អគ្គលេខាធិការអង្គការសហប្រជាជាតិ ស្នើឈ្មោះបេសកជនដឹកនាំប្រតិបត្តិការកម្ទេចអាវុធគីមីនៅស៊ីរី
លោកបានគីមូន អគ្គលេខាធិការអង្គការសហប្រជាជាតិ កាលពីថ្ងៃអាទិត្យ ទី១៣តុលា ម្សិលមិញនេះ បានស្នើឈ្មោះលោកស្រីSigrid Kaag ជាប្រេសិតដឹកនាំបេសកកម្មកម្ទេចអាវុធគីមីនៅស៊ីរី។ បើក្រុមប្រឹក្សាសន្តិសុខអង្គការសហប្រជាជាតិបោះឆ្នោតជ្រើសតាំង លោកស្រី Kaag នោះលោកស្រីនឹងត្រូវដឹកនាំក្រុមការងារប្រមាណ១០០នាក់ ទៅបំពេញបេសកកម្មនៅទីក្រុងដាម៉ាស ប្រទេសស៊ីរី ក្នុងពេលឆាប់ៗនេះ។
ចុះផ្សាយនៅថ្ងៃ៖
លោកស្រី Kaag ដែលជាជំនួយការអគ្គលេខាធិការអង្គការសហប្រជាជាតិ លោកបានគីមូន ត្រូវបានស្នើឈ្មោះដោយចៅហ្វាយនាយរបស់ខ្លួន គឺលោកបានគីមូនផ្ទាល់តែម្ដង ឲ្យដឹកនាំប្រតិបត្តិការកម្ទេចអាវុធគីមី នៅស៊ីរី។ ជាប្រតិបត្តិការរួមលើកដំបូង រវាងអង្គការសហប្រជាជាតិ និងអង្គការហាមឃាត់អាវុធគីមី ដែលទើបតែទទួលរង្វាន់ណូបែលសន្តិភាពកាលពីពេលថ្មីៗនេះ។ ក្រុមប្រឹក្សាសន្តិសុខអង្គការសហប្រជាជាតិ គ្រោងនឹងបោះឆ្នោតលើសំណើខាងលើ នៅថ្ងៃពុធទី១៦តុលា ខាងមុខ។
ក្រុមការងារអន្តរជាតិមួយក្រុម ដែលចេញមកពីការរួមគ្នារវាងអង្គការហាមឃាត់អាវុធគីមី និងអង្គការសហប្រជាជាតិបានទៅដល់ទីក្រុងដាម៉ាសតាំងពីថ្ងៃទី១តុលា និងបានចាប់ផ្តើមដំណើរការបំផ្លាញអាវុធគីមី នៅក្នុងប្រទេសស៊ីរី តាំងពីថ្ងៃទី៦តុលាមកម្ល៉េះ។
ប្រសិនបើលោកស្រី Kaag ត្រូវបានគេបោះឆ្នោតគាំទ្រ លោកស្រីនឹងត្រូវធ្វើដំណើរទៅកាន់ទីក្រុងដាម៉ាស ប្រទេសស៊ីរី នាពេលឆាប់ៗខាងមុខនេះ ជាមួយនឹងក្រុមការងារប្រមាណជា១០០នាក់ផ្សេងទៀត។ ហើយលោកស្រីនឹងទទួលបន្ទុកមើលខុសត្រូវការបំផ្លិចបំផ្លាញឃ្លាំងអាវុធគីមី ដែលត្រូវធ្វើឡើងនៅក្នុងក្របខ័ណ្ឌសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ដែលបោះឆ្នោត កាលពីចុងខែកញ្ញាកន្លងទៅ។
លោកស្រី Kaag អាយុ៥២ឆ្នាំ បានចូលបម្រើការនៅអង្គការសហប្រជាជាតិតាំងពីឆ្នាំ១៩៩៤មកម្ល៉េះ។ លោកស្រីអាចនិយាយបាន៥ភាសា គឺភាសាអង់គ្លេស បារាំង អាឡឺម៉ង់ អារ៉ាប់ និងហូឡង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ