អានតួអត្ថបទ
កូរ៉េខាងជើង-កូរ៉េ​ខាង​ត្បូង

មេចារកិច្ច​កូរ៉េ​ខាង​ត្បូង៖ កូរ៉េ​ខាង​ជើង​នឹង​ធ្វើការ​វាយប្រហារ​ជាថ្មី​ទៀត

ទាហាន​កូរ៉េ​ខាង​ត្បូង​កំពុង​​ដាក់​របងលួសបន្លា​នៅ​លើ​កោះ Yeonpyeong ជិត​ឆ្នេរ​កូរ៉េ​ខាង​ជើង
ទាហាន​កូរ៉េ​ខាង​ត្បូង​កំពុង​​ដាក់​របងលួសបន្លា​នៅ​លើ​កោះ Yeonpyeong ជិត​ឆ្នេរ​កូរ៉េ​ខាង​ជើង ©Reuters
ដោយ៖ សេង ឌីណា
២២ នាទី

នាយក​ទីភ្នាក់ងារ​ស៊ើបការណ៍​សម្ងាត់​កូរ៉េ​ខាង​ត្បូង​បាន​ប្រាប់​ គណៈកម្មាធិការ​សភា​កូរ៉េ​ខាង​ត្បូង​ថា កូរ៉េ​ខាង​ជើង​អាច​នឹង​ធ្វើ​ការវាយប្រហារ​សាជាថ្មី​ទៀត​មក​លើ​កូរ៉េ​ខាង​ ត្បូង។ ព្រមពេល​ជាមួយ​គ្នា​នេះ កូរ៉េ​ខាង​ត្បូង​ក៏​បាន​ប្រកាស​ឲ្យដង​ផងដែរ​ថា​នឹង​រៀបចំ​ធ្វើ​សមយុទ្ធ​ ថ្មីៗ​ទៀត​ជាមួយ​កងទ័ព​អាមេរិក។ ចិនវិញ បាន​អំពាវនាវ​ម្តងទៀត​ឲ្យ​គ្រប់ភាគី​ស្វែងរក​ដំណោះស្រាយ​​ ដើម្បី​បន្ធូរបន្ថយ​ភាព​តានតឹង។

ផ្សាយពាណិជ្ជកម្ម

បទវិភាគ​របស់ សេង ឌីណា

សមយុទ្ធ​​រួមគ្នា​​នៅ​សមុទ្រលឿង រវាង​កងទ័ព​អាមេរិក និង​កូរ៉េ​ខាងត្បូង​នឹង​ត្រូវ​បញ្ចប់ នៅថ្ងៃ​ពុធ ១ ធ្នូ ២០១០​នេះ។ ក៏ប៉ុន្តែ កូរ៉េ​ខាង​ត្បូង​បាន​ប្រកាស​ថា ខ្លួន​កំពុង​រៀបចំ​ធ្វើ​​​សមយុទ្ធ​ថ្មីៗ​ផ្សេង​ទៀត ជាមួយ​កងទ័ព​អាមេរិក។

ភ្លាមៗ​ក្រោយ​ពី​ការប្រកាស​នេះ នាយក​ទីភ្នាក់ងារ​ស៊ើបការណ៍​សម្ងាត់​កូរ៉េ​ខាង​ត្បូង​បាន​ប្រាប់​ គណៈកម្មាធិការ​​សភា​ថា ការ​វាយប្រហារ​ពីសំណាក់​កូរ៉េ​ខាងជើង​​ កាល​ពី​ពេលថ្មីៗនេះ គឺ​បណ្តាល​មក​ពី​​មាន​ភាព​ចម្រូងចម្រាស់​គ្នា ​នៅ​​ផ្ទៃក្នុង​ជួរថ្នាក់ដឹកនាំ​កូរ៉េ​ខាង​ជើង ​ជុំវិញ​ការ​​ឲ្យ​កូនប្រុស​លោក​គីម ជុង​អ៊ីល ឡើង​មក​ស្នង​តំណែង។ កូរ៉េ​ខាង​ជើង​អាច​នឹង​ធ្វើការវាយប្រហារ​ថ្មីៗ​ទៀត​មក​លើ​កូរ៉េ​ខាង​ត្បូង។

នៅថ្ងៃ​ពុធនេះ ចិន​បាន​អំពាវនាវ​សាជាថ្មីម្តងទៀត​ឲ្យ​គ្រប់ភាគី​ខិតខំ​ស្វែងរក​មធ្យោបាយ​ រំងាប់​ភាពតានតឹង​នៅ​កូរ៉េ។ នៅ​ឯក្រុមប្រឹក្សា​សន្តិសុខ​អង្គការ​សហប្រជាជាតិ​ឯណោះវិញ ចិន​បាន​​ជំទាស់​ជាលើក​ទី២ មិន​ឲ្យ​​ចេញ​សេចក្តីថ្លែងការណ៍​ថ្កោលទោស​កូរ៉េ​ខាង​ជើង។

នៅថ្ងៃ​ដដែលនេះ ប្រធាន​រដ្ឋសភា​ចិន​បាន​ទទួល​ជួប​សមភាគី​កូរ៉េ​ខាង​ជើង នៅ​ក្នុង​រដ្ឋធានី​ប៉េកាំង។ ក្នុង​ជំនួប ដែល​​ចាក់​ផ្សាយ​តាម​បណ្តាញ​ទូរទស្សន៍​រដ្ឋ​ផងនោះ ប្រធានសភា​ចិន​បាន​បញ្ជាក់ប្រាប់​​សមភាគី​របស់​លោក​ថា ចិន​នឹង​នៅតែ​រក្សា​ទំនាក់ទំនង​​មិត្តភាព​ជាមួយ​កូរ៉េ​ខាង​ជើង។

វែបសៃត៍ Wikileaks ទើប​នឹង​ចេញផ្សាយ​ឯកសារ​សម្ងាត់​មួយចំនួន ដែល​បង្ហាញ​ថា ចិន​ទំនង​ជា​​អាច​បោះបង់​របបកុម្មុយនិស្ត​កូរ៉េ​ខាង​ជើង ហើយ​សុខចិត្ត​ឲ្យ​កូរ៉េ​ទាំងពីរ​រួបរួម​គ្នា ក្រោម​ការ​គ្រប់គ្រង​របស់​កូរ៉េ​ខាង​ត្បូង។

អ្នកវិភាគ​ខ្លះ​យល់ថា ការ​លេចធ្លាយ​ឯកសារ​សម្ងាត់​នេះ​អាច​នឹង​ធ្វើ​ឲ្យ​​ស្ថានភាព​នៅកូរ៉េ​កាន់តែ ​ធ្លាក់ដុនដាប​ខ្លាំងឡើង​ថែមទៀត។ ចិន​អាច​នឹង​បាត់បង់​ឥទ្ធិពល​លើ​មេដឹកនាំ​កូរ៉េ​ខាងជើង។ ម្យ៉ាងវិញ​ទៀត នៅពេល​ដែល​ដឹង​ថា ចិន​ឈប់​​ការពារ មេដឹកនាំ​កូរ៉េ​ខាង​ជើង​អាច​នឹង​ត្រូវ​ធ្លាក់​ក្នុង​ភាព​ទាល់ចក្រ ហើយ​អាច​នឹង​​បញ្ចេញ​ទង្វើ​បង្ក​ហេតុ​ផ្សេងៗ​ទៀត ដែល​ធ្វើ​ឲ្យ​បាត់បង់​ស្ថិរភាព​ក្នុង​តំបន់៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ