អាមេរិក

សេវាកម្ម​​រដ្ឋាភិបាល​សហពន្ធ័​អាមេរិក​បន្ត​បិទ​ទ្វារ​ដោយសា​រវិបត្តិ​ថវិកា​

សារមន្ទី​ នៅ​រដ្ឋរាជធានី​វ៉ាស៊ីនតោន សហរដ្ឋអាមេរិក។
សារមន្ទី​ នៅ​រដ្ឋរាជធានី​វ៉ាស៊ីនតោន សហរដ្ឋអាមេរិក។ REUTERS/Kevin Lamarque

នេះ​ជា​ថ្ងៃ​ទី​២ហើយ​ដែល​រដ្ឋាភិបាល​សហ​ព័​ន្ធ​របស់​លោក អូ​បា​ម៉ា ជាប់​គាំង​ដោយសារ​វិបត្តិ​ថវិកា។ សេវាកម្ម​ជា​ច្រើន​បាន​បិទ​ទ្វារ​ដោយសារ​តែ​បុគ្គលិក​គ្មាន​ប្រាក់​ខែ​បន្ទាប់ពី​សភា ​Congrèsបាន​ជំទាស់​នឹង​គម្រោង​ថវិកា​របស់​រដ្ឋាភិបាល។ លោក​អូ​បា​ម៉ា​បាន​ចោទប្រកាន់​គណបក្ស​ប្រឆាំង​ថា​យក​បញ្ហា​សេដ្ឋកិច្ច​របស់​ប្រទេស​ជា​ចំណាប់ខ្មាំង​ដោយសារ​មនោគម​វិជ្ជា​​នយោបាយ​របស់​ខ្លួន។

ផ្សាយពាណិជ្ជកម្ម

ប្រធានាធិបតី​អាមេរិក លោក បា​រ៉ា​ក់ អូ​បា​ម៉ា បាន​អង្វករ​ឲ្យ​សមាជិកសភា Congrès មកពី​គណបក្ស​សាធារណរដ្ឋ​បោះឆ្នោត​អនុម័ត​គម្រោង​ថវិកា​របស់​លោក​ ដោយ​មិន​បង្អង់​ឡើយ​ដើម្បី​ឲ្យ​ដំណើរការ​របស់​រដ្ឋាភិបាល​សហ​ព័ន្ធ​ចាក​ចេញ​ពី​ការ​ជាប់​គាំង។ លោក អូបាម៉ា​អះអាង​ថា ការអនុម័ត​អាច​នឹង​ធ្វើ​ទៅ​បាន​ដរាប​ណា​គណ​បក្ស​សាធារណរដ្ឋ​យល់​ថា ពួកគេ​គ្មាន​សិទ្ធិ​យក​បញ្ហា​សេដ្ឋកិច្ច​របស់​ជាតិ​ទាំង​មូល​ទៅ​ធ្វើ​ជា​ចំណាប់ខ្មាំង​ដោយសារ​តែ​ហេតុផល​មនោគមន៍វិជ្ជា​នយោបាយ​របស់​ខ្លួន​ឡើយ។

 

គួរបញ្ជាក់ថា នេះ​ជា​លើក​ទី​១​ហើយ ចាប់​តាំង​ពី​ឆ្នាំ ១៩៩៦ មក​ដែល​រដ្ឋាភិបាល​សហ​ព័ន្ធ​​ជួប​បញ្ហា​ជាប់​គាំង​ខាង​ថវិកា​បែប​នេះ។ ជា​ផលវិបាក ឧទ្យាន​ជាតិ​ធំៗ សារៈមន្ទីរ​ជាតិ ទីលាន​សេរីភាព និង​សួន​ឧទ្យាន​ធម្មជាតិ​មួយ​ចំនួន​ទៀត​បាន​បិទទ្វារ​មិន​ទទួល​អ្នកទេសចរ​ឡើយ​ពី​ព្រោះតែ​បុគ្គលិក​បម្រើការ​នៅ​ទីនោះ​ត្រូវ​បាន​ប្រកាស​ឲ្យ​ឈប់សម្រាក​ដោយ​គ្មាន​ប្រាក់​ឈ្មួ​ល​ដោយសារ​តែ​រដ្ឋ​គ្មាន​ថវិកា។

 
រដ្ឋាភិបាល​សហ​ព​ន្ធ័​មាន​ពេល​ត្រឹម​ពាក់កណ្តាល​អា​ធ្រា​ត្រ​ថ្ងៃ​ចន្ទ​ទី៣០កញ្ញា​ដើម្បី​រង់ចាំ​ការ​អនុម័ត​ថវិកា​សម្រាប់​ដំណើរការ​ឆ្នាំ​២០១៤ ប៉ុន្តែ​គម្រោង​នេះ​បាន​ជាប់គាំង និង​ទាត់ចោល​ដោយ​សភា Congrès ។ ការ​ជាប់​គាំង​ខាង​ថវិកា​នេះ​បាន​ធ្វើ​ឲ្យ​រដ្ឋាភិបាល​គ្មាន​ប្រាក់​សម្រាប់​បើកប្រាក់​ខែ​ឲ្យ​មន្ត្រី​រដ្ឋការ និង​ត្រូវ​បង្ខំចិត្ត​បិទ​សេវាកម្ម​មួយ​ផ្នែក​ធំ។

មន្ត្រី​សាធារណៈ​នៃ​រដ្ឋាភិបាល​សហព័ន្ធ​ជិត​១​លាន​នាក់ នឹង​ត្រូវ​គេ​បង្ខំ​ឲ្យ​ឈប់សម្រាក ដោយ​គ្មាន​ប្រាក់​ឈ្នួល រហូត​ទាល់​តែ​សភា​អាច​អនុម័ត​ថវិកា​ថ្មី​បាន ហើយ​រដ្ឋាភិបាល​អាច​ចាប់​ដំណើរការ​ឡើង​វិញ។ ចំណុច​ខ្ទាស់​ធំ​បំផុត​ដែល​គណបក្ស​សាធារណរដ្ឋ​មិន​ព្រម​អនុម័ត​គម្រោង​ថវិកា​នេះ គឺ​ដោយសារតែ​ពួកគេ​ជំទាស់​ទៅ​នឹង​គម្រោង​ច្បាប់​ធានារ៉ាប់រង​សុខភាព​របស់លោក​អូ​បា​ម៉ា ដែល​គេ​ហៅថា Obamacare។

យ៉ាងណាក៏ដោយ ការជាប់គាំង​នេះ​មាន​ផលប៉ះពាល់​តែ​សេវាកម្ម​សាធារណៈ​មួយចំនួន​របស់​រដ្ឋាភិបាល​សហ​ព័ន្ធ​​តែ​ប៉ុណ្ណោះ។ ដោយឡែក​សេវាកម្ម​សំខាន់ៗ​ដូចជា ប៉ូលិស ទាហាន ភ្នាក់ងារ​ពន្លត់​អគ្គិភ័យ មន្ទីរពេទ្យ និង​សេវាកម្ម​ត្រួតពិនិត្យ​ជើងហោះហើរ ជាដើម នៅតែ​ដំណើរការ​ដដែល៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI