កម្ពុជា

UNESCO នឹង​ជួយ​រៀប​ចំ​ច្បាប់​ស្តី​ពី​សិទ្ធិ​ទទួល​បាន​ព័ត៌មាន​

លោកស្រី Anne Lemaistre តំណាង​អង្គការ​យូណេស្កូ​ប្រចាំ​កម្ពុជា (ឆ្វេង) និងលោក​រដ្ឋមន្ត្រី​ក្រសួង​ព័ត៌មាន ខៀវ កាញារីទ្ធ​ (ស្តាំ)
លោកស្រី Anne Lemaistre តំណាង​អង្គការ​យូណេស្កូ​ប្រចាំ​កម្ពុជា (ឆ្វេង) និងលោក​រដ្ឋមន្ត្រី​ក្រសួង​ព័ត៌មាន ខៀវ កាញារីទ្ធ​ (ស្តាំ) @Facebook

តំណាង​អង្គការ​យូណេស្កូ​ប្រចាំ​កម្ពុជា លោកស្រី អាន ឡឺ​ម៉ែស្ត្រឹ (Anne Lemaistre) បាន​ជួប​ជា​មួយ​លោក​រដ្ឋមន្ត្រី​ក្រសួង​ព័ត៌មាន ខៀវ កាញារីទ្ធ​ នៅ​ថ្ងៃ​ចន្ទ​ទី​២៨​តុលា ដើម្បី​បង្ហាញ​ជំហរ​របស់​យូណេស្កូ​ដែល​ចង់​ចូលរួម​ចំណែក​ក្នុង​ការ​តាក់តែង​ច្បាប់​ស្តី​ពី​សិទ្ធិ​ទទួល​បាន​ព័ត៌មាន។ លោក​ខៀវ កាញារីទ្ធ បាន​បញ្ជាក់ថា រដ្ឋាភិបាល​កំពុង​សិក្សា​អំពី​ដំណើរ​ការ​តាក់តែង​សេចក្តី​ព្រាង​ច្បាប់​សំខាន់​នេះ​ ហើយ​ថា​​ រដ្ឋាភិបាល​នឹង​ធ្វើការ​ងារ​ជាមួយ​យូណេស្កូ និង​ដៃ​គូ​អភិវឌ្ឍន៍​នានា​​ ក្នុង​ការងារ​តាក់តែង​ច្បាប់​ស្តី​ពី​សិទ្ធិ​ទទួល​បាន​ព័ត៌មាន​នេះ។

ផ្សាយពាណិជ្ជកម្ម

តំណាង​អង្គការ​យូណេស្កូ​ប្រចាំ​កម្ពុជា​បាន​បង្ហាញ​យ៉ាង​ច្បាស់ ​អំពី​គម្រោង​ជំនួយ​របស់​ខ្លួន​​ចំពោះ​ការ​តាក់តែង​សេចក្តីព្រាង​ច្បាប់ ​ស្តីពី​សិទ្ធិ​ទទួល​បាន​ព័ត៌មាន​របស់​កម្ពុជា។ នៅ​ក្នុងជំនួប​ជាមួយ​រដ្ឋមន្ត្រី​ក្រសួង​ព័ត៌មាន លោក ខៀវ កាញារីទ្ធ​ នៅ​ថ្ងៃ​ចន្ទ​ទី​២៨​តុលា លោកស្រី Anne Lemaistre តំណាង​អង្គការ​យូណេស្កូ​ប្រចាំ​កម្ពុជា បាន​បញ្ជាក់​អោយដឹងថា យូណេស្កូ​បាន​បង្កើត​គម្រោង​ដែល​មាន​រយៈ​៣​ឆ្នាំ ដើម្បី​ជួយ​រៀបចំ​អោយ​មាន​កិច្ច​ប្រជុំ​ថ្នាក់​ក្រោម​ជាតិ និង​ថ្នាក់​មូលដ្ឋាន កិច្ច​ប្រជុំ​អន្តរ​ក្រសួង និង​ការ​រៀបចំ​ការ​បណ្តុះបណ្តាល​អ្នកកាសែត​ជាដើម។

យោងតាម​ការ​ចុះ​ផ្សាយ​​របស់​ទីភ្នាក់ងារ​សារព័ត៌មាន​កម្ពុជា AKP លោក​រដ្ឋមន្ត្រី​ក្រសួង​ព័ត៌មាន​បាន​ប្រាប់​តំណាង​យូណេស្កូ​ថា ក្រសួង​ព័ត៌មាន​​កំពុង​រៀប​ចំ​ក្រុម​ការងារ​មួយ​ដើម្បី​ជំរុញ​អោយ​បាន​លឿន ដំណើរ​ឈាន​ទៅ​រក​តាក់តែង​សេចក្តី​ព្រាង​ច្បាប់ ស្តីពី​សិទ្ធិ​ទទួល​បាន​ព័ត៌មាន​នេះ។ AKP ដដែល​បាន​បន្ត​ស្រង់​ប្រសាសន៍​លោក​ ខៀវ កាញារីទ្ធ​ ដែលបាន​បញ្ជាក់​ប្រាប់​តំណាង​យូណេស្កូ​ថា ពេលណា​ដែល​រដ្ឋាភិបាល​កំណត់​ប្រគល់​សមត្ថកិច្ច​នៃការ​តាក់តែង​​សេចក្តី​ព្រាងច្បាប់​នេះ​ទៅ​ស្ថាប័ន​ណាមួយ​ហើយ​នោះ រដ្ឋាភិបាល​នឹង​រៀបចំ​អនុស្សារណៈ​យោគយល់​រវាង​យូណេស្កូ ដៃគូ​អភិវឌ្ឍន៍​ និង​ស្ថាប័នរដ្ឋ​ ដើម្បី​បង្កើត​អោយ​យន្តការ​ការងារ​ច្បាស់លាស់​មួយ។

ច្បាប់​ស្តីពី​សិទ្ធិទទួល​បាន​ព័ត៌មាន​គឺ​ជា​ ប្រធាន​បទ​រសើប​មួយ​ដែល​អង្គការ​ក្រៅ​រដ្ឋាភិបាល និង​គណបក្ស​ប្រឆាំង​បាន​ទាមទារ​ពី​រដ្ឋាភិបាល។ តំណាងរាស្ត្រ​គណបក្ស​ប្រឆាំង​ធ្លាប់​ធ្វើ​សេចក្តី​ស្នើច្បាប់​​នេះ ដាក់​ទៅ​រដ្ឋសភា​ដែរ​ ប៉ុន្តែ​ ត្រូវបាន​បដិសេធ​ដោយ​តំណាង​រាស្ត្រ​ភាគច្រើន​របស់​គណបក្ស​ប្រជាជន​កម្ពុជា​ដែល​ដឹកនាំ​រដ្ឋាភិបាល។

គណបក្ស​ប្រឆាំង​តែង​បាន​រិះគន់​រដ្ឋាភិបាល​យ៉ាងចាស់ដៃ​ អំពី​ការ​លាក់លៀម​ព័ត៌មាន​ជាច្រើន​ដែល​ទាក់ទង​នឹង​គម្រោង​វិនិយោគ​នានា​ ដែល​រដ្ឋាភិបាល​បាន​អនុញ្ញាត​អោយក្រុម​ហ៊ុន​ឯកជន៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI