អានតួអត្ថបទ
ថៃ

រដ្ឋាភិបាល​ថៃ​ផ្តើម​ចរចា​ជាមួយ​ពួក​ឧទ្ទាម​អ៊ីស្លាម​នៅ​ដែនដី​ប៉ែក​ខាង​ត្បូង​ប្រទេស

លោក​Yutthasak Sasiprapa ឧបនាយក​រដ្ឋមន្រ្តី​​ថៃ​​ទទួល​​បន្ទុក​សន្តិសុខ​​ជាតិ។
លោក​Yutthasak Sasiprapa ឧបនាយក​រដ្ឋមន្រ្តី​​ថៃ​​ទទួល​​បន្ទុក​សន្តិសុខ​​ជាតិ។
ដោយ៖ តាន់ ហ្សង់-ហ្វ្រង់ស័រ
១១ នាទី

រដ្ឋាភិបាល​ថៃ​បាន​ទម្លាយ​ឱ្យ​ដឹង​នៅ​ថ្ងៃ​ព្រហស្បតិ៍​ទី​១៦​សីហា​នេះ​ថា ខ្លួន​បាន​ផ្តើម​ជជែក​គ្នា​ជាមួយ​ពួក​ឧទ្ទាម​អ៊ីស្លាម។ គោលដៅ​ចុង​ក្រោយ គឺ​ធ្វើ​តំបន់​ប៉ែក​ខាង​ត្បូង​នៃ​ប្រទេស​ស្គាល់​សន្តិភាព។ 

ផ្សាយពាណិជ្ជកម្ម

 មិន​ទាន់​ជា​កិច្ចចរចា​នៅ​ឡើយ​ទេ តែ​ជា​ការ​ផ្តើម​ជជែក​គ្នា។ នេះ​បើ​យោង​ទៅ​តាម​សំដី​លោក​Yutthasak Sasiprapa ឧបនាយក​រដ្ឋមន្រ្តី​ថៃ​ទទួល​បន្ទុក​សន្តិសុខ​ជាតិ។

 
លោក​រដ្ឋមន្រ្តី​ថៃ​រូប​នេះ​បាន​ទម្លាយ​ឱ្យ​ដឹង​ទៀត​ថា រដ្ឋាភិបាល​បាន​ប្រគល់​ភារកិច្ច​នៃ​ការ​ជជែក​គ្នា​ជាមួយ​ពួក​ឧទ្ទាម​ថៃ​អ៊ីស្លាម​នេះ​ទៅ​ឱ្យ​អាជ្ញាធរ​មូលដ្ឋាន​នៃ​តំបន់​ប៉ែក​ខាង​ត្បូង​នៃ​ប្រទេស។

សូម​ជម្រាប​ថា តាំង​ពី​ឆ្នាំ​២០០៤​មក សកម្មភាព​របស់​ពួក​ឧទ្ទាម​ថៃ​អ៊ីស្លាម​នៅ​ក្នុង​ដែនដី​ប៉ែក​ខាង​ត្បូង ដូច​ជា​នៅ​ណារ៉ាទីវ៉ាត់(Narathiwat) ប៉ាត់តានី(Pattani) និង​យ៉ាឡា(Yala) បាន​បណ្តាល​ឱ្យ​មាន​ស្លាប់​៥ ០០០នាក់។ ពួក​ឧទ្ទាម​ទាំង​នេះ ជា​អ្នក​ទាមទារ​ផ្តាច់​ទឹក​ដី និង​ជា​អ្នក​បម្រើ​ចលនា​Runda Kumpulan Kecil។ ភេរវកម្ម​របស់​ពួក​ឧទ្ទាម​តម្រង់​ជាពិសេស​ទៅ​លើ​ទាហាន នគបាល ពុទ្ធបរិស័ទ​និង​ពួក​ថៃ​អ៊ីស្លាម​ណា​ដែល​ចូល​ដៃ​ជាមួយ​អាជ្ញាធរ​មូលដ្ឋាន។

នៅ​ថ្ងៃ​ព្រហស្បតិ៍​នេះ លោក​ឧបនាយក​រដ្ឋមន្ត្រី​ថៃ​Yutthasak Sasiprapa បាន​អះអាង​ថា រដ្ឋាភិបាល​បាន​ផ្តើម​ជជែក​គ្នា មិនមែន​ជាមួយ​ចលនា​Runda Kumpulan Kecil​ទេ​ តែ​ជាមួយ​ពួក​អ្នក​ដែល​បាន​ផ្តាច់​ខ្លួន​ចេញ​ពី​ចលនា​នេះ។ គួរ​គូស​បញ្ជាក់​ថា កាល​ពី​ខែ​មេសា​កន្លង​ទៅ​រដ្ឋាភិបាល​ថៃ​បាន​សម្រេច​ចិត្ត​ផ្តាច់​ការ​ចរចា​ជាមួយ​ចលនា​Runda Kumpulan Kecil ក្រោយ​ពី​មាន​ភេរវកម្ម​នៅ​យ៉ាឡា​រួច​មក ភេរវកម្ម​ដែល​កាល​ណោះ​បាន​បណ្តាល​ឱ្យ​មាន​ស្លាប់​១៥​នាក់។

ដែនដី​ប៉ែក​ខាង​ត្បូង​នេះ ដែល​ប្រជាជន​ភាគ​ច្រើន​ជា​ជនជាតិ​ម៉ាឡេ​អ្នក​កាន់​សាសនា​អ៊ីស្លាម ត្រូវ​បាន​ថៃ​លេប​យក​នៅ​ឆ្នាំ​១៩០៩ ហើយ​តាំង​ពី​ពេល​នោះ​មក ប្រជាជន​នៅ​ទី​នោះ​តែងតែ​ងើប​បះបោរ​យូរៗ​ម្តង។ ក៏​ប៉ុន្តែ អំពើ​ហិង្សា​មិន​ដែល​មាន​លក្ខណៈ​ធ្ងន់ធ្ងរ​និង​យូរ​អង្វែង​ដូច​៨​ឆ្នាំ​ចុង​ក្រោយ​នេះ​ទេ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ