ខេត្តព្រះសីហនុ នឹងរៀបចំព្រឹត្តិការណ៏រត់ពាក់កណ្តាលម៉ារ៉ាតុងអន្តរជាតិ លើកទី៣ នៅខែមិនា
ចុះផ្សាយនៅថ្ងៃ៖ កែប្រែថ្ងៃទី៖
ព្រឹត្តិការណ៏រត់ប្រណាំងពាក់កណ្តាលម៉ារ៉ាតុងអន្តរជាតិ លើកទី៣ ឆ្នាំ២០១៤ នឹងត្រូវរៀបចំឡើង នៅថ្ងៃទី០៩ ខែមិនាខាងមុខ។ ការរៀបចំព្រឹត្តិការណ៏នេះឡើង ត្រូវបានអះអាងថា គឺដើម្បីផ្សព្វផ្សាយពីសកម្មភាពការពារធម្មជាតិ និងភពផែនដី និងជាផ្នែកមនុស្សធម៌មួយ សម្រាប់ជួយដល់មន្ទីរពេទ្យ និងស្ថាប័នអប់រំមួយចំនួន។ នេះបើយោងតាមការធ្វើសន្និសីទកាសែត ស្តីពីការរៀបចំព្រឹត្តិការណ៏ពាក់កណ្តាលម៉ារ៉ាតុងអន្តរជាតិ នៅព្រឹកថ្ងៃទី១០កុម្ភៈនេះ។
ព្រឹត្តិការណ៏រត់ប្រណាំងពាក់កណ្តាលម៉ារ៉ាតុងអន្តរជាតិ ឆ្នាំ ២០១៤ នឹងត្រូវរៀបចំនៅ ឆ្នេរអូឈើទាល ក្នុងខេត្តព្រះសីហនុ នៅថ្ងៃទី០៩ ខែមិនា ខាងមុខ។ នេះបើតាម លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា ដែលបានថ្លែង នៅក្នុងសន្និសីទកាសែត នាទីស្នាក់ការគណៈកម្មកាធិការជាតិអូឡាំពិក នៅព្រឹកថ្ងៃច័ន្ទនេះ។ លោក វ៉ាត់ ចំរើន បាននិយាយថា ព្រឹត្តិការណ៍នេះ នឹងធ្វើឡើង ក្រោមខ្លឹមសារ ដើម្បីការពារធម្មជាតិ សង្គ្រោះផែនដី និងសុខុមាលភាព នៃមនុស្សលោក។
លោក វ៉ាត់ ចំរើន បានបន្តថា ថវិកាដែលបានមកពីព្រឹត្តិការណ៏រត់ប្រណាំងនេះ នឹងយកទៅជួយដល់មន្ទីរពេទ្យកុមារ ជួយដល់កុមារក្រីក្រ និងឆ្មាំតាមឆ្នេរអូឈើទាល នៅខេត្តព្រះសីហនុ។
បើតាមអគ្គលេខាធិការគណៈកម្មាធិការជាតិអូឡាំពិកកម្ពុជាដដែល វិញ្ញាសាចំនួន ៣ នឹងត្រូវដាក់ឲ្យប្រកួតនៅក្នុងព្រឹត្តិការណ៏នេះ ដែលរួមមាន ការរត់ពាក់កណ្ដាលម៉ារ៉ាតុង២១គីឡូម៉ែត្រ, រត់១០គីឡូម៉ែត្រ និង ៣គីឡូម៉ែត្រជាលក្ខណៈគ្រួសារ។ គិតត្រឹម ថ្ងៃទី១០កុម្ភៈនេះ លោក វ៉ាត់ ចំរើន បានអះអាងថា មានបេក្ខជនមកចុះឈ្មោះ រត់ប្រណំាងប្រមាណជាង ១ពាន់នាក់ហើយ ដែលពួកគេបានមកពីបណ្តាប្រទេសប្រមាណជា២១ លើពិភពលោក។
សូមបញ្ជាក់ថា ព្រឹត្តិការណ៏រត់ពាក់កណ្តាលម៉ារ៉ាតុង ចម្ងាយជាង ២០គីឡូម៉ែត្រនេះ បានរៀបចំជាច្រើនដង នៅទឹកដីអង្គរ ខេត្តសៀមរាប និង២ដង នៅទឹកដីសមុទ្រ ខេត្តព្រះសីហនុ។ កាលពីឆ្នាំ ២០១៣ ព្រឹត្តិការណ៏នេះ មានអ្នកចូលរួមរត់ប្រណាំង ប្រមាណជា ១៤០០នាក់។ ថ្នាក់ដឹកនាំផ្នែកកីឡារំពឹងថា នៅក្នុងឆ្នាំនេះ នឹងមានចំនួនអ្នកចូលរួម គ្រប់ជាតិសាសន៏ ច្រើនជាងឆ្នាំកន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ