អានតួអត្ថបទ
វិបត្តិកាតា

អាមេរិក​លក់​យន្តហោះចម្បាំង​ទៅឲ្យ​កាតា​ដែល​កំពុង​មានជម្លោះ​ជាមួយ​អារ៉ាប៊ីសាអ៊ូឌីត

យន្តហោះ​ចម្បាំង​ធុន​ F-15E Strike Eagles ដែល​អាមេរិក​ចុះ​កិច្ចសន្យា​លក់​ឲ្យ​កាតា (រូបថតឯកសារ)
យន្តហោះ​ចម្បាំង​ធុន​ F-15E Strike Eagles ដែល​អាមេរិក​ចុះ​កិច្ចសន្យា​លក់​ឲ្យ​កាតា (រូបថតឯកសារ) AFP PHOTO / US NAVY - Andrew Schneider
ដោយ៖ សេង ឌីណា
១៧ នាទី

អស់រយៈពេល​ជាងមួយសប្តាហ៍​មក​ហើយ​ដែល​ជម្លោះ​ដ៏ក្តៅគគុក​បាន​ផ្ទុះឡើង រវាង​កាតា និង​អារ៉ាប៊ីសាអ៊ូឌីត​ព្រមទាំង​សម្ព័ន្ធមិត្ត។ នៅ​ក្នុង​ជម្លោះ​នេះ​ គេ​សង្កេតឃើញ​លោក​ដូណាល់ត្រាំ​ធ្លាប់​បាន​បង្ហាញ​នូវ​ជំហរ​គាំទ្រ​អារ៉ាប៊ីសាអ៊ូឌីត។ ក៏ប៉ុន្តែ ស្រាប់តែ​មកដល់​ថ្ងៃ​ពុធ​នេះ ក្រសួង​ការពារជាតិ​អាមេរិក​​ហាក់ដូចជា​បង្ហាញ​នូវ​ជំហរ​ផ្ទុយ​ស្រឡះ​ទៅវិញ ដោយ​បាន​ប្រកាស​ចុះ​កិច្ចសន្យា​លក់​យន្តហោះចម្បាំង​ដ៏ទំនើប​ជាច្រើន​គ្រឿង ​ព្រមទាំង​បញ្ជូន​នាវាចម្បាំង​ឲ្យ​ទៅ​ធ្វើ​សមយុទ្ធរួមគ្នា​ជាមួយ​កាតា។

ផ្សាយពាណិជ្ជកម្ម

“កិច្ចសន្យា​លក់​យន្តហោះចម្បាំង​ក្នុង​ទឹកប្រាក់ ១២ពាន់លាន​ដុល្លារ​ទៅ​ឲ្យ​កាតា​នៅពេលនេះ នឹង​ជួយ​ឲ្យ​កាតា​បង្កើន​នូវ​សមត្ថភាព​កងទ័ព ព្រមទាំង​អាច​បង្កើន​នូវ​កិច្ចសហប្រតិបត្តិការ​ខាង​ផ្នែក​យោធា រវាង​កាតា​ និង​សហរដ្ឋ​អាមេរិក” នេះ​គឺ​ជា​ការ​ប្រកាស​ឲ្យដឹង​របស់​ក្រសួង​ការពារជាតិ​អាមេរិក នៅ​ក្នុង​សេចក្តីថ្លែងការណ៍​ចេញផ្សាយ កាល​ថ្ងៃ​ពុធ​ម្សិលមិញ។

ក្រសួងការពារជាតិ​អាមេរិក​មិន​បាន​លម្អិត​ពី​កិច្ចសន្យា​​​នេះ​ទេ ក៏ប៉ុន្តែ បើ​យោងតាម​បណ្តាញផ្សព្វផ្សាយ​អាមេរិក យន្តហោះចម្បាំង​ដែល​អាមេរិកលក់​ទៅ​ឲ្យ​កាតា​នេះ មាន​ចំនួន ៣៦គ្រឿង ហើយ​​ជា​ប្រភេទ​យន្តហោះធុន F-15 ។

ក្នុងថ្ងៃ​តែមួយ ដែល​អាមេរិក​ប្រកាស​ពី​ការ​លក់​យន្តហោះចម្បាំង​ទៅ​ឲ្យ​កាតា ក្រសួង​ការពារជាតិ​កាតាវិញ​ក៏​បាន​ប្រកាស​ឲ្យដឹង​ផងដែរ​ថា នាវាចម្បាំង​ពីរគ្រឿង​របស់​អាមេរិក​បាន​ធ្វើ​ដំណើរ​ទៅដល់​កាតា ដើម្បីបើក​ធ្វើ​​សមយុទ្ធទ័ពជើងទឹក​រួមគ្នា។

គួរបញ្ជាក់ថា កិច្ចសន្យា​លក់​យន្តហោះចម្បាំងអាមេរិក​ទៅ​ឲ្យ​កាតា​ត្រូវ​បាន​ភាគី​ទាំងពីរ​​ចរចាគ្នា​តាំងពី​ជាងមួយឆ្នាំមកហើយ។ អាមេរិក​ក៏​បាន​ព្រមព្រៀង​ជាគោលការណ៍​ក្នុងការ​លក់​យន្តហោះចម្បាំង​នេះ​តាំង​ពី​ឆ្នាំទៅមិញ​មកម៉្លេះ។ ផ្ទុយ​ទៅវិញ គេ​មិនបានដឹង​ប្រាកដ​ទេ​ថា តើ​ការ​ធ្វើ​សមយុទ្ធទ័ពជើងទឹក​រួមគ្នា​នៅពេលនេះ គឺ​ជា​ផែនការ​ដែល​រៀបចំឡើង​តាំងពី​ពេលណាមកនោះទេ។

ទោះជាយ៉ាងណា ​សេចក្តីប្រកាស​ពី​កិច្ចសហប្រតិបត្តិការ​ខាងផ្នែក​យោធា រវាង​អាមេរិក និង​កាតា​នៅពេលនេះ ត្រូវបាន​ធ្វើឡើង​ នៅចំពេល​ដែល​កាតា​កំពុងមាន​ជម្លោះ​យ៉ាងក្តៅគគុក​ជាមួយ​អារ៉ាប៊ីសាអ៊ូឌីត ហើយ​នេះ​គឺ​ជា​រឿង​ដែល​ធ្វើ​ឲ្យ​គេ​ចាប់អារម្មណ៍​ខ្លាំង ដោយសារ​តែ​កាលពី​ប៉ុ​ន្មានថ្ងៃ​មុននេះ លោក​ដូណាល់ត្រាំ​ធ្លាប់​បាន​ធ្វើ​សេចក្តីថ្លែងការណ៍​ខ្លះ ដែល​មាន​អត្ថន័យ​គាំទ្រ​អារ៉ាប៊ីសាអ៊ូឌីត​ ក្នុង​ជម្លោះ​ជាមួយ​កាតា។

ជំហរ​របស់​ក្រសួង​ការពារជាតិ​អាមេរិក ដែល​ចង់​ឲ្យ​មាន​ការ​សម្រុះសម្រួល​ជាមួយ​កាតា គឺ​ជា​រឿង​ដែល​គេ​អាច​យល់​បាន ពីព្រោះ​ថា អាមេរិក​មាន​មូលដ្ឋាន​ទ័ព​ដ៏ធំមួយ នៅ​ក្នុង​ប្រទេស​កាតា ហើយ​មូលដ្ឋានទ័ព​នៅ​កាតា​នេះ​ហើយ​ដែល​ជា​ទីបញ្ជាការដ្ឋាន​នៃ​ប្រតិបត្តិការ​យោធា​អាមេរិក នៅ​ក្នុង​តំបន់​មជ្ឈិមបូព៌ា ជាពិសេស ប្រតិបត្តិការ​ប្រយុទ្ធប្រឆាំង​នឹង​ក្រុម​ជីហាត​រដ្ឋ​​អ៊ីស្លាម។ ហេតុដូច្នេះហើយ​បាន​ជា​គេសង្កេតឃើញ​ថា ក្នុងរយៈពេល​ប្រមាណ​ជា​មួយសប្តាហ៍​កន្លងទៅនេះ នៅ​ក្នុងពេល​ដែល​លោក​ដូណាល់ត្រាំ​និយាយ​រិះគន់​កាតា ហើយ​កាន់ជើង​អារ៉ាប៊ីសាអ៊ូឌីត ក្រសួងការពារជាតិ និង​ក្រសួង​ការបរទេស​អាមេរិក​វិញ ព្យាយាមសម្រុះសម្រួល​ឲ្យ​គូជម្លោះ​ទាំងពីរ ដែល​តាមពិត​សុទ្ធតែ​ជា​សម្ព័ន្ធមិត្ត​អាមេរិកដូចគ្នា ធ្វើការ​ផ្សះផ្សាគ្នា​បញ្ចប់​ជម្លោះ​ទៅវិញ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ