ថៃ

សភា​ថៃ​អនុម័ត​ច្បាប់​លើកលែង​ទោស​ដោយមាន​បាតុកម្ម​ទ្រង់ទ្រាយ​ធំ​ប្រឆាំង

ដោយ៖ អៀង សុខម៉ិញ
១១ នាទី

បាតុករ​ថៃ​រាប់​ពាន់​នាក់​ បាន​បន្ត​ប្រមូល​ផ្តុំ​គ្នាទៀត នៅ​ថ្ងៃ​សៅរ៍​នេះ​ គម្រប់​​បី​ថ្ងៃ​ជាប់​គ្នា​ នៅ​ទីក្រុង​បាងកក ដើម្បី​បរិហារ​ប្រឆាំង​នឹង​ច្បាប់​លើក​លែងទោស ដែល​អាច​ជា​ការ​បើក​ផ្លូវ​ឱ្យ​អតីត​នាយក​រដ្ឋមន្ត្រី​ថៃ ថាក់ស៊ីន ស៊ីណាវ៉ាត្រា វិល​ចូល​មាតុប្រទេស​វិញបាន។

ផ្សាយពាណិជ្ជកម្ម

សភា​ថៃ​បាន​បោះឆ្នោត​អនុម័ត​​ហើយ នៅ​ល្ងាច​ថ្ងៃ​សុក្រ​ម្សិលមិញ​ បន្ទាប់​ពី​បាន​បើក​កិច្ច​ពិភាក្សា​អស់​រយៈ​ពេល​បី​លើក។ ច្បាប់​នេះ​នឹង​ត្រូវ​បញ្ជូន​ទៅ​កាន់​ព្រឹទ្ធ​សភា​ អនុម័ត​សិន មុន​នឹង​អាច​ចូល​ជា​ធរមាន​បាន។

គណបក្សប្រឆាំង​ដែល​សន្យា​ធ្វើ​គ្រប់យ៉ាង​ ដើម្បី​ខ្ទាស់​មិន​ឱ្យ​ច្បាប់​លើកលែងទោស​អាច​ចេញ​រួច​នោះ ទោះ​ត្រូវ​ឡើង​ដល់​តុលាការ​ធម្មនុញ្ញ​ក៏​ដោយ​នោះ បាន​ប្រកូក​ប្រកាស​ធ្វើ​បាតុកម្ម​ជា​ថ្មី​ទៀត នៅ​ថ្ងៃសៅរ៍​នេះ ជា​គម្រប់​បី​ថ្ងៃ​ជាប់​គ្នា។ ប៉ុន្តែ​​មាន​បាតុករ​ប្រមាណ​ជិត​បីពាន់​នាក់​ប៉ុណ្ណោះ​ ដែល​​បាន​ឆ្លើយ​តប​ទៅ​នឹង​ការ​អំពាវនាវ​របស់​បក្ស​ប្រជាធិបតេយ្យ​ មក​ប្រមូល​ផ្តុំ​គ្នា​ស្រែក​ប្រឆាំង​ច្បាប់​លើក​លែង​ទោស។ ពោល​គឺ​ខុស​ឆ្ងាយ​ស្រឡះ​ពី​ការ​គ្រោង​ទុក។

តាមការ​ពិត តាំង​ពី​ថ្ងៃ​ដំបូង​នៃ​​​បាតុកម្ម ថ្ងៃ​ព្រហស្បតិ៍​ទី ៣១​តុលា មក គណបក្ស​ប្រឆាំង​ ដែល​សកម្មជន​ភាគ​ច្រើន​ជា​អ្នក​មាន​ក្នុង​ក្រុង និង​ជា​សម្ព័ន្ធ​មិត្ត​របស់​ក្រុម​អាវ​លឿង​រាជានិយម​នោះ ​មិន​អាច​ប្រមូល​ផ្តុំ​​​បាតុករបាន​ហ្វូង​ហ្វាយ​មក​គំរាម​រដ្ឋាភិបាល លោកស្រី​យីងឡាក់​​ ឱ្យ​បោះបង់​ផែនការ​កំណែទម្រង់​នេះ​បាន​ឡើយ។

ម្យ៉ាង​ទៀត​ សម្រាប់​អ្នក​គាំទ្រ​ ច្បាប់​លើក​ទោស​ដែល​​សភា​​ទើប​អនុម័ត​​នេះ គឺ​ជា​ចំណុច​ចាប់​ផ្តើម​ថ្មី​​ ប្រកប​ដោយ​ភាព​ស្អាត​ស្អំ​ ខណៈ​ដែល​ប្រទេស​នេះ​បាន​ស្គាល់​តែ​ភាព​បែង​ចែង​ អស់​ជា​ច្រើន​ឆ្នាំ​រវាង​អ្នក​ក្រុង និង​អ្នក​ជនបទដែល​គាំទ្រ​និង​​ចូល​ចិត្ត​អតីត​នាយក​រដ្ឋមន្ត្រី រី​ឯ​អ្នក​មាន​អ្នក​បាងកក​ណែប​ណិត​រាជរាំង​ស្អប់​​លោក​ថាក់ស៊ីន។ ​បែង​ចែក​រហូត​​ រុញ​ច្រាន​ថៃ​ឱ្យធ្លាក់ក្នុង​វិបត្តិ​ ហិង្សា​ជា​ប្រវត្តិសាស្ត្រ​​ នៅ​ឆ្នាំ​២០១០ ស្លាប់​មនុស្ស​ជាង​៩០​នាក់ និង​របួស​ជាង​១៩០០​នាក់៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI