ថៃ

សកម្មជន​អាវក្រហម​ថៃ​គាំទ្រ​នាយករដ្ឋមន្ត្រី​​យីងឡាក់​ ប្រកាស​ធ្វើបាតុកម្ម​ថ្ងៃ​៥មេសា​

បាតុកម្ម​របស់​សកម្មជន​អាវក្រហម​គាំទ្រ​រដ្ឋាភិបាល​ នៅក្រុង​បាងកក កាលពី​​ឆ្នាំ​២០០៩។
បាតុកម្ម​របស់​សកម្មជន​អាវក្រហម​គាំទ្រ​រដ្ឋាភិបាល​ នៅក្រុង​បាងកក កាលពី​​ឆ្នាំ​២០០៩។ REUTERS/Chaiwat Subprasom

នៅល្ងាច​​ថ្ងៃ​សៅរ៍​ម្សិលមិញ ក្រុម​​អាវក្រហម​ថៃ​ដែល​​គាំទ្រ​លោកស្រី​យីងឡាក់ បាន​ប្រកាស​​ថា នឹង​ធ្វើបាតុកម្ម បង្កើន​ចលនា​គាំទ្រ​នាយករដ្ឋមន្ត្រី​ថៃ អោយបាន​កាន់តែ​ខ្លាំងក្លា​ថែមទៀត។ យោងតាម​​មេដឹកនាំ​ចលនា​អាវក្រហម​មួយរូប ការជួបជុំ​គាំទ្រ​លោកស្រីយីងឡាក់ នឹង​ត្រូវ​ធ្វើ​នៅ​ថ្ងៃ​៥មេសា​ខាងមុខ ហើយ​អាច​នឹង​ធ្វើនៅ​ក្រុង​បាងកក។​

ផ្សាយពាណិជ្ជកម្ម

នៅ​ល្ងាចថ្ងៃ​សៅរ៍ម្សិលមិញ ​ការប្រកាស​​របស់​ក្រុមអាវក្រហម​ថៃ ដើម្បី​រៀបចំ​សកម្មភាព​បាតុកម្ម សំដែង​ការ​គាំទ្រដល់​​នាយករដ្ឋមន្ត្រី​យីងឡាក់​ ធ្វើឡើង​តែ​មួយថ្ងៃ​ប៉ុណ្ណោះ បន្ទាប់​ពី​តុលាការ​ធម្មនុញ្ញ​ថៃ​បានប្រកាស​​ថា ការបោះឆ្នោត​ជាតិ​​កាលពី​ថ្ងៃ២​កុម្ភៈ គ្មាន​សុពលភាព​​នោះទេ។ គួររំលឹកថា តុលាការ​ធម្មនុញ្ញ​បាន​សម្រេច​ដូច្នេះ ដោយសារ​តែ​ការបោះឆ្នោត​សភា​ថ្ងៃ​២កុម្ភៈ ត្រូវ​បានក្រុមបាតុករ​ប្រឆាំង​លោកស្រី​យីងឡាក់ ​​រាំងស្ទះ​នៅតាម​មណ្ឌល​បោះឆ្នោត​២០ភាគរយ ទូទាំង​ប្រទេស។ ប្រធាន​គណៈកម្មការ​បោះឆ្នោត​បាន​ប្រកាស​ថា ត្រូវការ​ពេល​វេលា​​យូរខែ​ទៀត ដើម្បី​រៀបចំ​ការបោះឆ្នោត​ជាថ្មី។

សកម្មជន​អាវក្រហម​ចង់​ធ្វើបាតុកម្ម​ គាំទ្រ​លោកស្រី យីងឡាក់ នៅថ្ងៃ​៥មេសា​ខាងមុខ ដើម្បី​បង្ហាញ​ទៅ​សកម្មជន​ប្រឆាំងរដ្ឋាភិបាល ពិសេស​ទៅ​លោក​ស៊ូថេប ជា​មេដឹកនាំ​ចលនា​​ប្រឆាំង​ដ៏សំខាន់​នោះថា ពួកគេ​មិនត្រូវការ​រដ្ឋាភិបាល​ដែល​កើតចេញ​ពីការ​បោះឆ្នោត ពួកគេ​មិន​ទទួល​ស្គាល់​នាយករដ្ឋមន្ត្រី​​ដែល​​ក្រុមប្រឆាំងតែងតាំងនោះទេ។ ​​

​លោក ចាទុផន ព្រំប៉ាន់ ជាមេដឹកនាំ​​ចលនា​អាវក្រហម មកពី​រណសិរ្ស​រួបរួមគ្នា​ដើម្បី​​លទ្ធិ​ប្រជាធិបតេយ្យ​ បានអំពាវនាវ​អោយ​សកម្មជន​​​​គាំទ្រ​​លោកស្រី​យីងឡាក់​​ ត្រៀម​ជួបជុំគ្នា​​នៅថ្ងៃ​៥មេសា អាច​នឹង​ធ្វើនៅក្រុងបាងកក ​រឺក៏​នៅ​កន្លែង​ណាផ្សេងទៀត​ក៏ថា​បាន។ ក្រុមអាវក្រហម​នឹង​​​ប្រកាសពី​​ទីកន្លែង​បាតុកម្ម​ពិតប្រាកដ​ ​នៅពេលក្រោយ​ទៀត។

គួររំលឹក​ថា វិបត្តិថៃ​ជាង​៤ខែ​មកនេះ គឺបង្ក​ឡើង​ដោយ​បាតុកម្ម​ប្រឆាំង​រដ្ឋាភិបាល​លោកស្រី​ យីងឡាក់ ដែល​ចោទ​លោកស្រី​ពីបទ​ពុករលួយ និង​ជាអាយ៉ង​របស់​អតីតនាយករដ្ឋមន្ត្រី​ថាក់ស៊ីន ដែល​ត្រូវបាន​​កងទ័ព​ទំលាក់​ពី​អំណាច កាលពី​ឆ្នាំ​២០០៦ ហើយ​កំពុងភៀសខ្លួន​នៅក្រៅប្រទេស ក្រោយតុលាការ​កាត់ទោស​​ពីបទ​ពុករលួយ។​ ​អំពើហិង្សា​​​ក្នុង​បាតុកម្ម​ប្រឆាំង​រដ្ឋាភិបាល​ថៃ តាំង​ពី​វិច្ឆិកា បាន​សម្លាប់​មនុស្ស​២៣នាក់ និងបង្ក​អោយ​មាន​មនុស្ស​រាប់រយនាក់​រងរបួស​រួចមកហើយ។

កន្លងមក សកម្មជន​អាវក្រហម​ដែលគាំទ្រ​លោកស្រី យីងឡាក់ មិនសូវ​ចេញមុខ​​នោះទេ ទើប​តែ​នៅ​ក្រោយពេលតុលាការ​ធម្មនុញ្ញ​ប្រកាស​មិនទទួលស្គាល់​សុពលភាព​​ការបោះឆ្នោត​សភា​ថ្ងៃ​២កុម្ភៈ​ប៉ុណ្ណោះ​ ទើប​ពួកគេ​សម្រេច​ចិត្ត​​​ថា​នឹង​ធ្វើសកម្មភាព​សារជាថ្មី៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI