ស៊ីរី

បទឈប់បាញ់​​ប៉ែក​​ខាងត្បូង​​​ស៊ីរី​​ ផ្តួចផ្តើម​​ដោយ​​លោក​​ដូណាល់ ត្រាំ​ និង​​លោក​​ពូទីន​ ​ចូល​ជា​​ធរមាន​​​

ខែត្រ​ឌែររ៉ាអា ភាគ​ខាងត្បូង​ស៊ីរី
ខែត្រ​ឌែររ៉ាអា ភាគ​ខាងត្បូង​ស៊ីរី REUTERS/Alaa Al-Faqir

ស្ថានភាព​​​នៅ​ប៉ែកខាងត្បូង​ស៊ីរី បាន​ស្ងប់ស្ងាត់​ នៅ​ថ្ងៃ​អាទិត្យ​ម្សិលមិញ ​ក្រោយ​​បទឈប់បាញ់​​ដែល​​​ផ្តួចផ្តើម​ដោយ​រុស្ស៊ី អាមេរិក និង​ហ្ស៊កដានី បាន​ចូលជា​ធរមាន។ ថ្ងៃចន្ទ​នេះ ​រដ្ឋាភិបាល​ស៊ីរី និង​ក្រុម​ប្រឆាំង​ជួបពិភាក្សា​គ្នា​ជាថ្មី​ទៀត នៅ​ទីក្រុង​ហ្សឺណែវ ហើយដូចរាល់​ដងដែរ ​​ប្រហែល​ជា​ពិបាកសង្ឃឹម​ថា​​​នឹង​​​​រកបាន​ដំណោះស្រាយវិបត្តិ​ស៊ីរី។ ​

ផ្សាយពាណិជ្ជកម្ម

ខែត្រ​ចំនួន​៣ នៅ​ភាគខាងត្បូង​ស៊ីរី ដែល​បទឈប់បាញ់​ចូលជាធរមាន​តាំងពី​ថ្ងៃអាទិត្យ​ម្សិលមិញ​នេះ គឺ​ខែត្រ​ឌែររ៉ាអា ​គូណេត្រា និង​ស៊ូអីដា។ បទឈប់បាញ់​នេះ ត្រូវ​រុស្ស៊ី​ប្រកាស​ឡើង កាលពី​ថ្ងៃសុក្រ ​ជា​ការផ្តួចផ្តើមរបស់​រុស្ស៊ី អាមេរិក និង​ហ្ស៊កដានី។ មុន​មាន​បទឈប់បាញ់ ​ប៉ុន្មាន​សប្តាហ៍​​មកនេះ ​​ ​កងទ័ព​ស៊ីរី និង​ក្រុមប្រឆាំង​បាន​ប្រយុទ្ធ​គ្នា​យ៉ាង​ខ្លាំងក្លា ​នៅតាម​ខែត្រ​ទាំង៣​នេះ។ កងទ័ព​ស៊ីរី​សម្រេច​បន្ត​​អនុវត្ត​បទឈប់បាញ់​នេះ តទៅទៀត នៅថ្ងៃចន្ទ​នេះ។

សម្រាប់រដ្ឋបាល​របស់​លោក​ដូណាល់ ត្រាំ បទឈប់បាញ់ភាគខាងត្បូង​ស៊ីរីពេលនេះ​ ​ជាជំហាន​ដំបូង​ឆ្ពោះ​ទៅ​​រកសន្តិភាព។ សង្គ្រាម​ស៊ីរី​បាន​អូសបន្លាយ​តាំង​ពី​ឆ្នាំ​២០១១មក ពេលនេះបាន​សម្លាប់​មនុស្ស​ជាង​៣សែន​២ម៉ឺននាក់។ ​កិច្ចពិភាក្សា​ក្រុងហ្សឺណែវ រវាង​​ក្រុមប្រឆាំង និង​រដ្ឋាភិបាល​ស៊ីរី​​ ​ថ្ងៃចន្ទ​នេះ ប្រហែល​ជា​នៅ​តែ​ពិបាក​រក​ច្រកចេញ​​ដូច​សព្វដងដែរ។ កិច្ចប្រជុំ​ក្រុងហ្សឺណែវ ​បានធ្វើ​ឡើង ​​តាំងពី​ឆ្នាំ​២០១៤​មកម្ល៉េះ ផ្តោត​លើ​​ប្រធានបទ​ទាក់ទង​នឹង​អន្តរកាល​នយោបាយ​ស៊ីរី។ ប៉ុន្តែ ក្រុម​ប្រឆាំង​និង​រដ្ឋាភិបាល​ស៊ីរី​នៅតែ​មិនត្រូវគ្នា។ ​​ក្រុមប្រឆាំង​ទាមទារ​​អោយ​ប្រធានាធិបតីអាសាដ ចុះពី​អំណាច ប៉ុន្តែ ​រដ្ឋាភិបាល​ស៊ីរី​មិនព្រម។ ​

តាំងពី​ខែមករា​មក ​​កិច្ចប្រជុំ​ក្រុង​ហ្សឺណែវ ​ក្នុង​​រក​ដំណោះស្រាយ​ជម្លោះ​ស៊ីរី ត្រូវបាន​គេលែង​សូវ​ចាប់អារម្មណ៍​ទៀត ដោយសារ​តែ​រុស្ស៊ី អ៊ីរ៉ង់ និង​តួកគី បាន​ផ្តួចផ្តើម​រៀបចំ​កិច្ចពិភាក្សា​មួយប្រភេទ​ទៀត ធ្វើនៅ​ទីក្រុង​អាស្តាណា ប្រទេស​កាហ្សាក់ស្ថាន ដើម្បីដោះស្រាយ​វិបត្តិ​ស៊ីរី​ដែរ។ ក្រុមឧទ្ទាម​បារម្ភ​ថា ប្រទេស​ជាមិត្ត​របស់​លោក​អាសាដ​ អាច​នឹង​​​មានឥទ្ធិពល​ក្នុង​ការ​ចាត់ចែង​​​និតិវិធី​នៃ​ការចរចា​នៅ​ក្រុង​អាស្តាណា៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI