អានតួអត្ថបទ
អាមេរិក

លោកស្រី Susan Rice ដកខ្លួន​ពី​បញ្ជី​បេក្ខជន​សម្រាប់​ជំនួស​តំណែង​លោកស្រី​ហ៊ីឡារី​គ្លីនតុន

លោកស្រី​ស៊ូសាន រ៉ៃស៍ (Susan Rice) ឯកអគ្គរដ្ឋទូត​អាមេរិក​ប្រចាំ​អ.ស.ប.
លោកស្រី​ស៊ូសាន រ៉ៃស៍ (Susan Rice) ឯកអគ្គរដ្ឋទូត​អាមេរិក​ប្រចាំ​អ.ស.ប. Reuters/Brendan McDermid
ដោយ៖ សេង ឌីណា
១៦ នាទី

កាលពីថ្ងៃ​ព្រហស្បតិ៍​ម្សិលមិញ លោកស្រី​ស៊ូសាន រ៉ៃស៍ (Susan Rice) បាន​ស្នើ​សុំ​ឲ្យ​លោក​អូបាម៉ា​ដកឈ្មោះ​របស់​លោកស្រី​ពី​បញ្ជីឈ្មោះ​បេក្ខជន ដែល​ត្រូវ​ឡើង​មក​កាន់តំណែង​ជា​រដ្ឋមន្រ្តី​ក្រសួង​ការបរទេស​ជំនួស​លោកស្រី​ហ៊ីឡារី គ្លីនតុន (Hillary Clinton)។ ការ​សម្រេច​ដកបេក្ខភាព​នេះ គឺ​ដោយសារ​តែ​មាន​ជាប់​រឿង​ចម្រូងចម្រាស​ជាមួយ​គណបក្ស​សាធារណរដ្ឋ ដែល​ជា​បក្ស​ប្រឆាំង​នៅ​ព្រឹទ្ធសភា។

ផ្សាយពាណិជ្ជកម្ម

 

លោកស្រី​ស៊ូសាន រ៉ៃស៍ បច្ចុប្បន្ន​ជា​ឯកអគ្គរដ្ឋទូត​អាមេរិក​ប្រចាំ​អ.ស.ប. និង​ស្ថិត​ក្នុង​រង្វង់​​មនុស្ស​ជំនិតរបស់​លោក​អូបាម៉ា។ លោកស្រី​ត្រូវបាន​គេ​មើលឃើញ​ជាទូទៅ​ថា ជា​អ្នក​ដែល​ទំនង​ជា​នឹង​ត្រូវ​លោក​អូបាម៉ា​តែងតាំង​ជា​រដ្ឋមន្រ្តី​ក្រសួង​ការបរទេស​ ជំនួស​លោកស្រី​ហ៊ីឡារី គ្លីនតុន ដែល​គ្រោង​លាឈប់​ពីមុខ​តំណែង នៅ​ដើមឆ្នាំ​ក្រោយ។

ក៏ប៉ុន្តែ លោកស្រី​ស៊ូសាន រ៉ៃស៍ ធ្លាប់​ត្រូវ​បាន​ទទួលរងនូវ​ការ​រិះគន់​ខ្លាំងក្លា​ជាងគេ ពី​សំណាក់​សមាជិក​សភា​មក​ពី​គណបក្ស​សាធារណរដ្ឋ ជុំវិញ​ហេតុការណ៍​នៅ​បិនហ្កាហ្ស៊ី ប្រទេស​លីប៊ី ដែល​ស្ថាន​កុងស៊ុល​អាមេរិក​ត្រូវ​បាន​ដុតបំផ្លាញ រហូត​បណ្តាល​ឲ្យ​ស្លាប់​ឯកអគ្គរដ្ឋទូត​អាមេរិក​ប្រចាំ​ប្រទេស​លីប៊ី។ នេះ​ក៏ដោយសារតែ​លោកស្រី រ៉ៃស៍ ធ្លាប់បាន​អះអាង​ជាច្រើន​លើក​ថា ការវាយប្រហារ​ទៅលើ​ស្ថានកុងស៊ុល​អាមេរិក​នេះ គឺ​កើត​ពី​ចលនា​ប្រឆាំង​នឹង​ខ្សែវីដេអូ​ដែល​មាន​អត្ថន័យ​ប្រមាថ​សាសនា​អ៊ីស្លាម ក៏ប៉ុន្តែ ក្រោយមក ការ​ស៊ើបអង្កេត​បង្ហាញ​ថា វាជា​ស្នាដៃ​របស់​ក្រុមភេរវជន​ស្និទ្ធ​នឹង​​អាល់កៃដា។

នៅ​ក្នុង​លិខិត​ផ្ញើ​ទៅលោក​អូបាម៉ា កាល​ពី​ម្សិលមិញ លោកស្រី​ស៊ូសាន រ៉ៃស៍ បាន​សរសេរ​ថា លោកស្រី​មាន​ក្តីរីករាយ និង​មាន​កិត្តិយស ដែល​​​បាន​ជាប់ឈ្មោះ​ក្នុង​បញ្ជី​បេក្ខជន ដែល​ ​លោក​អូបាម៉ា​ពិចារណា​ចង់​តែងតាំង​ជា​រដ្ឋមន្រ្តី​ការបរទេស​ថ្មី ហើយ​ថា លោកស្រី​មាន​ជំនឿ​ចិត្ត​យ៉ាងមុតមាំ​ថា លោកស្រី​មាន​សមត្ថភាព​អាច​នឹង​ធ្វើការ​បម្រើ​ប្រទេស​ជាតិ​បាន​ប្រកប​ដោយ​ប្រសិទ្ធភាព។ ក៏ប៉ុន្តែ លោកស្រី​បាន​ស្នើសុំ​ឲ្យ​លោក​អូបាម៉ា​ដក​ឈ្មោះ​លោកស្រី​ចេញវិញ ដោយ​លើក​ហេតុផល​ថា ការ​តែងតាំង​លោកស្រី​អាច​នឹង​បង្ក​ឲ្យ​មាន​ភាព​ចម្រូងចម្រាស នៅ​ក្នុង​ពេល​ត្រូវ​ឆ្លងកាត់​ការបោះឆ្នោត​ផ្តល់​សេចក្តី​ទុកចិត្ត​ពី​សភា ដែល​នឹង​បង្ក​ជា​បញ្ហា​ស្មុគស្មាញ​បន្ថែមទៀត ដល់​លោក​អូបាម៉ា ដែល​កំពុង​តែ​មាន​បញ្ហា​ប្រទាញប្រទង់​ខ្លាំង​ស្រាប់ ជាមួយ​គណបក្ស​សាធារណរដ្ឋ។

នៅពេលនេះ ដែល​លោកស្រី​ស៊ូសាន រ៉ៃស៍ សម្រេច​ដកបេក្ខភាព លោក​អូបាម៉ា​ទំនង​ជា​នឹងងាក​ទៅរក​ឥស្សរជន​គណបក្ស​ប្រជាធិបតេយ្យ​មួយ​ទៀត គឺ​លោក​ចន ឃែរី (John Kerry) បច្ចុប្បន្ន​ជា​ប្រធាន​គណៈកម្មការ​កិច្ចការបរទេស​របស់​ព្រឹទ្ធសភា និង​ជា​អតីត​បេក្ខជន​ប្រធានាធិបតី កាល​ពី​ឆ្នាំ​២០០៤។

គួរបញ្ជាក់ថា នៅ​ក្នុង​អាណត្តិ​ទី២​នេះ លោក​អូបាម៉ា​នឹង​ត្រូវ​រក​មនុស្ស​មក​កាន់តំណែង​សំខាន់ៗ​មួយចំនួន ខាង​ផ្នែក​កិច្ចការបរទេស និង​សន្តិសុខ ដើម្បី​ជំនួស​មន្រ្តី​ចាស់ ដែល​សុទ្ធតែ​បាន​ប្រកាស​លាឈប់​ពីមុខ​តំណែង គឺ​រួមមាន​ លោកស្រី​គ្លីនតុន រដ្ឋមន្រ្តី​ក្រសួង​ការបរទេស លោក​ឡេអន ប៉ានេតា (Leon Panetta) រដ្ឋមន្រ្តី​ក្រសួង​ការពារជាតិ និង​លោក David Petraeus នាយក​ទីភ្នាក់ងារ​​សេអ៊ីអា៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ