អានតួអត្ថបទ
អ៊ុយក្រែន

កងទ័ព​អ៊ុយក្រែន​​​ឆ្ពោះ​ដំណើរ​​​ទៅ​​​តំបន់​ដូណេត​ ក្រោយ​ដណ្តើមបាន​ទីតាំង​មួយចំនួន​ពី​ក្រុម​បះបោរ​

ទាហាន​អ៊ុយក្រែន នៅ​តំបន់​ស្លាវីយ៉ង់​ ថ្ងៃ​៦កក្កដា ឆ្នាំ​២០១៤។
ទាហាន​អ៊ុយក្រែន នៅ​តំបន់​ស្លាវីយ៉ង់​ ថ្ងៃ​៦កក្កដា ឆ្នាំ​២០១៤។ REUTERS/Gleb Garanich
ដោយ៖ ព្រំ សឿន សូលីណា
១៥ នាទី

តាំង​ពី​ថ្ងៃ​អាទិត្យ​ម្សិលមិញ កងទ័ព​អ៊ុយក្រែន​បានធ្វើដំណើរ​ទៅមុខ ឆ្ពោះ​ទៅ​វាយយក​​តំបន់​ដូណេត​ ​ពី​កណ្តាប់ដៃ​ក្រុម​ផ្តាច់ទឹកដី​និយម​។ ​កាលពី​ថ្ងៃ​សៅរ៍ ​កងទ័ព​​បាន​ដំណ្តើម​តំបន់​ស្លាវីយ៉ង់ និង​ក្រាម៉ាតស ​​ពី​ក្រុមផ្តាច់ទឹកដី​និយម​នៅ​ភាគខាងកើត​​អ៊ុយក្រែន។ ការ​ដណ្តើម​បាន​ទីតាំង​មួយចំនួន​ពី​​ក្រុម​បះបោរ ​កាន់តែ​ធ្វើ​អោយ​រដ្ឋាភិបាល​ក្រុង​គៀវ​ចាប់​អារម្មណ៍​​​តែ​លើ​​​​​សកម្មភាព​យោធា និង​ហាក់​បំភ្លេច​ចោល​​​ដំណោះស្រាយ​ចរចា​​​បែបការទូត​ ​ដែល​អឺរ៉ុប​និង​រុស្ស៊ី​កំពុងទទូច​ចង់បាន​នោះ។ ​

ផ្សាយពាណិជ្ជកម្ម

ក្រោយ​វាយបាន​តំបន់​ស្លាវីយ៉ង់ និង​ក្រាម៉ាតស ​ពី​ក្រុមបះបោរ​អ៊ុយក្រែន​​ ​នៅ​ថ្ងៃ​អាទិត្យ​ម្សិលមិញ កងទ័ពអ៊ុយក្រែន​បាន​បន្ត​ដំណើរឆ្ពោះទៅ​តំបន់​ដូណត នៅ​ចំងាយ​ជាង​១០០ គីឡូម៉ែត្រ​ពី​​តំបន់​ស្លាវីយ៉ង់។ ​​តំបន់ដូណេត​ស្ថិត​ក្នុង​តំបន់ធំ​​ឈ្មោះថា ដុនបាស ជា​តំបន់ សេដ្ឋកិច្ច​​សំខាន់​របស់​អ៊ុយក្រែន។ ​ក្រោយ​ចាញ់​ប្រតិបត្តិការ​យោធា​របស់​កងទ័ព​អ៊ុយក្រែន​ មេ​ក្រុម​បះបោរ​គាំទ្រ​រុស្ស៊ី បាន​បោះបង់​តំបន់​ស្លាវីយ៉ង់ និង​ក្រាម៉ាតស និង​បាន​​នាំគ្នា​រត់ទៅ​ជ្រក​នៅ​ដូណេត។ ​

យោងតាម​អាជ្ញាធរ​អ៊ុយក្រែន នៅ​តាម​ផ្លូវ​ឆ្ពោះ​​ទៅ​តំបន់​ដូណេត កងទ័ព​អ៊ុយក្រែន​បាន​​កាន់កាប់​ទីតាំង​​មួយចំនួន ក្នុង​នោះ មាន​ក្រុង​អារតេមីស និង​ក្រុង​ឌ្រូចគីវកា។​ ​ប្រធានាធិបតី​​​ប៉ូរ៉ូឆិនកូ បានបង្ហាញ​បំណង​បន្ត​ប្រតិបត្តិការ​ប្រឆាំង​​ក្រុម​បះបោរ ដើម្បី​ដណ្តើម​យក​តំបន់​ដូណេត​ និងលូហ្កង់ នៅ​ភាគខាងកើត​មក​វិញ។

ពេល​រសៀល ​ថ្ងៃ​អាទិត្យ​ម្សិលមិញ ​មនុស្ស​ជាង​២ពាន់​នាក់ បាន​នាំគ្នា​ធ្វើ​បាតុកម្ម​ បង្ហាញ​ការគាំទ្រ​ចំពោះ​​តំបន់​ដូណេត មិន​ចង់​អោយ​ធ្លាក់​ក្នុង​ដៃ​អាជ្ញាធរ​ក្រុងគៀវ​​ទេ។ ​នៅ​ក្រុង​ស្លាវីយ៉ង់វិញ ស្ថានភាព​ថ្ងៃ​អាទិត្យ​ម្សិលមិញ ​ហាក់ស្ងប់ស្ងាត់​។ ឡាន​កាំម្ញ៉ុង​បាន​ចុះចែក​នំប៉័ង​ដល់​ប្រជាជន​នៅ​ទី​នោះ។ ​​

ជោគជ័យ​របស់​កងទ័ព​អ៊ុយក្រែន​ដណ្តើម​យក​បាន​ទីតាំង​មួយចំនួន​ពី​ក្រុមបះបោរ​គាំទ្រ​រុស្ស៊ី​ ក្នុងប៉ុន្មាន​ថ្ងៃ​ចុងក្រោយ​នេះ ​ហាក់​​​ធ្វើអោយ​រដ្ឋាភិបាល​លោក​ប៉ូរ៉ូឆិនកូ ភ្លេច​​គិត​ដល់​កិច្ចចរចា​​រវាង​អ៊ុយក្រែន ជាមួយ​​រុស្ស៊ី ជាមួយ​អង្គការ​សន្តិសុខ​និង​សហប្រតិបត្តិការ​អឺរ៉ុប ​រួមទាំង​ជាមួយ​ក្រុមឧទ្ទាម​ ដែល​​ខ្លួន​ធ្លាប់​សន្យា​ចរចា​​កន្លងមក ដើម្បីរក​ដំណោះស្រាយ​វិបត្តិ​អ៊ុយក្រែន។ ​​ប្រមុខការទូត​រុស្ស៊ី ស៊ែរហ្កី ឡាវ្រ៉ូវ ​បាន​ទូរសព្ទ​ទំនាក់ទំនង​ជាមួយ​​ប្រមុខ​ការទូត​​បារាំង ​និង​អាល្លឺម៉ង់ ទទូច​អោយ​មាន​កិច្ចប្រជុំ​​នេះ​ឡើង។

នៅថ្ងៃចន្ទ​នេះ  ប្រមុខការទូត​អាល្លឺម៉ង់​ Frank-Walter Steinmeier បាន​​អំពាវនាវ​អោយ​រដ្ឋាភិបាល​អ៊ុយក្រែន ​ចរចា​ជាមួយ​ក្រុម​ផ្តាច់ទឹកដី​និយម ស្វែង​រក​បទឈប់បាញ់។ ប្រមុខ​ការទូត​​អាល្លឺម៉ង់​ព្រមាន​ថា ​ទោះ​​ស្ថានភាព​​ភាគខាងកើត​អ៊ុយក្រែន​ប្រសើរ​ឡើងវិញ​ចំពោះ​កងទ័ព ក៏​​​​​​គេ​​មិន​អាច​​យក​សកម្មភាព​​យោធាសុទ្ធសាធ​ មកដោះស្រាយ​​​វិបត្តិ​បានដែរ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ