អានតួអត្ថបទ
អ៊ុយក្រែន

សភា​អ៊ុយក្រែន​គ្រោង​បើក​សម័យ​ប្រជុំ​វិសាមញ្ញ​ដើម្បី​និយាយ​អំពី​ជោគ​វាសនា​រដ្ឋាភិបាល

ស្ថានភាព​ក្រុង​គៀវ ថ្ងៃព្រហស្បតិ៍​ទី​២៣​មករា ក្រោយ​ការ​បង្ក្រាប​ហិង្សា​ពី​ប៉ូលិស
ស្ថានភាព​ក្រុង​គៀវ ថ្ងៃព្រហស្បតិ៍​ទី​២៣​មករា ក្រោយ​ការ​បង្ក្រាប​ហិង្សា​ពី​ប៉ូលិស REUTERS/Valentyn Ogirenko
ដោយ៖ អៀង សុខម៉ិញ
១៣ នាទី

វិបត្តិ​​អ៊ុយក្រែន បាន​ឈាន​ដល់​របត់​​ថ្មី ! បន្ទាប់​ពីមាន​ការ​បង្ក្រាបហិង្សា​ស្លាប់​មនុស្ស​៥​នាក់​របួស​ជា​ច្រើន​នាក់ ​ពីសំណាក់​ប៉ូលិស កាលពី​ថ្ងៃពុធ ប្រមុខ​បក្ស​ប្រឆាំង​បាន​ដាក់​ឱសានវាទ​ផ្អាក​ចលនា​បាតុកម្ម​មួយ​ថ្ងៃ ដើម្បី​ជួយ​ចរចា​ជាមួយ​នឹង​ប្រធានាធិបតី​ លោក Ianoukovitch។ ប្រឈម​មុខ​នឹង​ស្ថានការណ៍​ដែល​អាច​ផ្ទុះ​ហិង្សា​បានគ្រប់ពេល​វេលា​ដូច្នេះ ​​សភា​អ៊ុយក្រែន​ បាន​កោះ​ប្រជុំ​វិសាមញ្ញ នៅ​សប្តាហ៍​ក្រោយ។

ផ្សាយពាណិជ្ជកម្ម

“រំលាយ​រដ្ឋាភិបាល” ដែល​ជា​ការ​ចង់​បាន​របស់​ក្រុម​បាតុករ​តាំង​ពី​ជាង​ពីរ​ខែ​មក នឹង​ត្រូវ​យក​ទៅ​ពិភាក្សា​នៅ​ក្នុង​សភា​ សប្តាហ៍​ក្រោយ​នេះ។ ប្រធាន​សភា​អ៊ុយក្រែន បន្ទាប់​ពី​បានជួប​ជាមួយ​ប្រធានាធិបតី បាន​ចេញ​លិខិត​កោះ​ហៅ​សមាជិក​សភា បើក​សម័យ​ប្រជុំ​វិសាមញ្ញ ដើម្បី​ត្រួត​ពិនិត្យ​​លើ​សំណើ​​ចង់​រំលាយ​រដ្ឋាភិបាល និង​ច្បាប់​​​បាតុកម្ម​ដែលទើប​អនុម័ត​ដោយ​លើក​ដៃ​កាលពី​សប្តាហ៍​មុន​ និង​ដែល​ជា​ប្រភព​នាំ​ឱ្យ​ចលនា​បាតុកម្ម​ផ្ទុះ​ឡើង​ជាថ្មី​កាន់​តែ​ខ្លាំង។

បាតុកម្ម ដែល​ត្រូវ​បាន​រដ្ឋាភិបាល​បង្ក្រាប​យ៉ាង​ហិង្សា នៅល្ងាច​ថ្ងៃ​ពុធ បង្ក​ឱ្យ​មាន​ស្លាប់​៥​នាក់ និង​របួស​ជា​ច្រើន​នាក់។ ថ្វី​បើ​ប្រធានាធិបតី​បាន​អះអាង​ថា​គ្មាន​គម្រោង​នឹង​​​ចេញ​ក្រិត្យ​ដាក់​ប្រទេសក្នុង​ភាព​អាសន្នមែន ប៉ុន្តែ​​នាយក​រដ្ឋមន្ត្រី​បាន​ប្រកាស​ថា​ចលនា​បាតុកម្ម​របស់​ក្រុម​ប្រឆាំង​ មាន​ចេតនា​ធ្វើ​រដ្ឋ​ប្រហារ​ដោយ​ពិតៗ។

ទាំង​រុស្ស៊ី​​ ទាំង​​អឺរ៉ុប​ តាម​ដាន​ស្ថានភាព​អ៊ុយក្រែន​យ៉ាង​កៀកកិត។ បន្ទាប់​ពី​ប្រតិកម្ម​របស់​ប្រធាន​គណៈកម្មការ​អឺរ៉ុប ដល់​វេន​លោកស្រី​ប្រមុខ​រដ្ឋាភិបាល​អាល្លឺម៉ង់​ម្តង ដែល​ខក​ចិត្ត​នឹង​ស្ថានភាព​នៅ​អ៊ុយក្រែន។

 “យើង​សុំ​ឱ្យ​រដ្ឋាភិបាលក្រុង​គៀវ គោរព​​សេរីភាព​​ប្រជាធិបតេយ្យ​ មាន​ជា​អាទិ៍​សេរីភាព​​ធ្វើ​បាតុកម្ម ហើយ​សន្តិសុខ​បាតុករ​ត្រូវ​បាន​ធានា​ គ្មាន​ការ​ប្រើ​អំពើ​ហិង្សា​បង្ក្រាប។ យើង​ព្រួយ​បារម្ភ​ខ្លាំងណាស់​ នៅពេល​ឃើញ​មាន​ច្បាប់​បាតុកម្ម​អនុម័ត​យ៉ាង​បន្ទាន់​។ យើង​សូម​ឱ្យ​មាន​ការចរចា​។ យើង​ចាត់​ទុក​ថា ក្នុង​ដំណាក់កាល​នេះ មិនទាន់​ដល់​ពេល​ត្រូវ​ដាក់​ទណ្ឌកម្ម​លើ​អ៊ុយក្រែន​ទេ។ ជា​បឋម​ត្រូវ​បញ្ចៀស​ឱ្យ​បាន​អំពើ​ហិង្សា។”

នៅ​ថ្ងៃ​នេះ​ ស្ថានភាព​ហាក់​ស្ងប់​ស្ងាត់​បន្តិច ដោយ​​ប្រមុខ​បក្ស​បាន​ប្រកាស​ដាក់​ឱសានវាទ​​​ផ្អាក​​បាតុកម្ម​មួយ​ថ្ងៃ ​ជួប​ចរចា​ជាមួយ​ប្រធានាធិបតីសិន តែបាន​ព្រមាន​ថា​​​បើ​គ្មាន​សម្បទាន​​អ្វី​ទេ នោះ​នឹង​ចលនា​បាតុកម្ម​នឹង​មាន​សន្ទុះ​ថ្មី ដើម្បី​ឈាន​ដល់​ការ​បញ្ចប់​វិបត្តិ៕
 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ