អានតួអត្ថបទ
ព្រឹត្តិការណ៍អន្តរជាតិប្រចាំថ្ងៃ

អ៊ុយក្រែន​ចុះ​ហត្ថលេខា​កិច្ចព្រមព្រៀង​ដៃគូ​​យុទ្ធសាស្ត្រ​​ជាមួយ​​សហភាព​អឺរ៉ុប​​

សំឡេង ០៥:២៤
ប្រធានាធិបតី​អ៊ុយក្រែន ​Petro Porochenko (កណ្តាល) ប្រធាន​គណៈកម្មការ​អឺរ៉ុប ​José Manuel Barroso (ឆ្វេង) និង​ប្រធាន​ក្រុមប្រឹក្សា​អឺរ៉ុប​ Herman Van Rompuy​ នៅ​ក្រុងព្រុចសែល ថ្ងៃ​សុក្រ​២៧មិថុនា​នេះ។
ប្រធានាធិបតី​អ៊ុយក្រែន ​Petro Porochenko (កណ្តាល) ប្រធាន​គណៈកម្មការ​អឺរ៉ុប ​José Manuel Barroso (ឆ្វេង) និង​ប្រធាន​ក្រុមប្រឹក្សា​អឺរ៉ុប​ Herman Van Rompuy​ នៅ​ក្រុងព្រុចសែល ថ្ងៃ​សុក្រ​២៧មិថុនា​នេះ។ REUTERS/Stringer
ដោយ៖ ព្រំ សឿន សូលីណា
៣៤ នាទី

នៅ​ថ្ងៃ​សុក្រ​​២៧មិថុនា​នេះ ដូច​សហភាព​អឺរ៉ុប​បានគ្រោង​ទុក ប្រធានា​ធិបតី​​អ៊ុយក្រែន​បាន​មកដល់​ក្រុងព្រុចសែល ​និង​​​បាន​ចុះ​ហត្ថលេខា​លើ​កិច្ចព្រមព្រៀង​ដៃគូយុទ្ធសាស្ត្រ​​ជាមួយ​សហភាព​អឺរ៉ុប​។ ​កិច្ចព្រមព្រៀង​នេះ ធ្លាប់​ត្រូវ​បាន​អតីត​ប្រធានាធិបតី​យ៉ានូកូវិច ដែល​លំអៀង​​ទៅ​រក​រុស្ស៊ី ​ទាត់ចោល​ ​​ធ្វើអោយ​អ៊ុយក្រែន​ធ្លាក់​ក្នុង​វិបត្តិ​​ធ្ងន់ធ្ងរ។ ​នៅម៉ោង​១០យប់​ ក្នុង​ស្រុក​អ៊ុយក្រែន ​ថ្ងៃសុក្រ​នេះដែរ ​​​​បទឈប់បាញ់​ឯកតោ​ភាគី​​​​​ ​​នឹង​ត្រូវ​ផុត​​​កំណត់។ បទឈប់បាញ់​នេះ អាច​​​ពន្យារពេល​បន្ត ប្រសិន​កិច្ច​ពិភាក្សា​រវាង​ក្រុម​បះបោរ​ផ្តាច់​ទឹកដីនិយម និង​រដ្ឋអំណាច​ក្រុងគៀវ ​ស្តីពី​ការបិទបញ្ចប់​ជម្លោះ ​​ទទួល​បាន​ជោគជ័យ។ យប់​ថ្ងៃ​ព្រហស្បតិ៍​ម្សិលមិញ ក្រុម​ផ្តាច់​ទឹកដីនិយម​បាន​ដោះលែង ដោយ​គ្មាន​លក្ខខណ្ឌ នូវ​​សមាជិក​អង្គការ​សន្តិសុខ​និង​​សហប្រតិបត្តិការ​អឺរ៉ុប​ ៤រូប ដែល​​ពួកគេ​បាន​ចាប់ខ្លួន​កាលពី​ថ្ងៃ​២៦ឧសភា។

ផ្សាយពាណិជ្ជកម្ម

ក្រុុង​ម៉ូស្គូបញ្ចេញប្រតិកម្ម​ចំពោះកិច្ចព្រមព្រៀង​ដៃគូ​រវាង​អ៊ុយក្រែន និង​សហភាពអឺរ៉ុប​​​​

រុស្ស៊ី​និង​សហភាពអឺរ៉ុបតែង​​​ប្រទាញប្រទង់​អ៊ុយក្រែន ​អោយ​ចូល​មក​ខាងខ្លួន​រៀងៗ​ខ្លួន។ លោក​ពូទីនលើកឡើង​​ថា ​ការ​បង្ខំអោយ​អ៊ុយក្រែន​​​ជ្រើស​យក​រវាង​សហភាព​អឺរ៉ុប​និង​រុស្ស៊ី គឺ​មាន​តែ​ជំរុញអ៊ុយក្រែន​អោយ​បែកបាក់​តែ​ប៉ុណ្ណោះ។ សូម​​បញ្ជាក់​​បន្តិច​​​ថា ​នៅថ្ងៃ​សុក្រ​នេះ ​ប្រធានាធិបតី​​អ៊ុយក្រែន ពេត្រូ ​ប៉ូរ៉ូឆិនកូ ​បាន​​ចុះ​ហត្ថលេខា​លើ​កិច្ចព្រមព្រៀង​​ដៃគូ លើ​ឯកសារ​ទាក់ទង​​ផ្នែកពាណិជ្ជកម្ម ​ដែល​មានទិសដៅ​លុបរបាំង​ពន្ធ​រវាង​សហភាពអឺរ៉ុប ​និង​អ៊ុយក្រែន។​​​ និយាយ​រួម​មកវិញ ​កិច្ច​ព្រមព្រៀង​ដៃគូ​យុទ្ធសាស្ត្រ​ជាមួយសហភាព​អឺរ៉ុបដែល​ចុះ​ហត្ថលេខា​ថ្ងៃ​សុក្រ​​នេះ ធ្លាប់​បានសហភាព​អឺរ៉ុប​​គ្រោង​ចុះ​ហត្ថលេខា​ជាមួយ​អតីត​ប្រធានាធិបតី វិចទ័រ យ៉ានូកូវិច តាំង​តែ​ពី​ខែ​វិច្ឆិកា ឆ្នាំ​២០១៣ម្ល៉េះ។ តែ​កាលណោះ លោក​យ៉ានូកូវិច បាន​សម្រេច​ងាក​ទៅ​រក​រុស្ស៊ី​វិញ ដោយ​មិនព្រម​ចុះ​ហត្ថលេខា​​លើ​កិច្ចព្រមព្រៀង​​នេះទេ ដើម្បី​អាច​អោយរុស្ស៊ី​ផ្តល់​ជំនួយ​សេដ្ឋកិច្ច​អោយ​អ៊ុយក្រែន ជួយដោះស្រាយ​បញ្ហា​សេដ្ឋកិច្ចអ៊ុយក្រែន។ ​ការ​បដិសេធ​មិនចុះ​ហត្ថលេខា​លើ​កិច្ចព្រមព្រៀង​​ដៃគូជាមួយអឺរ៉ុប​នេះហើយ ដែល​ធ្វើអោយ​​ក្រុម​ប្រឆាំង​បះបោរ​​តវ៉ា​​ទម្លាក់​លោក​យ៉ានូកូវិច។

​ក្រោយ​មកទៀត ក្រុម​​គាំទ្រ​រុស្ស៊ី​នៅ​ភាគខាងកើតប្រទេស ​ក៏ងើប​បះបោរ​​ប្រឆាំង​នឹង​រដ្ឋអំណាច​ថ្មី​ ​ដែល​ទំលាក់​លោក​យ៉ានូកូវិច​ពី​តំណែង​នោះ ហើយ​​​បន្ត​មក​ទៀត ​​រុស្ស៊ីភ្ជាប់​តំបន់​គ្រីមេ​ចូល​ទឹកដី​រុស្ស៊ី កាល​ពី​ខែ​មិនា។ 

ចំពោះ​កិច្ចព្រមព្រៀង​ដៃគូ​រវាង​អ៊ុយក្រែន​ និង​សហភាពអឺរ៉ុប​នេះ ​រុស្ស៊ី​ពិតជា​ជំទាស់​​ ​ប្រាកដ​ណាស់ ព្រោះ​ថា ​​រុស្ស៊ី​មិន​ចង់​អោយ​អ៊ុយក្រែន​​​​ដែល​ធ្លាប់​ជា​អតីត​សាធារណរដ្ឋ​សហភាព​សូវៀត ដើរ​តាម​សហភាព​​អឺរ៉ុប​ទេ។ ​រុស្ស៊ី​ដឹងច្បាស់​ថា​ អឺរ៉ុប​ចង់​យក​កិច្ចព្រមព្រៀង​នេះ គាប​រុស្ស៊ី​ក្នុង​​​ដំណោះស្រាយ​​​សំណុំ​រឿង​អ៊ុយក្រែន។

លើសពី​នេះទៀត នៅ​ថ្ងៃ​សុក្រ​នេះដែរ អតីត​ប្រទេស​សហភាពសូវៀត​២​ទៀត គឺ​ប្រទេស​ម៉ុលដាវី និង​ហ្ស៊កហ្ស៊ី ក៏​ចុះ​ហត្ថលេខា​កិច្ចព្រមព្រៀង​ដៃគូ​​ ជាមួយ​សហភាព​អឺរ៉ុប​​ដូច​អ៊ុយក្រែន​ដែរ។ ​ដូច្នេះ​ រុស្ស៊ី​ពិត​ជា​មិន​សប្បាយ​ចិត្ត​​ទេ។ ​រដ្ឋាភិបាល​ក្រុង​ម៉ូស្គូ​លើកឡើង​ថា ​​កិច្ចព្រមព្រៀង​រវាង​អ៊ុយក្រែន​និង​សហភាព​អឺរ៉ុប​​ នឹង​ទទួល​ផល​វិបាក។ ​កាលពីថ្ងៃ​ពុធ ​​រុស្ស៊ី​ធ្លាប់​ព្រមាន​​​ហើយ​​ថា ​រុស្ស៊ី​នឹង​ចាត់វិធានាការការពារ​ខ្លួន​ ប្រសិន​បើ​កិច្ចព្រមព្រៀង​​ដៃគូរវាង​អ៊ុយក្រែន​​ជាមួយ​អឺរ៉ុប​​ ប៉ះពាល់​សេដ្ឋកិច្ច​​របស់​រុស្ស៊ី។ ​​​នៅ​ថ្ងៃ​សុក្រ​នេះ រដ្ឋាភិបាល​ក្រុង​ម៉ូស្គូក៏បាន​​​លើក​ឡើង​ដដែលៗ​​ទៀត​ថា​ នឹង​ចាត់​វិធានការការពារ​ខ្លួន​ប្រឈម​កិច្ច​ព្រមព្រៀង​​​​នេះ។ ​រុស្ស៊ី សហភាពអឺរ៉ុប​ និង​អ៊ុយក្រែន នឹង​​ជួបគ្នា​ ​ នៅថ្ងៃ​១១កក្កដា​ខាងមុខ​នេះ ដើម្បី​ពិភាក្សា​ពី​ការអនុវត្តន៍​កិច្ចព្រមព្រៀង​​នេះ។

បទឈប់បាញ់​​​របស់​ប្រធានាធិបតី​ប៉ូរ៉ូឆិនកូ នឹង​ត្រូវ​ផុត​ពេល​កំណត់ នៅ​ម៉ោង​១០យប់​ថ្ងៃសុក្រ​នេះ

​មេដឹកនាំ​អឺរ៉ុប​និង​រុស្ស៊ី​ ចង់​អោយ​ពន្យារពេល​​បទឈប់បាញ់​នេះ​ទៀត។ ប៉ុន្តែ ​រដ្ឋអំណាច​ក្រុង​គៀវប្រាប់​ហើយ​ថា បទឈប់បាញ់​នេះ​អាច​ពន្យារពេល​បាន​ លុះត្រា​តែ​កិច្ចចរចា​ស្តីពី​ការ​បិទ​បញ្ចប់​ជម្លោះ​​ជាមួយ​ក្រុម​បះបោរ​គាំទ្រ​រុស្ស៊ី សម្រេច​បាន​លទ្ធផល​ស្របតាម​ការចង់បាន​ស្របតាម​ផែនការ​សន្តិភាព​របស់​រដ្ឋអំណាច​អ៊ុយក្រែន។ ​ក្រុមបះបោរ​គាំទ្រ​រុស្ស៊ី​​ក៏ចង់​បន្ត​បទឈប់បាញ់​នេះដែរ ដោយ​​បាន​​ប្រកាស​ម្សិលមិញ ​ថា​​យល់ព្រម​​ចរចា​​ជាថ្មីទៀត ​​ជាមួយ​​អាជ្ញាធរ​ក្រុងគៀវ។ ​

តែ​បើ​មើលពី​ស្ថានការណ៍ ​​គិតពី​​ពេល​​បទឈប់បាញ់​នេះ បាន​ដាក់ចេញ​​តាំង​ពី​ថ្ងៃ​សៅរ៍​សប្តាហ៍​មុន​​មក ថ្វីបើ​ក្រុម​គាំទ្រ​រុស្ស៊ីប្រកាស​ទទួល​យក​​​បទឈប់បាញ់​នេះ​​ក៏ពិត​មែន តែ​​​​​​ហិង្សា​នៅតែ​​បន្ត​មាន​ នៅ​អ៊ុយក្រែន។ ​កាលពីថ្ងៃ​អង្គារ​ ​ទាហាន​អ៊ុយក្រែន​៩នាក់​ បានស្លាប់​ក្នុង​ការ​បាញ់​ប្រហារ​​​​​ឧទ្ធម្ភាគចក្រ​មួយគ្រឿង​​ ហើយ​នៅល្ងាច​ថ្ងៃ​ព្រហស្បតិ៍​ម្សិលមិញ​នេះ​ទៀត ​ក្រុម​បះបោរ​២០០នាក់ ​​បាន​​វាយប្រហារ​បន្ទាយ​កង​យោ​​​មួយកន្លែង នៅ​​ក្រុង​ដូណេត តែ​ត្រូវ​យោធា​​​វាយ​​រុញ​ថយ​ទៅវិញ។ ​មាន​មនុស្ស​ជាង​៤០០នាក់​ហើយ​ដែល​បាត់បង់​ជីវិត​ក្នុងហិង្សា​​រវាង​ក្រុម​ផ្តាច់​ទឹកដី​និយម និង​កងទ័ពអ៊ុយក្រែន។ ​​ អាមេរិកនិង​អឺរ៉ុប​នៅតែចោទ​ថា រុស្ស៊ី​មិនបាន​ចូលរួម​ជំរុញ​អោយ​​ក្រុម​គាំទ្រ​រុស្ស៊ី​ទំលាក់​អាវុធ​ចុះ ហើយ​តែងគំរាម​ដាក់​ទណ្ឌកម្ម​រុស្ស៊ី​ជានិច្ច។ ​រុស្ស៊ី​ក៏​តែង​​បរិហារ​តប​​​វិញ​ថា អាមេរិក​និង​អឺរ៉ុប ​ចូលចិត្ត​​ទំលាក់​កំហុស​លើ​រុស្ស៊ី​។

ទោះ​យ៉ាង​នេះ​ក្តី ​ប្រធានាធិបតីប៉ូរ៉ូឆិនកូ ​បាន​​​ប្រកាស​ថា ត្រៀម​ខ្លួន​ដើម្បី​សម្រេច​អោយ​បាន​កិច្ចព្រមព្រៀង​​សន្តិភាព​ជាមួយ​​លោក​ពូទីន។ យើងឃើញ​ថា ថ្វីបើ​​លោក​ប៉ូរ៉ូឆិនកូ​​គាំទ្រ​អ៊ុយក្រែន​​អោយ​ដើរ​ទៅ​រក​សហភាពអឺរ៉ុប​ក្តី តែ​លោក​បាន​ព្យាយាម​យក​ចិត្ត​រុស្ស៊ី ចៀសវាង​ភាព​តានតឹង​ជាមួយ​លោក​ពូទីន​។

ដើម្បីបន្ថយ​ភាពតានតឹង​​ ​ លោក​ប៉ូរ៉ូឆិនកូ គ្រោង​ផ្តល់​អំណាច​បន្ថែម​ដល់​តំបន់​នានា នៅ​អ៊ុយក្រែន​ តាមរយៈ​ ​ការពង្រីក​ការប្រើប្រាស់​ភាសា​រុស្ស៊ី​អោយ​បាន​ទូលំទូលាយ​ ឬ​​​ការ​បោះឆ្នោត​​​​​តែងតាំង​តំណាង​គ្រប់គ្រង​តាម​ស្រុក ​ដោយ​មិនចាំ​បាច់​អោយ​អាជ្ញាធរ​ក្រុងគៀវ​តែងតាំង​​នោះទេ។ លោក​ប៉ូរ៉ូ​ឆិនកូ​នឹង​លើក​​​គំរោង​នេះឡើង​​ទៅ​សភា។ ​ទោះ​យ៉ាងនេះក្តី ​គំរោង​បែងចែក​អំណាច​តាម​ស្រុក​នេះ ​មិន​ធ្វើ​ដល់​ថ្នាក់​​រហូត​បង្កើត​​អោយ​មាន​​​រចនាសម្ព័ន្ធ​បែប​សហព័ន្ធ​ ​តាម​ការ​ចង់បាន​របស់​រុស្ស៊ី​ទេ ព្រោះ​​លោក​ប៉ូរ៉ូឆិនកូ ចង់រក្សា​ឥទ្ធិពល​រដ្ឋាភិបាល​​ក្រុង​គៀវ ​នៅ​តាម​តំបន់​ដែល​​គាំទ្រ​រុស្ស៊ី៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ