មហាបាតុកម្មបីថ្ងៃរបស់បក្សសង្គ្រោះជាតិបានបិទបញ្ចប់ដោយគ្មានអំពើហិង្សា
ចុះផ្សាយនៅថ្ងៃ៖ កែប្រែថ្ងៃទី៖
បាតុកម្មរយៈពេលបីថ្ងៃរបស់គណបក្សសង្គ្រោះជាតិ បានបិទបញ្ចប់ហើយនៅថ្ងៃសុក្រទី២៥ តុលានេះបន្ទាប់ពីបានដង្ហែញត្តិទៅកាន់ស្ថានទូតចំនួន៨នៅក្នុងទីក្រុងភ្នំពេញ និងអង្គការសហប្រជាជាតិ។ ប្រធានគណបក្សសង្គ្រោះជាតិ បានអះអាងថាបាតុកម្មអហិង្សារយៈពេលបីថ្ងៃនេះបានទទួលជោគជ័យ ព្រោះតែការចូលរួមដោយស្ម័គ្រចិត្ត ពីបាតុកររាប់ម៉ឺននាក់។ បាតុកម្មនេះ បានបញ្ចប់ដោយគ្មានអំពើហិង្សាទេ។
បាតុកម្មរយៈពេលបីថ្ងៃរបស់គណបក្សសង្គ្រោះជាតិដែលដឹកនាំដោយ លោក សម រង្សី និងលោក កឹម សុខា បានបិទបញ្ចប់ហើយនៅថ្ងៃសុក្រ ទី២៥ តុលានេះ។ នៅម៉ោងប្រមាណជា៣រសៀល លោក សម រង្ស៊ី និងលោក កឹម សុខា បានថ្លែងបិទមហាបាតុកម្ម ដោយបានអរគុណដល់ប្រជាពលរដ្ឋទាំងអស់ដែលបានចូលរួមមហាបាតុកម្មអហិង្សាលើកទី៣នេះ ប្រកបដោយជោគជ័យ។ ជោគជ័យព្រោះថា មានប្រជាពលរដ្ឋយ៉ាងតិចណាស់៥ម៉ឺននាក់ បានចូលរួមធ្វើបាតុកម្ម គ្មានផ្ទុះអំពើហិង្សានិងជាបាតុកម្មដោយស្ម័គ្រចិត្ត។
លោក សម រង្ស៊ី ប្រធានគណបក្សសង្គ្រោះជាតិ បានហៅការចូលរួមដោយស្ម័គ្រចិត្តនេះថា ជាជ័យជំនះសីលធម៌ ព្រោះថាជាបាតុកម្មដែលស្តែងឡើងពីឆន្ទះរបស់ប្រជាពលរដ្ឋខ្មែរ។ ជោគជ័យមួយទៀតគឺការទទួលយកញ្ញតិពីសំណាក់អង្គការសហប្រជាជាតិ បណ្តាប្រទេសធំៗទាំង៨ ដែលរួមទាំងមហាអំណាច ដូចជាអាមេរិក បារាំង និងចិនជាដើម។
លោក សម រង្ស៊ី ដែលបានដឹកនាំក្បួនដង្ហែញត្តិដោយផ្ទាល់ បានអះអាងទៅកាន់អ្នកសារព័ត៌មានក្រោយការដាក់ញត្តិថា ទាំងឧត្តមស្នងការទទួលបន្ទុកសិទ្ធមនុស្ស របស់អង្គការសហប្រជាជាតិ និងបណ្តាប្រទេសទាំងអស់ បានសន្យាថានឹងបញ្ជូនញត្តិទាមទាររបស់គណបក្សសង្គ្រោះជាតិ ទៅកាន់រដ្ឋាភិបាលរបស់ប្រទេសគេរៀងៗខ្លួន។
ក្នុងមហាបាតុកម្មពីថ្ងៃទី២៣ ដល់ថ្ងៃទី២៥តុលានេះ គណបក្សប្រឆាំងមួយនេះ បានដង្ហែញត្តិដែលមានស្នាមមេដៃប្រជាពលរដ្ឋប្រមាណជាង២លានស្នាមមេដៃ ទៅកាន់អង្គការសហប្រជាជាតិ រួមទាំងស្ថានទូតចំនួន៨ ក្នុងរាជធានីភ្នំពេញ ក្នុងនោះមានស្ថានទូតអាមេរិក បារាំង អង់គ្លេស អូស្ត្រាលី ជប៉ុន ឥណ្ឌូនេស៊ី ចិន និងរូស្ស៊ី។ អត្ថន័យក្នុងញត្តិនោះ គឺទាមទារ ឱ្យអង្គការសហប្រជាជាតិ និងប្រទេសហត្ថលេខីកិច្ចព្រមព្រៀងទីក្រុងប៉ារីស ជួយដោះស្រាយវិបត្តិនយោបាយនៅកម្ពុជាបច្ចុប្បន្ន និងជម្រុញឱ្យរដ្ឋាភិបាលកម្ពុជាគោរពពេញលេញនូវកិច្ចព្រមព្រៀងនេះ។
គួររំលឹកថា ថ្ងៃមហាបាតុកម្មលើកទី៣របស់គណបក្សសង្គ្រោះជាតិនេះ គេសង្កេតឃើញថា មិនមានអំពើហិង្សាអ្វីផ្ទុះឡើងរវាងកងកម្លាំងអាជ្ញាធរ និងក្រុមបាតុករ បើទោះបីជាមនុស្សរ៉ាប់ម៉ឺននាក់ បានដើរដង្ហែក្បួនក៏ដោយ។ ដែលនេះ ខុសកាលពីមហាបាតុកម្ម កាលពីពាក់កណ្តាលខែកញ្ញាកន្លងទៅ ដែលបណ្តាលឱ្យពលរដ្ឋម្នាក់ បានស្លាប់ដោយការបាញ់ប្រហារ។
សូមបញ្ជាក់ថា លោក សម រង្ស៊ី លោក កឹម សុខា និងមេដឹកនាំគណបក្សសង្គ្រោះជាតិ បានចាក់ចេញពីទីលានប្រជាធិបតេយ្យតាំងពីម៉ោងប្រមាណជាង៣រសៀលនៅថ្ងៃទី២៥នេះប៉ុន្តែបាតុករមួយចំនួននៅតែបន្តនៅរាំ ច្រៀង នៅលើទីលានប្រជាធិបតេយ្យខណៈ ដែលបាតុករមួយចំនួនធំ បានធ្វើដំណើរទៅកាន់លំនៅដ្ឋានរៀងខ្លួនហើយនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ