ថៃ

​បុត្រី​ច្បង​របស់​អតីត​ព្រះ​មហាក្សត្រ​ថៃ ចូល​ខ្លួន​ប្រជែង​តំណែង​នាយក​រដ្ឋ​មន្ត្រី​ជាមួយ​លោក ប្រាយុទ្ធ ចាន់អូចា​

បុត្រីច្បងរបស់អតីតព្រះមហាក្សត្រថៃ ព្រះនាង Ubolratana
បុត្រីច្បងរបស់អតីតព្រះមហាក្សត្រថៃ ព្រះនាង Ubolratana @Pattaya Mail
ដោយ៖ ញឹម សុផល
១៣ នាទី

បុត្រី​ច្បង​របស់​អតីត​ព្រះ​មហាក្សត្រ​ថៃ ព្រះ​នាង Ubolratana ត្រូវ​គេ​ប្រកាស​នៅ​ថ្ងៃ​សុក្រ​នេះ​ថា ជា​បេក្ខជន​នាយក​រដ្ឋ​មន្ត្រី​ថៃ ខណៈ​ការ​បោះ​ឆ្នោត​សកល នៅ​រាជា​ណាចក្រ​ដែល​គ្រប់​គ្រង​ដោយ​មេដឹក​នាំ​យោធា​មួយ​នេះ នឹង​រៀប​ចំបោះ​ធ្វើ​ឡើង​នៅ​ថ្ងៃ​ទី២៤​ខែមីនា​ខាង​មុខ​។ ការ​ប្រកាស​ឈរ​ឈ្មោះ​របស់​ព្រះនាង Ubolratana បែប​នេះ ធ្វើ​ឡើង​ជួន​គ្នា​នឹង​លោក Prayut Chan-o-Cha នាយក​រដ្ឋ​មន្ត្រី​បច្ចុប្បន្ន ក៏​ប្រកាស​ដូច​គ្នា​ដែរ ជា​បេក្ខជន​នាយក​រដ្ឋ​មន្ត្រី​អាណត្តិ​ថ្មី​។ 

ផ្សាយពាណិជ្ជកម្ម

មុន​ការ​បិទ​បញ្ចប់​ការ​ចុះ​ឈ្មោះ​បេក្ខជន​ឈ្មោះ នៅ​ព្រឹក​ថ្ងៃ​សុក្រ​នេះ ព្រះ​នាង Ubolratana Rajakanya មាន​ព្រះជន្ម​៦៧​ព្រះ​វស្សា ត្រូវ​បាន​គណបក្ស ថៃ​រក្សា​ជាតិ (Thai Raksa Chart) ដែល​មាន​ទំនាក់​ទំនង​នឹង​អតីត​នាយក​រដ្ឋ​មន្ត្រី​ថៃ លោក ថាក់​ស៊ីន ស៊ីណា​វ៉ាត់​ត្រា ប្រកាស​ថា នឹង​ក្លាយ​ជា​បេក្ខជន​នាយក​រដ្ឋ​មន្ត្រី នៅ​ក្នុង​ការ​បោះឆ្នោត​សកល​ជា​លើក ដំបូង​បន្ទាប់​ពី​រដ្ឋ​ប្រហារ​យោធា​កាល​ពី​ឆ្នាំ​២០១៤​។

យោង​ទៅ​តាម​ច្បាប់​ថ្មី​របស់​ថៃ ការ​ប្រកាស​តែង​តាំង​ព្រះ​នាង Ubolratana Rajakanya ជា​បេក្ខជន​នាយក​រដ្ឋ​មន្ត្រី​របស់​គណបក្ស Thai Raksa Chart ត្រូវ​បាន​ទទួល​ស្គាល់​ពី​លោក Prayut Chan-o-Cha ផង​ដែរ ដែល​ពេល​នេះ​កំពុង​តែ​ប្រឈម​មុខ​នឹង​ផ្សែង​ពុល​នៅ​ក្នុង​ប្រទេស​ថៃ ដែល​ស្ថានភាព​នេះ អាច​នឹង​ធ្វើ​ឲ្យ​ប៉ះ​ពាល់​ដល់​ប្រជា​ប្រិយ​ភាព​របស់​លោក មុន​ការ​បោះឆ្នោត​មក​ដល់​។

ព្រះ​នាង Ubolratana Rajakanya ដែល​ជា​ព្រះ​រាម​របស់​ព្រះ​មហាក្សត្រ​ថៃ​បច្ចុប្បន្ន បាន​ក្លាយ​ជា​បេក្ខជន ដ៏​សំខាន់​នៅ​ក្នុង​ការ​បោះ​ឆ្នោត​ខាង​មុខ ប្រជែង​នឹង លោក Prayut Chan-o-Cha នាយក​រដ្ឋ​មន្ត្រី​ថៃ​បច្ចុប្បន្ន ដែល​បាន​ឡើង​កាន់​អំណាច​ដោយ​ការ​ធ្វើ​រដ្ឋ​ប្រហារ​យោធា កាល​ពី​ខែ​ឧសភា​ឆ្នាំ២០១៤ ពី​លោក​ស្រី យ៉ីងឡាក់ ស៊ីណា​វ៉ាត់​ត្រា​។ លោក Prayut ក៏​បាន​ប្រកាស​នៅ​ថ្ងៃ​នេះ​ដែរ​ថា លោក​ឈរ​ឈ្មោះ​ជា​បេក្ខជន​នាយក​រដ្ឋ​រដ្ឋ​មន្ត្រី​សម្រាប់​អាណត្តិ​ថ្មី​។

ព្រះ​នាង Ubolratana Rajakanya គឺ​ជា​បុត្រី​ច្បង​នៃ​អតីត​ព្រះ​មហាក្សត្រ​ថៃ Phumibol Adulyadej ក៏​ប៉ុន្តែ​ព្រះ​នាង​បាន​បោះ​បង់​ចោល​តួនាទី​ជា​ខ្សែ​ររាជ្យ​វង្ស​របស់​ខ្លួន កាល​ពី​ឆ្នាំ​១៩៧២ ដោយ​ទៅរៀប​អាពាហ៍ពិពាហ៍​ជាមួយ​ជន​ជាតិ​អាមេរិក ដែល​ធ្វើ​ឲ្យ​ព្រះ​នាង​កាល​ណោះ បាត់​បង់​នូវ​សិទ្ធិ​ទទួល​បាន​រាជ​សម្បត្តិ​៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI