយ​បង្កើន​កំលាំង​ផ្នែក​សន្តិសុខ​ជាង​១៥០០នាក់ ដើម្បី​ផ្តល់​សន្តិសុខ​ដល់​ក្រុមបាតុករ ដែល​បាន​កើនឡើង​ នៅ​ថ្ងៃអាទិត្យ​នេះ។ នេះ​បើតាម​ការបញ្ជាក់​របស់​លោក ហូរ វ៉ាន់ តំណាងរាស្ត្រ​មណ្ឌល​ភ្នំពេញ និង​ជា​អ្នកទទួល​ខុស​ត្រូវ​ផ្នែក​សន្តិសុខ​របស់​គណបក្ស​សង្គ្រោះ​ជាតិ។

គណបក្ស​សង្គ្រោះ​ជាតិ​ត្រូវ​បង្កើន​សន្តិសុខ​ផ្ទៃក្នុង បន្ទាប់ពី​លោកនាយក​រដ្ឋមន្ត្រី​ហ៊ុន សែន ទើបតែ​ព្រមាន​គណបក្ស​សង្គ្រោះ​ជាតិ​អំពី​វត្តមាន​នៃ​ភាគី​ទី៣ ដែល​អាច​បង្កបញ្ហា​អសន្តិសុខ។ ថ្លែងប្រាប់​វិទ្យុ​បារាំង​អន្តរជាតិ​នៅ​ទីលាន​ប្រជាធិបតេយ្យ​ផ្ទាល់​នៅ​ព្រឹក​ថ្ងៃអាទិត្យ​នេះ លោក ហូរ វ៉ាន់​បានបញ្ជាក់​ពី​មូល​ហេតុនៃ​ការពង្រឹង​សន្តិសុខ​នេះ ថា​ដោយសារតែ​ថ្ងៃអាទិត្យ​នេះ បាតុ​ករ​​របស់​គណបក្ស​សង្គ្រោះ​ជាតិ​បាន​កើនឡើង​យ៉ាងច្រើន​ខុសពី​ថ្ងៃ​ធម្មតា។ ហើយ​មួយ​វិញ​ទៀត ​គណបក្ស​ស​ង្គ្រោះ​ជាតិ ព្រួយ​បារ​ម្មណ៍​ពី​ការបង្ក​ចលាចល​របស់​ក្រុម​ឱកាសនិយម។

លោក ហូរ វ៉ាន់ បាន​បញ្ជាក់ថា ក្រុម​សន្តិសុខ​របស់លោក​ទាំង១៥០០នាក់​នេះ គឺជា​ក្រុម​យុវជន​​ស្ម័គ្រចិត្ត និង​កងកម្លាំង​សន្តិសុខ​របស់​គណបក្ស ដែល​ក្រុម​សន្តិសុខ​ទាំងនេះ គឺ​នៅ​តាម​​បណ្តា​ខ័​ណ្ឌ​​ក្នុង​រាជធានី​ភ្នំពេញ។

ដោយសារតែ​ថ្ងៃអាទិត្យ​នេះ​ជា​ថ្ងៃ​ជួបជុំ​ធំ លោក​សម រង្ស៊ី និង​លោក​កឹម សុខា​ បានមក​ជួប​អ្នកគាំទ្រ​របស់ខ្លួន​តាំងពី ម៉ោង១១ព្រឹក។ បែបណាក៏ដោយ ក្នុងការ​ថ្លែង​ទៅកាន់​ក្រុមបាតុករ​ដែល​មកជួប​ជុំគ្នា​ប្រមាណ​ជាង២ម៉ឺន​នាក់​ នៅ​ថ្ងៃអាទិត្យ​នេះ គណបក្ស​សង្គ្រោះ​ជាតិ បាន​អំពាវនាវ​ឱ្យ​ក្រុមបាតុករ​ទាំងអស់ ​ត្រូវ​ប្រកាន់​ធម៌​អហិង្សា​ ដោយ​ស្រែក​ពាក្យ​ថា”អហិង្សា​ទាំង​អស់គ្នា” ខណៈដែល​ក្បួន​បាតុកម្ម​របស់​គណបក្ស​នឹង​ដង្ហែ​​ពេញទី​ក្រុង​សាជាថ្មី​ម្តងទៀត​ នៅ​ថ្ងៃនេះ។ គម្រោង​ក្បួន​បាតុកម្ម​របស់​គណបក្ស​សង្គ្រោះ​ជាតិ​ដែល​ដឹកនាំ​ដោយ លោក សម រង្ស៊ី និង​លោក​កឹម​ សុខា ​ចេញដំណើរ​ដឹកនាំ​បាតុក​ម្ម​នៅ​ម៉ោង​ប្រមាណ​ជាង​២រសៀល​​ ដោយ​ឆ្លងកាត់​ផ្លូវ​មួយចំនួន​ក្នុង​ក្រុងភ្នំពេញ។

ទាក់ទង​នឹង​បញ្ហា​សន្តិសុខ​នេះ មន្ត្រី​អង្គការ​សិទ្ធិមនុស្ស​អា​ហុក ​ដែល​បាន​តាមដាន​នៅ​ទីលាន​ប្រជា​ធិ​ប​តយ្យ​ជាប្រចាំ​នោះ បាន​ស្នើឱ្យ​គ្រប់ភាគី​ទាំង​អស់ទាំង​រដ្ឋាភិបាល និង​គណបក្ស​សង្គ្រោះ​ជាតិ ​ត្រូវ​សហការ​គ្នា​ដើម្បី​រក្សា​សន្តិសុខ និង​សណ្តាប់ធ្នាប់​ល្អ​ជូន​​ពលរដ្ឋ និង​សង្គម​ទាំងមូល៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ