ថៃ

ថៃ​ទទួលស្គាល់​ថា​អំពើ​បះបោរ​នៅ​ខេត្ត​ប៉ែក​ខាង​ត្បូង​កើត​មាន​កាន់តែ​ខ្លាំង

ទីតាំង​ប៉ូលិស​នៅ​ខេត្ត​ណារ៉ាធីវ៉ាត់ ដែល​ទទួលរងការ​វាយប្រហារ​​កាល​ពី​ថ្ងៃ​ចន្ទ ៧មីនា ២០១១
ទីតាំង​ប៉ូលិស​នៅ​ខេត្ត​ណារ៉ាធីវ៉ាត់ ដែល​ទទួលរងការ​វាយប្រហារ​​កាល​ពី​ថ្ងៃ​ចន្ទ ៧មីនា ២០១១ ©Reuters

នៅថ្ងៃ​អង្គារនេះ រដ្ឋាភិបាល​ថៃ​បាន​ប្រកាស​ទទួលស្គាល់ថា អំពើហិង្សា​​នៅតាម​បណ្តា​ខេត្ត​ប៉ែក​ខាង​ត្បូង​ប្រទេស​ថៃ កំពុង​តែ​រាលដាល​កាន់តែ​ខ្លាំងឡើង។ ​កងកម្លាំង​ប្រដាប់អាវុធ​ដល់ទៅ​៦ម៉ឺន​នាក់ ត្រូវ​បាន​រដ្ឋាភិបាល​បាន​ដាក់​ពង្រាយ នៅ​ក្នុង​ខេត្ត​ទាំងនោះ ក៏ប៉ុន្តែ នៅតែ​មិន​អាច​ទប់ស្កាត់​ការវាយប្រហារ​ពី​សំណាក់​ក្រុមជនប្រដាប់អាវុធ​អ៊ីស្លាម​បាន។ ថ្មីៗនេះ ក្រុមបះបោរ​ធ្វើការ​វាយប្រហារ​ក្នុង​ទ្រង់ទ្រាយ​កាន់តែ​ធំឡើងៗ។

ផ្សាយពាណិជ្ជកម្ម

សេចក្តីរាយការណ៍​របស់ សេង ឌីណា

អំពើ​បះបោរ​របស់​ក្រុមជន​ប្រដាប់អាវុធ​កាន់សាសនា​អ៊ីស្លាម នៅខេត្ត​ចំនួន​បី (យ៉ាឡា ផាត់តានី និង​ណារ៉ាធីវ៉ាត់) នៅ​ជាប់​នឹង​ព្រំដែន​ប្រទេស​ម៉ាឡេស៊ី បាន​​ផ្ទុះឡើង​តាំង​ពី​ឆ្នាំ​២០០៤​មក ហើយ​បាន​បណ្តាល​ឲ្យ​មនុស្ស​ ចំនួន ៤៤០០​នាក់ បាត់បង់ជីវិត។

ថ្មីៗនេះ ក្រុមបះបោរ​​ហាក់ដូច​ជា​បាន​ប្តូរ​តាក់ទិក ដោយ​​កាត់បន្ថយ​ចំនួន​នៃ​ការ​វាយប្រហារ​​ ក៏ប៉ុន្តែ ការវាយប្រហារ​មួយលើកៗ​​មាន​ទ្រង់ទ្រាយ​កាន់តែ​សាហាវឡើង បណ្តាល​​ឲ្យ​មាន​អ្នក​ស្លាប់​ និង​របួស​កាន់តែ​ច្រើន​ឡើង។ កាល​ពី​ជាង​ពីរខែ​មុន​នេះ ក្រុមបះបោរ​បាន​ធ្វើការ​វាយប្រហារ​លើ​បន្ទាយ​យោធា​មួយ​កន្លែង ហើយ​បាន​សម្លាប់​ទាហាន​ថៃ​​យ៉ាងតិចចំនួន​៤នាក់។ មួយសប្តាហ៍ក្រោយមក ការវាយប្រហារ​មួយ​ទៀត បាន​បណ្តាល​ឲ្យ​មនុស្ស​ស្លាប់ ៩នាក់។

ការវាយប្រហារ​ចុងក្រោយ​បំផុត បាន​កើត​ឡើង​កាល​ពី​ថ្ងៃ​ចន្ទ ម្សិលមិញ។ ក្រុមបះបោរ​បាន​ដាក់​បង្កៃ​គ្រាប់បែក​ច្នៃ​ក្នុង​ឡាន​មួយ ហើយ​ប្រើ​ទូរស័ព្ទ​ដៃ​បញ្ជា​​បំផ្ទុះ នៅ​ក្នុង​ស្ថានីយ៍​ប៉ូលិស​មួយ​កន្លែង​ នៅ​ក្នុង​ខេត្ត​ណារ៉ាធីវ៉ាត់ បណ្តាល​ឲ្យ​ប៉ូលិស​ម្នាក់​រងរបួស។ នៅថ្ងៃ​ដដែល នៅខេត្ត​ផាត់តានី មន្រ្តី​ប៉ូលិស​ចូលនិវត្តន៍​ម្នាក់​ត្រូវ​បាន​ជន​មិនស្គាល់​មុខ​បាញ់​សម្លាប់ ហើយ​ចៅស្រី​របស់​គាត់​ម្នាក់​បាន​រងរបួស​ធ្ងន់។ គណៈសង្ឃ​នៅ​ខេត្ត​ផាត់តានី​បាន​ស្នើសុំ​ឲ្យ​ព្រះសង្ឃ​នៅតាម​ស្រុក​មួយចំនួន​ផ្អាក​ការ​ចេញ​បិណ្ឌបាត្រ​ជា​បណ្តោះ​អាសន្ន ក្រោយ​ពី​​មានការ​វាយប្រហារ​លើ​​ក្បួន​ព្រះសង្ឃ​កំពុង​បិណ្ឌបាត្រ កាល​ពី​ដើមខែ​មីនា​ថ្មីៗនេះ បណ្តាល​ឲ្យ​ព្រះសង្ឃ​មួយ​អង្គ​សុគត និង​២អង្គផ្សេង​ទៀត​រងរបួស។

គួរ​បញ្ជាក់ថា ខេត្ត​ប៉ែក​ខាងត្បូង​ប្រទេស​ថៃ មាន​ដើមកំណើត​ជា​ដែនដី​របស់​ម៉ាឡេស៊ី ក៏ប៉ុន្តែ ត្រូវ​បាន​​ថៃ​កាន់កាប់ និង​បាន​កាត់បញ្ចូល​ជា​ទឹកដី​ថៃ​ជាផ្លូវការ នៅឆ្នាំ​១៩០៩។ នៅ​ក្នុង​ខេត្ត​ទាំងនោះ ប្រជាជន​ភាគច្រើន មាន​ដើម​កំណើត​ម៉ាឡេ ហើយ​កាន់សាសនា​អ៊ីស្លាម។

មាន​អ្នក​ខ្លះ​រិះគន់​ថា អំពើ​បះបោរ​នៅ​ខេត្ត​ប៉ែកខាងត្បូង​​កើតឡើង គឺ​មក​​រដ្ឋាភិបាល​ក្រុងបាងកក​​មិន​បាន​គិតគូរ​​ដល់​​សេចក្តី​ត្រូវការ​របស់​ប្រជាជន​នៅ​ប៉ែកខាងត្បូង ដែល​ជា​ជនជាតិ​ភាគតិច ក្នុង​ចំណោម​ជនជាតិ​ថៃ។ អត្តសញ្ញាណ ភាសា សាសនា វប្បធម៌ និង​ប្រពៃណី​របស់​ពួក​ជនជាតិភាគតិច​ទាំងនេះ​​មិនត្រូវ​បាន​គេ​គោរព។ ជារឿយៗ ​ទាហានថៃ​ត្រូវ​ទទួលរង​នូវការ​ចោទប្រកាន់​ថា​បាន​ប្រើ​អំណាច​រំលោភ​ទៅលើ​ពួក​អ្នក​កាន់​សាសនា​អ៊ីស្លាម ដើមកំណើត​ម៉ាឡេ​ទាំងនេះ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI