អាហ្វហ្កានីស្ថាន

ក្រុមតាលីបង់​ដាក់​បញ្ជា​សកម្មជនខ្លួន​អោយ​ធ្វើការ​រាំងស្ទះ​ដល់​ការបោះឆ្នោត​ប្រធានាធិបតី​អាហ្វហ្កានីស្ថាន​

សកម្មជន​តាលីបង់​នៅ​អាហ្វហ្កានីស្ថាន កំពុង​ហ្វឹកហាត់។
សកម្មជន​តាលីបង់​នៅ​អាហ្វហ្កានីស្ថាន កំពុង​ហ្វឹកហាត់។ Reuters/Stringer/Files

នៅ​​ថ្ងៃចន្ទ​នេះ ​ក្រុមឧទ្ទាម​តាលីបង់​អាហ្វហ្កានីស្ថាន​​បានចេញបញ្ជា​​​​អោយ​សកម្មជន​ប្រយុទ្ធ​របស់​ខ្លួន ធ្វើសកម្មភាព​រាំងស្ទះ​ដល់​ដំណើរការ​បោះឆ្នោត​ប្រធានាធិបតី​អាហ្វហ្កានីស្ថាន ដែល​ត្រូវ​រៀបចំធ្វើ​នៅ​ថ្ងៃ​ទី៥មេសា​​ខាងមុខ។ ​​​ក្រុម​តាលីបង់​បាន​ព្រមាន​ថា នឹង​វាយប្រហារ​សកម្មជន​រឺ​ក៏​បណ្តាជន​ដែល​ទទួលបន្ទុក​រៀបចំ​ការបោះឆ្នោត​នេះ។ នេះជា​លើក​ទី១ហើយ​ ដែលក្រុមឧទ្ទាម​តាលីបង់​​បាន​គំរាម​ផ្ទាល់​​ចំពោះ​ដំណើរការ​បោះឆ្នោត​​ប្រធានាធិបតី​អាហ្វហ្កានីស្ថាន។

ផ្សាយពាណិជ្ជកម្ម

នៅថ្ងៃ​ចន្ទនេះ ​​​ក្រុមឧទ្ទាម​តាលីបង់អាហ្វហ្កានីស្ថាន​បាន​អំពាវនាវ​ក្នុង​វេបសៃត៍​របស់ខ្លួន អោយ​សកម្មជន​ប្រយុទ្ធ​តាលីបង់​ទាំងអស់​ ប្រើប្រាស់​រាល់​កងកម្លាំង​ដែលពួកគេ​មាន ដើម្បី​រាំងស្ទះ​ដំណើរការ​បោះឆ្នោត​ប្រធានាធិបតី​​អាហ្វហ្កានីស្ថាន​​ នៅខែ​មេសា​ខាងមុខ។ ការបោះឆ្នោត​​ប្រធានាធិបតី​អាហ្វហ្កានីស្ថាន ជុំទី១​​ត្រូវ​ប្រព្រឹត្ត​ទៅ​នៅថ្ងៃ​៥មេសា។​ ក្រុមតាលីបង់​បាន​គំរាម​ផងដែរ​ថា នឹង​វាយប្រហារ​​បណ្តាជន​ដែល​ទទួលបន្ទុក​រៀបចំ​ការបោះឆ្នោត​នេះ។

ពួកតាលីបង់​បាន​ចាត់ទុក​ការបោះឆ្នោត​ប្រធានាធិបតី​នៅ​អាហ្វហ្កានីស្ថាន​ថា ជា​ការ​បោះឆ្នោត​​​​គ្មានឆន្ទៈ​អ្វី​នោះទេ។ ពួកគេ​លើកឡើងថា ជនជាតិ​អាហ្វហ្កានីស្ថាន​ម្នាក់ៗ​ត្រូវតែ​​ដឹង​ថា ការទៅបោះឆ្នោត​នេះ វា​គ្មានប្រយោជន៍​អ្វី​នោះទេ ​ព្រោះថា​លទ្ធផល​នៃការ​បោះឆ្នោត​​ ​​ត្រូវបាន​ការិយា​ល័យ​សេអ៊ីអា​ និង​មន្ទីរប៉ង់តាហ្កូន​​ សម្រេច​មុន​រួចទៅហើយ។ ក្រុម​តាលីបង់​​បាន​បង្គាប់​អោយ​ប្រជាជន​អាហ្វហ្កានីស្ថាន​ស្ថិត​នៅ​អោយ​ឆ្ងាយ​ពី​ការិយាល័យ​​បោះឆ្នោត​​ នៅថ្ងៃ​បោះឆ្នោត​ខាងមុខ​នេះ។

នេះ​ជាលើកទី១ហើយ​ដែល​ក្រុមឧទ្ទាម​តាលីបង់​គំរាម​ផ្ទាល់​ដល់​ការបោះឆ្នោត​ប្រធានាធិបតី​​​​អាហ្វហ្កានីស្ថាន។ កន្លងមក ​មេក្រុម​តាលីបង់ ម៉ូឡា អូម៉ា ធ្លាប់​បាន​អំពាវនាវ​អោយ​ធ្វើពហិការ​ក្នុង​ការ​បោះឆ្នោត​នេះ​រួចមកហើយ។ ​​សម្រាប់​ការ​បោះឆ្នោត​ប្រធានាធិបតី​​​អាហ្វហ្កានីស្ថាន​​​ នៅ​ថ្ងៃ​៥មេសាខាងមុខ ​​មាន​បេក្ខជន​១០រូប ឈរឈ្មោះ។ ប្រធានាធិបតី​ហាមីឌ​ កាហ្សៃដឹកនាំ​ប្រទេស​​ចាប់ពី​ពេល​ពួកតាលីបង់​បាត់បង់​អំណាច​ ក្នុង​ឆ្នាំ​២០០១មក គ្មាន​សិទ្ធិ​​ឈរឈ្មោះ​សម្រាប់​អាណត្តិទី៣ទៀតទេ។

ការបោះឆ្នោត​ប្រធានាធិបតី​អាហ្វហ្កានីស្ថាន​​ឆ្នាំ​២០១៤នេះ ជា​តេស្ត​​​សម្រាប់​អាជ្ញាធរ​ក្នុង​ការ​ធានា​សុវត្ថិភាព​សន្តិសុខ និង​អនាគត​ប្រទេស​ជាតិ ក្រោយ​​សហគមន៍​អន្តរជាតិ​បាន​ធ្វើអន្តរាគមន៍​១២ឆ្នាំ​មកនេះ ពិសេស​ជិត​ដល់​ពេល​ដែល​អង្គការ​អូតង់​ត្រូវ​ដកទ័ព​​ខ្លួន​​៥ម៉ឺននាក់​​នៅ​ដំណាច់ឆ្នាំ​២០១៤នេះផង។ គួររំលឹកថា ​ក្រោមការគំរាម​របស់​ក្រុមតាលីបង់ ការបោះឆ្នោត​កាលពីឆ្នាំ​២០០៩ មាន​ភាពច្របូកច្របល់​ និង​​​រង​ការក្លែង​បន្លំ​ច្រើន ធ្វើអោយ​​លោកហាមីឌ កាហ្សៃ​ បាន​ឡើង​កាន់អំណាច​ជាលើកទី២៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI