ចិន-តៃវ៉ាន់

ប្រជាជន​តៃវ៉ាន់​ចុះ​ថ្នល់​ជា​ថ្មី​ដើម្បី​ប្រឆាំង​នឹង​កិច្ច​ព្រមព្រៀង​ពាណិជ្ជកម្ម​ដែល​តៃវ៉ាន់ចុះ​ជាមួយ​ចិន

ប្រជាជន​តៃវ៉ាន់ ច្រើន​ជាង​៨ម៉ឺននាក់​បាន​ធ្វើ​បាតុកម្ម​នៅ​ថ្ងៃ​អាទិត្យ​ដើម្បី​ទាមទារ​ឲ្យ​រដ្ឋាភិបាល​ដក​ខ្លួន​ចេញ ពីកិច្ចព្រមព្រៀង ពាណិជ្ចកម្ម​ជាមួយ​ចិន
ប្រជាជន​តៃវ៉ាន់ ច្រើន​ជាង​៨ម៉ឺននាក់​បាន​ធ្វើ​បាតុកម្ម​នៅ​ថ្ងៃ​អាទិត្យ​ដើម្បី​ទាមទារ​ឲ្យ​រដ្ឋាភិបាល​ដក​ខ្លួន​ចេញ ពីកិច្ចព្រមព្រៀង ពាណិជ្ចកម្ម​ជាមួយ​ចិន ©REUTERS/Toby Chang

នៅទីក្រុង​តៃប៉ិ ចលនា​ប្រជាជន​ដាក់​សម្ពាធ​លើ​លោក​ប្រធានាធិបតី​តៃវ៉ាន់ ម៉ា យីងចូវ​បាន​កើត មាន​ជា​ថ្មី នៅថ្ងៃ​អាទិត្យ ទី ៣០ មីនា។ មហាបាតុកម្ម​ដែល​មាន​ចូលរួម​ពី​ប្រជាជន​តៃវ៉ាន់ រាប់ម៉ឺន​នាក់ ត្រូវ​បាន​រៀបចំ​ឡើង ដើម្បី​ទាមទារ​ឲ្យ​ប្រធានាធិបតី​តៃវ៉ាន់ ដក​តៃវ៉ាន់ ចេញ​ពី​កិច្ច​ព្រមព្រៀង​ពាណិជ្ជកម្ម​ជាមួយ​ចិន។

ផ្សាយពាណិជ្ជកម្ម

“រដ្ឋាភិបាល​មិន​បាន​ស្តាប់​ប្រជាជន​ដែល​ចង់​ឲ្យ​តៃវ៉ាន់​ដកខ្លួន​ពី​កិច្ចព្រមព្រៀង​ពាណិជ្ជកម្ម​ជាមួយ​ចិន”។ នេះ​ជា​សំឡេង​ស្រែក​របស់​ក្រុមបាតុករ ដែល​មាន​គ្នីគ្នា រាប់ម៉ឺន​នាក់ ដើរ​សំដៅ​ទៅ​វិមាន​រដ្ឋាភិបាល នៅថ្ងៃ​អាទិត្យ​នេះ។

តាម​អាជ្ញាធរ ប៉ូលិស​ប្រមាណ ៣៥០០​នាក់​ត្រូវ​បាន​ពង្រាយ នៅ​តំបន់​ជុំវិញ វិមាន​រដ្ឋាភិបាល។ សន្តិសុខ​ត្រូវ​បាន​ពង្រឹង​ខ្ពស់ បន្ទាប់​ពី​អាជ្ញាធរ​ខកខាន មិនអាច​ទប់ស្កាត់ ក្រុម​បាតុករ ដែល​បាន​វាយរនាំង សម្រុក​ចូលក្នុង​វិមាន​រដ្ឋាភិបាល កាល ពី​ថ្ងៃ​ទី ២៣​មីនា។ រហូត​មកដល់​ថ្ងៃនេះ ក្រុមនិស្សិត​តៃវ៉ាន់ ដែល​មាន​គ្នា ប្រមាណ ២០០​នាក់ នៅ​បន្ត​កាន់កាប់​សភា។ ពួកគេ​តវ៉ា​ប្រឆាំង​​ដាច់ខាត នឹង​កញ្ចប់​ព្រមព្រៀង​ពាណិជ្ជកម្ម​ចិន និង​តៃវ៉ាន់ ដែល​ពួកគេ​វាយ​តម្លៃ​ថា នឹង​ប៉ះពាល់​ដល់​សេដ្ឋកិច្ច​តៃវ៉ាន់ ហើយ​នឹង​ធ្វើ​ឲ្យ​នយោបាយ​តៃវ៉ាន់ កាន់តែ​ធ្លាក់​ទៅក្នុង​អំណាច​ឥទ្ធិពល​របស់​ចិន។ ក្រុម​បាតុករ​ដែល​ស្រែក​ទាមទារ​បូរណភាព​ទឹកដី​របស់​តៃវ៉ាន់ បាន​ព្រមាន​រួចហើយ​ថា កិច្ចព្រមព្រៀង​ជាមួយ​នឹង​អាច​ធ្វើ​តៃវ៉ាន់ កា្លយ​ជាទីក្រុង​របស់​ចិន ដូចជា​ទីក្រុង​ហុងកុង។

ចាប់តាំង​ពី​ឈ្នះឆ្នោត ក្លាយ​ជា​ប្រធានាធិបតី​តៃវ៉ាន់ នៅឆ្នាំ ២០០៨ លោក​ម៉ា យីងចូវ បាន​ពង្រឹង​ទំនាក់​ទំនង​ពាណិជ្ជកម្ម​ជាមួយ​ចិន​ដីគោក។ កិច្ចព្រមព្រៀង លើកនេះ ត្រូវ​ធ្វើឡើង បន្ទាប់​ពី​ចិន និង​តៃវ៉ាន់​បាន​ចុះហត្ថលេខា លើ​សហប្រតិបត្តិការ​សេដ្ឋកិច្ច កាលពីឆ្នាំ ២០១០។ កិច្ចព្រមព្រៀង​ពាណិជ្ជកម្ម មាន​ទិសដៅ​កាត់បន្ថយ​របាំង រនាំង​ពាណិជ្ជកម្ម រវាង​ប្រទេស​ទាំងពីរ៕

ចលនា​បាតុកម្ម​ប្រឆាំង​នយោបាយ​របស់​រដ្ឋាភិបាល​កើត​មាន​ជា​ថ្មី បើទោះបី​ជា​លោក​ប្រធានាធិបតី​ម៉ា យីងចូវ បាន​ធ្វើ​សម្បទាន​ខ្លះៗ ក៏ដោយ។ កាលពី​ថ្ងៃ​សៅរ៍ លោកម៉ា បាន​យល់ព្រម​ឲ្យ​មាន​បង្កើត​ច្បាប់ ដើម្បី​តាមដាន​ត្រួតពិនិត្យ​លើ​កិច្ចព្រមព្រៀង​ពាណិជ្ជកម្ម តៃវ៉ាន់ ជាមួយ​ចិន។ ប៉ុន្តែ លោក​បាន​បដិសេធ មិន​ធ្វើ​តាម​ការទាមទារ​របស់​បាតុករ ពោល​គឺ​មិន​ព្រម​ដកខ្លួន​ចេញ​ពី​កិច្ចព្រមព្រៀង​ដែល​តៃវ៉ាន់​បាន​ចុះហត្ថលេខា រួចហើយនោះទេ។ តាម​លោកប្រធានាធិបតី​ម៉ា ធ្វើដូច្នេះ នឹង​ធ្វើ​ឲ្យ​តៃវ៉ាន់ ខាតបង់​យ៉ាងធ្ងន់ធ្ងរ។ ទីក្រុង​ប៉េកាំង​វិញ បាន​បង្កើន​ធ្វើ ពាណិជ្ជកម្ម​ជាមួយ​តៃវ៉ាន់ ដែល​ចិន​នៅតែ​ចាត់ទុក​ជាកោះ​របស់ខ្លួន និងត្រូវ​រង់ចំា​ដណ្តើម​យក​មកគ្រប់គ្រង​វិញ នោះបើ​ទោះបី​​ជា​ត្រូវ​ប្រើ​កម្លាំង​បាយក៏ដោយ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI