អានតួអត្ថបទ
ស.រ.អា.

អំពើភេរវកម្ម​បាញ់ប្រហារ​បណ្តាល​ឱ្យ​ស្លាប់​៦​នាក់

រូបថត​តំណាង​រាស្រ្ត Gabriellle Giffords អមជុំវិញ​ដោយ​ភ្លើងទៀន
រូបថត​តំណាង​រាស្រ្ត Gabriellle Giffords អមជុំវិញ​ដោយ​ភ្លើងទៀន ©Eric Thayer / Reuters
ដោយ៖ វីនស្តុន រតនា
១៨ នាទី

ស្លាប់​៦នាក់​និង​របួស​ធ្ងន់​១២នាក់​ដែល​ក្នុង​ចំណោម​ នេះ​ មាន​ស្ត្រី​ជា​អ្នក​តំណាង​រាស្ត្រ​ម្នាក់​ផង​ ​ -នេះ​ហើយ​ជា​ចំនួន​បណ្តោះ​អាសន្ន​នៃ​អ្នក​រង​គ្រោះ​ដោយ​អំពើ​ភេរវកម្ម​បាញ់​ ប្រហារ​នៅ​ថ្ងៃ​សៅរ៍​ម្សិល​មិញ​៨​មករា​ នៅ​ឱកាស​ប្រជុំ​មីទ្ទិញ​មួយ​នៅ​ទីក្រុង​Tucson​ ក្នុង​រដ្ឋ​Arizona​ខាង​និរតី​នៃ​ស.រ.អា.។​ស្ត្រី​អ្នក​តំណាង​រាស្ត្រ​ ប្រជាធិបតេយ្យ​ Gabrielle​ Giffords​អាយុ​៤០ឆ្នាំ​ត្រូវ​របួស​ធ្ងន់​ចំ​ក្បាល​ស្ថិត​ជានិច្ច​នៅ​ក្នុង​ ស្ថានភាព​ពុំ​ដឹង​ជា​រស់​ឬ​ស្លាប់​ទេ​។គាត់​កំពុង​តែ​រួម​ប្រជុំ​ជាមួយ​ ក្រុម​អ្នក​បោះ​ឆ្នោត​ឱ្យ​គាត់​នៅ​កន្លែង​ចំណត​រថយន្ត​នៃ​ហាង​ទំនើប​ supermarché​មួយ​ ស្រាប់​តែ​មាន​បុរស​ម្នាក់​លេច​ធ្លោ​ចេញ​មក​បាញ់​គាត់​តែ​ម្តង​។

ផ្សាយពាណិជ្ជកម្ម

សេចក្តីរាយការណ៍​របស់ Anne Verdaguer ប្រែសម្រួល​ដោយ​វីនស្តុន រតនា

ជន​ជាប់​មន្ទិល​សង្ស័យ​កំពុង​ត្រូវ​ឃុំ​ឃាំង​ ប៉ុន្តែ​បដិសេធ​ពុំ​ព្រម​និយាយ​ស្តី​អ្វី​ទេ​។ជន​ឈ្មោះ​Jared​ Lee​ Loughner​ អាយុ​២២ឆ្នាំ​បាន​លើក​ឡើង​អំពី​សិទ្ធិ​ខ្លួន​ត្រូវ​ស្ងៀម​ស្ងាត់​ពុំ​ចេញ​ស្តី​។​ស្រប​តាម​ប៉ូលិស​ ​ ជន​នេះ​ទំនង​ជា​មាន​បុគ្គលិកលក្ខណៈ​ក្រឡក​ធាតុ​ខ្លាំង​ណាស់​។​ឯកសារ​រក​ឃើញ​តាម​គេហទំព័រ​អាំងទែរណេត​បញ្ជាក់​ប្រាប់​ថា​ និស្សិត​រូប​នេះ​បាន​ចង​គំនុំ​ខ្លាំង​ណាស់​ចំពោះ​ពួក​អ្នក​នយោបាយ​និង​ប៉ូលិស​។​ក្នុង​ខណៈ​នេះ​ ​ អាជ្ញាធរ​ពុំ​បញ្ជាក់​ប្រាប់​មូលហេតុ​នាំ​ឱ្យ​វា​បាញ់​ប្រហារ​គេ​ទេ​និង​រក្សា​ឥរិយាបថ​ប្រុង​ប្រយ័ត្ន​ខ្លាំង​ណាស់​។

យុវជន​នេះ​ត្រូវ​ប៉ូលិស​ស្គាល់​ច្បាស់​។​វា​ត្រូវ​បាន​សកលវិទ្យាល័យ​របស់​វា​ផ្អាក​បញ្ឈប់​ការសិក្សា​ជា​ច្រើន​លើក​ច្រើន​ដង​ ដោយ​ហេតុ​មាន​ចរិយា​មិន​ល្អ​ មុន​នឹង​បោះ​បង់​ចោល​ទាំង​ស្រុង​ការសិក្សា​ នៅ​ខែ​តុលា​ឆ្នាំ​ទៅ​។​នៅ​ក្នុង​ការស៊ើប​អង្កេត​នេះ​ ​ មេ​ប៉ូលិស​Clarence​ Dupnik​ បញ្ជាក់​ប្រាប់​ថា​កំពុង​តែ​តាម​រក​ជន​ជាប់​មន្ទិល​សង្ស័យ​ទី២​។​”​ យើង​គិត​ថា វា​ពុំ​បាន​ប្រព្រឹត្ត​តែ​ម្នាក់​ឯង​ទេ​ ។ទំនង​ជា​មាន​មនុស្ស​ម្នាក់​ទៀត​បាន​នាំ​វា​មក​ដាក់​នៅ​កន្លែង​កើត​ហេតុ​ ។​យើង​មាន​រូបថត​នៃ​បុគ្គល​នេះ​ហើយ​យើង​អាច​នឹង​ចុះ​ផ្សាយ​រូបថត​នេះ​នៅ​ពេល​បន្តិច​ទៀត​ “​ ​ ​ -នេះ​ជា​សំដី​របស់​មេប៉ូលិស​Clarence​ Dupnik​។

ពួក​ជន​ដែល​បាន​ឃើញ​ព្រឹត្តិការណ៍​ផ្ទាល់​នឹង​ភ្នែក​ត្រូវ​អាជ្ញាធរ​សាក​សួរ​ ដើម្បី​ចង់​ដឹង​ថា​ តើ​គេ​បាន​ឃើញ​បុគ្គល​នេះ​ឬ​ទេ​?​គឺ​បុរស​ដែល​មាន​អាយុ​ប្រមាណ​ជា​៥០ឆ្នាំ​។អ្វី​ដែល​ប្រាកដ​ជាក់​លាក់​គឺ​ស្ត្រី​អ្នក​តំណាង​រាស្ត្រ​Gabrielle​ Giffords​គឹ​ជា​ជន​ទី១​ដែល​ត្រូវ​បាន​គេ​ប៉ង​បាញ់​ប្រហារ​មុន​អ្នក​ដទៃ​ទៀត​។ជន​ជាប់​មន្ទិល​សង្ស័យ​នឹង​ត្រូវ​អាជ្ញាធរ​នាំ​ខ្លួន​ទៅ​តុលាការ​នៅ​ថ្ងៃ​អាទិត្យ​នេះ​៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ