កម្ពុជា

លោក​ ថាច់​ សេដ្ឋា ​មិន​ទទួល​យក​ការ​សុំទោស​ពី​អ្នក​គំរាម​សម្លាប់​ និង​ត្រៀម​ប្តឹង​ទៅ​ក្រសួង​មហាផ្ទៃ

លោក​ថាច់ សេដ្ឋា ប្រធាន​សមាគម​ខ្មែរ​កម្ពុជា​ក្រោម
លោក​ថាច់ សេដ្ឋា ប្រធាន​សមាគម​ខ្មែរ​កម្ពុជា​ក្រោម រូប​ភាព​ឯកសារ

លោក​ថាច់ សេដ្ឋា ​ប្រធាន​សហគមន៍​ខ្មែរ​កម្ពុជា​ក្រោម​ បាន​បដិសេធ​មិន​ទទួល​យក​ការ​សុំ​ទោស​ពី​បុគ្គល​មួយ​រូប​ ដែល​បាន​គំរាម​សម្លាប់ ​ខណៈ​ដែល​លោក​បាន​ដឹកនាំ​បាតុកម្ម​ប្រឆាំង​ស្ថានទូត​វៀតណាម​ប្រចាំ​នៅ​កម្ពុជា​រយៈពេល​៥​ថ្ងៃ​កន្លង​ទៅ​នេះ​ទេ។​ ហើយ​នៅ​រសៀល​ថ្ងៃ​សុក្រ​នេះ ​លោក​ ថាច់ សេដ្ឋា ​ នឹង​ដាក់​ពាក្យ​បណ្តឹង​ជា​ផ្លូវការ​ទៅ​ក្រសួង​មហាផ្ទៃ ​ដើម្បីអោយ​បើក​ការ​ស៊ើប​អង្កេត​មួយ។

ផ្សាយពាណិជ្ជកម្ម

នៅក្នុង​ពាក្យបណ្តឹង​របស់លោក ថាច់ សេដ្ឋា ប្រធាន​សហគមន៍​ខ្មែរ​កម្ពុជា​ក្រោម នឹង​ភ្ជាប់​ជាមួយ​ភស្តុតាង​មួយចំនួន ដែល​ក្នុងនោះ​រួមមាន លេខ​ទូរ​សព្ទ សំលេង រួមទាំង​លិខិត​សុំ​ទោស​មួយ ដែល​បានបញ្ជាក់​យ៉ាង​គ្រប់គ្រាន់​អំពី​អត្តសញ្ញាណរ​បស់ជនស​ង្ស័​យ។

បើតាម​លោក ថាច់ សេដ្ឋា ជនសង្ស័យ​ដែល​គំរាម​សម្លាប់​លោក គឺជា​ជនជាតិ​វៀតណាម រស់​នៅ​ប្រទេស​កាណាដា ដែល​បាន​ទូរ​សព្ទ​គំរាម​សម្លាប់​លោក ដោយសារ តែ​លោក​បាន​ដឹក​នាំ​ប្រជាពលរដ្ឋ ព្រះសង្ឃ និង​យុវជន ធ្វើបាតុកម្ម​ប្រឆាំង​ជាមួយ​វៀតណាម​នៅក្នុង​សំណុំ​រឿង​ទឹកដី​ខ្មែរ​កម្ពុជា​ក្រោម រយៈពេល៥ថ្ងៃ ចាប់ពី​ថ្ងៃទី៦ដល់​ថ្ងៃទី៨តុលា​កន្លងទៅ។ បាតុកម្ម​ដែល​បាន​ឈានទៅដល់​ការដុត​ទង់ជាតិ​វៀតណាម​ផងដែរ។

លោក ថាច់ សេដ្ឋា បាន​បញ្ជាក់ថា លោក​បាន​ស្គាល់​អត្តសញ្ញាណរ​បស់ជនស​ង្ស័​យ​នោះ​ហើយ​ ក្រោយពី​ជនសង្ស័យ​បាន​សរសេរ​លិខិត​សុំទោស​មួយច្បាប់ ផ្ញើមក​កាន់​លោក​តាម​រយៈ​សារ​អេ​ឡិច​ត្រូ​និ​ច។ បុរស​រូប​នោះបាន​សុំទោស​លោក ថាច់ សេដ្ឋា ថា ការនិយាយ​របស់​គេ​នៅពេលនោះ គឺ​ដោយសារ​ស្រវឹង និង​មាន​ជម្ងឺ​ស​សៃ​រ​ប្រសាទ។ ប៉ុន្តែ​យ៉ាងណា​ក៍ដោយ លោក ថាច់ សេដ្ឋា បាន​បដិសេធ​មិន​ទទួលយក​ការសុំ​ទោស​នេះ​ទេ ហើយ​លោក​នឹងដាក់​ពាក្យ​បណ្តឹង​ជា​ផ្លូវការ ទៅកាន់​រដ្ឋមន្ត្រីក្រសួង​មហាផ្ទៃ នៅ​រសៀល​ថ្ងៃ​សុក្រ​នេះ ដើម្បី​បើក​ការស៊ើបអង្កេត​ជា​ផ្លូវការ​មួយ ពីព្រោះថា ជនសង្ស័យ​ដែល​គំរាម​សម្លាប់​លោក​នេះ គឺ កំពុង​រស់នៅ​ក្រៅប្រទេស។ ការដាក់​ពាក្យបណ្តឹង ក៍​ធ្វើឡើង ដើម្បី​ជាការ​ការពារ​ខ្លួន​លោក រួច​ផុត​ពី​ការគំរាមកំហែងផ្សេងៗផងដែរ។

បើតាម​លោក ថាច់ សេដ្ឋា កាលពី​យប់​ថ្ងៃទី៦ ខែតុលា ជនសង្ស័យ​បាន​ទូរ​សព្ទ​ពី១០​ទៅ​២០​ដង ដោយបាន​ប្រើប្រាស់​ពាក្យ​គំរាម​សម្លាប់​លោក ដោយ​ប្រើ​ភាសា​វៀតណាម និង​អង់គ្លេស ប្រសិន បើ​លោក​នៅតែ​បន្ត​ដឹកនាំ​ធ្វើបាតុកម្ម ប្រឆាំង​ជាមួយ​វៀតណាម​បន្តទៀត។ ហើយ​នៅ​ព្រឹក​ថ្ងៃទី៨ ខែតុលា ដែលជា​ថ្ងៃ​ចុងក្រោយ​នៃ​បាតុកម្ម​រយៈពេល៥ថ្ងៃ​របស់លោក​នោះ ជន​សង្ស័យ​ដដែល​បាន ទូរស័ព្ទ គំរាម សម្លាប់​រូបលោក​ម្តងទៀត៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI