កម្ពុជា

នគរបាល​សណ្តាប់​ធ្នាប់​នៅ​ព្រះវិហារ​​ត្រូវ​អនុញ្ញាត​អោយ​មក​បោះឆ្នោត​សិន​

កម្លាំង​នគរបាល​សណ្តាប់ធ្នាប់​​​​​ប្រមាណ​៣០០​នាក់​​កំពុង​ប្រចាំការ​នៅ​តំបន់​ព្រំដែន​ប្រាសាទ​ព្រះវិហារ​
កម្លាំង​នគរបាល​សណ្តាប់ធ្នាប់​​​​​ប្រមាណ​៣០០​នាក់​​កំពុង​ប្រចាំការ​នៅ​តំបន់​ព្រំដែន​ប្រាសាទ​ព្រះវិហារ​ RFI/Leang Delux

អគ្គ​​ស្នងការ​ដ្ឋាន​​នគរបាល​​ជាតិ​ ​​បាន​​រៀបចំ​​បញ្ជូន​​បុគ្គលិក​​នគរបាល​​សណ្តាប់ធ្នាប់​​ដែល​​ជាប់​​បេសកកម្ម​​ក្នុង​​តំបន់​​ព្រំដែន​​ព្រះវិហារ​​អោយ​​មក​​ស្រុក​​កំណើត​​របស់​​ពួក​គេ​​វិញ​​នៅ​ថ្ងៃ​នេះ​​ដើម្បី​​អនុញ្ញាត​​អោយ​​ពួក​គេ​​បាន​​បោះឆ្នោត​​នៅ​​ថ្ងៃ​​អាទិត្យ។​ ក៏​​មាន​​ដែរ​​កម្លាំង​​ដែល​​មាន​​លំនៅ​​អចិន្ត្រៃយ៍​​នៅ​​ក្បែរ​​ព្រំដែន​ហើយ​​ពួក​គេ​​ត្រូវ​​បោះឆ្នោត​​តាម​​ធម្មតា​​នៅ​​តាម​​ការិយាល័យ​​បោះ​ឆ្នោត​​នៅ​ក្នុង​​មូលដ្ឋាន​​នោះ។​  

ផ្សាយពាណិជ្ជកម្ម

 

មាន​កម្លាំង​នគរបាល​សណ្តាប់ធ្នាប់​យ៉ាង​ហោច​ណាស់​ ៣០០នាក់​​ដែល​កំពុង​ប្រចាំការ​នៅ​តំបន់​ព្រំដែន​ប្រាសាទ​ព្រះវិហារ ត្រូវ​អគ្គស្នងការដ្ឋាន​នគរបាល​ជាតិ​អនុញ្ញាតិ​អោយ​ពួកគេ​ត្រឡប់​មក​គេហដ្ឋាន​វិញ​ដែល​នៅ​តាម​ខេត្ត​និង​រាជធានី​ដើម្បី​ពួកគេ​បាន​បោះឆ្នោត​នៅ​ថ្ងៃ​អាទិត្យ​​ទី​​៣​​មិថុនា​​​ខាន​ស្អែក​​នេះ។ ​នេះ​​បើ​តាម​​ការ​​បញ្ជាក់​​របស់​​លោក​​ឧត្តមសេនីយឯក​​គៀត ​ចន្ទ​ថារិទ្ធ​ ​​អ្នក​នាំពាក្យ​អគ្គស្នងការដ្ឋាន​នគរបាល​ជាតិ។

មន្ត្រី​ជាន់ខ្ពស់​នគរបាល​ជាតិ​បាន​បន្ត​ថា ក្រោយ​ពី​ការ​បោះឆ្នោត​ចប់ កំលាំង​នគរបាល​សណ្តាប់ធ្នាប់ទាំងជាង៣០០នាក់​នឹង​ត្រូវ​ដឹក​បញ្ជូន​ទៅ​តំបន់​ប្រចាំការ​នៅ​ព្រំដែន​ប្រាសាទ​ព្រះវិហារ​វិញ។
នេះ​គឺ​ចំពោះ​បុគ្គលិក​នគរបាល​ដែល​ត្រូវ​បាន​បញ្ជូន​ពី​ខេត្ត និង​រាជធានី​ភ្នំពេញ។ តាម​ការ​អះអាង​របស់​លោក​ឧត្តមសេនីយ​ឯក​គៀត ចន្ទថារិទ្ធ​ដដែល បុគ្គលិក​នគរបាល​ដែល​មាន​គេហដ្ឋាន​នៅ​ក្នុង​តំបន់​ព្រំដែន​នោះ ពួកគេ​នឹង​ចូលរួម​បោះឆ្នោត​ក្នុង​ការិយាល័យ​បោះឆ្នោត​ក្នុង​ឃុំ​មូលដ្ឋាន​របស់​ពួកគេ​នៅ​ទី​នោះ។

គួរបញ្ជាក់ថា ចាប់​ពី​មាន​ចរចារ​ដើម្បី​ដាក់​កម្លាំង​សន្តិសុខ​សណ្តាប់ធ្នាប់ ដែល​មិនមែន​ជា​កងទ័ព​ប្រដាប់​អាវុធ​នៅក្នុង​តំបន់​ព្រំដែន​ប្រាសាទ​ព្រះវិហារ​នោះ កម្ពុជា​បាន​ត្រៀម​កម្លាំង​នគរបាល​​សណ្តាប់ធ្នាប់​ជាច្រើននិង​បាន​ចាប់ផ្តើម​ឈរ​ជើង​ប្រចាំការ​រួចហើយ​នៅ​ក្នុង​តំបន់​ប្រាសាទ​ព្រះវិហារ​នោះ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI