ភូមា

លោក​ថេន សេន​​មិនជំទាស់​នឹង​រឿង​លោកស្រី​អ៊ុងសានស៊ូជី​ឡើង​ធ្វើ​ជា​ប្រធានាធិបតី

លោក​ ថេន សេន ប្រធានាធិបតី​ភូមា នៅ​ទីក្រុង​ញូវយ៉ក
លោក​ ថេន សេន ប្រធានាធិបតី​ភូមា នៅ​ទីក្រុង​ញូវយ៉ក REUTERS/Chip East

លោក​ប្រធានាធិបតី​ថេន សេន បាន​ប្រាប់​ទូរទស្សន៍​ BBC កាល​ពី​ថ្ងៃសៅរ៍​ម្សិលមិញ​ ថា លោក​នឹង​ទទួលស្គាល់​លោកស្រី​អ៊ុង សានស៊ូជី ជា​ប្រធានាធិបតី ប្រសិនបើ​លោកស្រី​ជាប់ឆ្នោត។ ក៏ប៉ុន្តែ លោក​ថេន សេន ក៏​បាន​បញ្ជាក់បន្ថែម​ផងដែរ​ថា លោក​តែ​ម្នាក់​ឯង​មិនមាន​អំណាច​កែប្រែច្បាប់ ដែល​ហាមមិនឲ្យ​លោកស្រី​ប្រមុខដឹកនាំ​ប្រឆាំង​ឈរឈ្មោះ​ជា​ប្រធានាធិបតី​បាន​នោះទេ។

ផ្សាយពាណិជ្ជកម្ម

នៅក្នុង​ដំណើរទស្សនកិច្ច​ជាលើកទី១ ទៅកាន់​សហរដ្ឋ​អាមេរិក នៅពេលនេះ​ លោក​ថេន សេន​ ពិតជា​បាន​ទាក់ទាញ​ចំណាប់អារម្មណ៍​ពី​សហគមន៍​អន្តរជាតិ​មិនតិច​នោះទេ ជាពិសេស ទាក់ទង​នឹង​ជំហរ​របស់​លោក​ ចំពោះ​លោកស្រី ​អ៊ុង សានស៊ូជី។

កាលពីថ្ងៃ​ព្រហស្បតិ៍ នៅ​ក្នុង​សុន្ទរកថា ចំពោះ​អង្គមហាសន្និបាត​អ.ស.ប. លោក​​​ថេន សេន អតីត​មេដឹកនាំ​ជាន់ខ្ពស់​ក្នុង​របបសឹកភូមា​ បាន​លើកសរសើរ​ចំពោះ​ការតស៊ូ ដើម្បី​លទ្ធិប្រជាធិបតេយ្យ ​របស់​លោកស្រី​ប្រមុខដឹកនាំ​ប្រឆាំង និង​ជា​អតីត​អ្នក​ទោស​នយោបាយ​របស់​លោក​។

ពីរថ្ងៃ​ក្រោយទៀត ក្នុង​បទសម្ភាសន៍​ជាមួយ​ទូរទស្សន៍​អង់គ្លេស BBC លោក​​ប្រធានាធិបតី​ ថេន សេន បាន​បញ្ជក់ថា លោក និង​លោកស្រី​អ៊ុង សានស៊ូជី កំពុងតែ​ធ្វើការ​ជាមួយគ្នា ហើយ​គ្មាន​បញ្ហា​អ្វី​នឹង​គ្នា​ទេ ហើយថា លោក​នឹង​ទទួលស្គាល់​លោកស្រី អ៊ុង សានស៊ូជី ជា​ប្រធានាធិបតី ​ប្រសិនបើ​ប្រជាពលរដ្ឋ​ភូមា​បោះឆ្នោត​ជ្រើសរើស​លោកស្រី។ ក៏ប៉ុន្តែ លោក​ប្រធានាធិបតី​ភូមា​បាន​បញ្ជាក់បន្ថែម​ថា លោក​តែ​ម្នាក់ឯង គ្មាន​សិទ្ធិ​អំណាច​កែប្រែ​រដ្ឋធម្មនុញ្ញ ដែល​ហាម​ឃាត់​លោកស្រី​អ៊ុង សានស៊ូជី មិន​ឲ្យ​ឈរឈ្មោះ​ជា​ប្រធានាធិបតី​បានទេ។ ការកែប្រែ​រដ្ឋធម្មនុញ្ញ​នេះ គឺ​វា​អាស្រ័យ​ទៅលើ​ឆន្ទៈ​របស់​ប្រជាជន​ភូមា និង​ឆន្ទៈ​របស់​សមាជិក​សភា។

គួរបញ្ជាក់ថា រដ្ឋធម្មនុញ្ញ ដែល​តាក់តែង​ឡើង​ដោយ​មេដឹកនាំ​យោធា​ភូមា​ មានចែង​ហាម​មិនឲ្យ​អ្នក​នយោបាយ​ភូមា​ណា ដែល​មាន​សាច់ញាតិ​ជាប់​សញ្ជាតិ​បរទេស​ឈរឈ្មោះ​ជា​ប្រធានាធិបតី។ ដូច្នេះ បើ​មិនមាន​ការ​ធ្វើ​វិសោធនកម្ម​លើ​រដ្ឋធម្មនុញ្ញ​នេះទេ លោកស្រី​អ៊ុង សានស៊ូជី ដែល​មាន​​ស្វាមី​ និង​កូនប្រុស​ពីរ​ជា​ពលរដ្ឋ​​​អង់គ្លេស មិនមាន​សិទ្ធិ​ឈរឈ្មោះ​ក្នុងការ​បោះឆ្នោត​ប្រធានាធិបតី​ភូមា នៅ​ឆ្នាំ​២០១៥​ខាងមុខនេះ​បានទេ។

នៅក្នុង​បទសម្ភាសន៍​ជាមួយ​ទូរទស្សន៍ BBC ម្សិលមិញ​នេះ លោក​ថេន សេន ក៏​បាន​លើកសរសើរ​ផងដែរ ចំពោះ​តួនាទី​របស់​កងទ័ពភូមា ដែល​យោងតាម​រដ្ឋធម្មនុញ្ញ​ភូមា កងទ័ព​ត្រូវ​ទទួល​បាន​អាសនៈ ១ភាគ ៤ ក្នុង​រដ្ឋសភា​ដោយស្វ័យប្រវត្តិ។ លោក​ថេន សេន ដែល​ជា​អតីត​ឧត្តមសេនីយ៍​មួយរូបដែរនោះ​បាន​​បញ្ជាក់ថា គេ​មិន​អាច​ផាត់​កងទ័ព​ចេញពី​នយោបាយ​ភូមា​បានទេ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI