តួកគី-ស៊ីរី

ស៊ីរី​ហាម​លែងឲ្យ​យន្តហោះ​ស៊ីវិល​តួកគី​ហោះ​កាត់​ដែន​អាកាស

យន្តហោះ​របស់​ស៊ីរី ដែល​ទ័ព​អាកាស​តួកគី​ស្ទាក់​ចាប់​បង្ខំ​ឲ្យ​ចុះចត កាលពីថ្ងៃទី១០ តុលា ២០១២
យន្តហោះ​របស់​ស៊ីរី ដែល​ទ័ព​អាកាស​តួកគី​ស្ទាក់​ចាប់​បង្ខំ​ឲ្យ​ចុះចត កាលពីថ្ងៃទី១០ តុលា ២០១២ AFP PHOTO/ADEM ALTAN

រដ្ឋាភិបាល​ស៊ីរី​បាន​ប្រកាស​ថា ចាប់ពីថ្ងៃ​អាទិត្យ​នេះ​ទៅ យន្តហោះ​ស៊ីវិល​មិន​អាច​ហោះ​កាត់​ដែន​អាកាស​របស់​ស៊ីរី​ទៀត​បានទេ។ បម្រាមនេះ​ត្រូវបាន​ដាក់​ចេញ ក្រោយ​ពី​តួកគី​បាន​ស្ទាក់​ចាប់​យន្តហោះ​ស៊ីវិល​របស់​ស៊ីរី ដែល​ហោះ​កាត់​ដែន​អាកាស​តួកគី ដោយ​រដ្ឋាភិបាល​តួកគី​ចោទ​ថា​ជា​យន្តហោះ​ដឹក​គ្រឿង​សព្វាវុធ​ពី​រុស្ស៊ី ទៅ​ឲ្យ​រដ្ឋាភិបាល​របស់​លោក​បាស្ហា អាល់អាសាដ។ ក្នុង​ពេល​ជាមួយ​គ្នា​នេះ​ដែរ រដ្ឋាភិបាល​តួកគី​បាន​អំពាវនាវ​ឲ្យ​ធ្វើ​កំណែទម្រង់​ក្រុមប្រឹក្សា​សន្តិសុខ​អ.ស.ប. ដើម្បី​ដោះស្រាយ​វិបត្តិ​ស៊ីរី។

ផ្សាយពាណិជ្ជកម្ម

យោងតាម​រដ្ឋមន្រ្តី​ក្រសួង​ការបរទេស​ស៊ីរី ​ការ​ដែល​រដ្ឋាភិបាល​ស៊ីរី​សម្រេច​បិទ​ដែន​អាកាស​មិន​ឲ្យ​យន្តហោះ​ស៊ីវិល​របស់​តួកគី​ឆ្លងកាត់​នេះ គឺ​ជា​ការ​​វិធានការ​ ដើម្បី​តបត​ទៅ​​នឹង​ទង្វើ​របស់​​រដ្ឋាភិបាល​​តួកគី ដែល​​បាន​ស្ទាក់ចាប់ និង​រឹបអូស​ទំនិញ​លើ​យន្តហោះ​ស៊ីវិល​របស់​ស៊ីរី កាល​ពី​ប៉ុន្មាន​ថ្ងៃ​មុន។ ក៏ប៉ុន្តែ មែនទែនទៅ រដ្ឋាភិបាល​តួកគី​បាន​ប្រាប់​ទៅ​ក្រុម​ហ៊ុន​អាកាសចរណ៍​​របស់​ខ្លួន ឲ្យ​ឈប់ហោះ​កាត់​ដែន​អាកាស​ស៊ីរី តាំង​ពី​ថ្ងៃ​ដែល​តួកគី​ស្ទាក់​ចាប់យន្តហោះ​ស៊ីរី​នោះ​ម៉្លេះ ដោយ​បញ្ជាក់ថា ដែនអាកាស​ស៊ីរី​លែង​មាន​សុវត្ថិភាព​សម្រាប់​យន្តហោះ​ស៊ីវិល​តួកគី​ទៀត​ហើយ។

កាលពី​ម្សិលមិញ​នេះ រដ្ឋមន្រ្តី​ក្រសួង​ការបរទេស​អាល្លឺម៉ង់ ដែល​​ទៅបំពេញ​ទស្សនកិច្ច​នៅ​តួកគី បាន​បញ្ជាក់​ពី​ជំហរ​គាំទ្រ​តួកគី ដែល​ជា​សម្ព័ន្ធមិត្ត​ក្នុង​អង្គការ​អូតង់ ក៏ប៉ុន្តែ ជាមួយ​គ្នា​ក៏​បាន​អំពាវនាវ​ផងដែរ​ឲ្យ​តួកគី​មាន​ការ​អត់ធ្មត់​ជាអតិបរមា ដើម្បី​កុំ​ឲ្យ​​ជម្លោះ​ជាមួយ​ស៊ីរី​នេះ រាលដាល​ទៅជា​សង្រ្គាម។ ចំពោះ​រឿង​ស្ទាក់ចាប់​ និង​រឹបអូស​ទំនិញ​លើ​យន្តហោះ​ស៊ីរីនោះ ​រដ្ឋមន្រ្តី​ការបរទេស​អាល្លឺម៉ង់​ក៏​បាន​ថ្លែង​គាំទ្រ​តួកគី​ដែរ បើទោះជា​ការស្ទាក់ចាប់យន្តហោះ​នោះ បាន​នាំ​ឲ្យ​​​​រុស្ស៊ី​ផ្ទុះកំហឹង​ក៏ដោយ។

នៅក្នុងការវាយប្រហារ​ដោយ​ប្រយោល​ទៅលើ​រុស្ស៊ី នាយករដ្ឋមន្រ្តី​តួកគី​បាន​អំពាវនាវ កាល​ពី​ថ្ងៃ​សៅរ៍​ម្សិលមិញ ឲ្យ​មាន​ការ​ធ្វើ​កំណែទម្រង់​ក្រុមប្រឹក្សា​សន្តិសុខ​អ.ស.ប. ដោយ​លើកឡើង​ថា “ប្រសិនបើ​យើង​នៅតែ​ចាំ​ការយល់ព្រម​ពី​សមាជិក​អចិន្រ្តៃយ៍​មួយ ឬ​ពីរ បែបនេះ ជោគវាសនា​របស់​ប្រជាជន​ស៊ីរី​ប្រាកដ​ជា​នឹង​ត្រូវ​ធ្លាក់​ក្នុង​គ្រោះថ្នាក់​ធ្ងន់ធ្ងរ”។ គួររំឭកឡើងវិញ​ថា ក្នុង​ចំណោម​សមាជិក​អចិន្រ្តៃយ៍​ទាំង ៥​ ​ រុស្ស៊ី និង​ចិន បាន​ប្រើ​សិទ្ធិវ៉េតូ​រហូតដល់​ទៅ ៣លើក ទៅលើ​សេចក្តី​សម្រេច​របស់​ក្រុមប្រឹក្សា​សន្តិសុខ​ ជុំវិញ​វិបត្តិ​ស៊ីរី។ នាយករដ្ឋមន្រ្តី​តួកគី គឺ​លោក​ Erdogan បាន​រិះគន់​ថា “អសមត្ថភាព​ក្នុងការ​ដោះស្រាយ​វិបត្តិ​ស៊ីរី កំពុង​តែ​ធ្វើ​ឲ្យ​ក្រុមប្រឹក្សា​សន្តិសុខ​​បាត់បង់​ធម្មានុរូបភាព”។

នៅក្នុងប្រទេស​ស៊ីរី​ឯណោះវិញ ទាហាន​ឧទ្ទាម​ និង​អង្គការ​ការពារសិទ្ធិមនុស្ស​ បាន​អះអាង​ថា កាល​ពី​ម្សិលមិញ​នេះ ក្រុម​ឧទ្ទាម​បាន​វាយដណ្តើម​កាន់កាប់​ទីតាំង​ការពារ​ដែន​អាកាស​ចំនួន​ ២កន្លែង និ​ង​បាន​បាញ់​ទម្លាក់​យន្តហោះ​ចម្បាំង​ ធុន MiG ១គ្រឿង​របស់​ទាហាន​រដ្ឋាភិបាល។ ក៏ប៉ុន្តែ មិនមាន​ប្រភព​ឯករាជ្យណាមួយ ដែល​អាច​បញ្ជាក់​ឲ្យ​បាន​ច្បាស់លាស់ ជុំវិញ​ការ​អះអាង​ទាំងនេះ​ទេ។

ចំណែក​អង្គការ​សិទ្ធិមនុស្ស Human Rights Watch វិញ បាន​ចោទ​ទាហាន​រដ្ឋាភិបាល​របស់​លោក​បាស្ហា អាល់អាសាដ​​ថា បាន​ប្រើ​គ្រាប់បែក​ចង្កោម ទម្លាក់​ទៅលើ​ទីប្រជុំជន។ គួរបញ្ជាក់ថា ចាប់តាំង​ពីឆ្នាំ​២០០៨មក គ្រាប់បែក​ចង្កោម ជា​ប្រភេទ​គ្រាប់ ដែល​ត្រូវ​គេ​ហាម​ឃាត់​ជាទូទៅ ក៏ប៉ុន្តែ ស៊ីរី​មិន​បាន​ផ្តល់​សច្ចាប័ន​លើ​អនុសញ្ញា​​គ្រាប់បែក​ចង្កោម​នេះ​ទេ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI