អានតួអត្ថបទ
អ៊ីរ៉ាក់-អាមេរិក

អាមេរិក​បញ្ជូន​ទីប្រឹក្សា​យោធា​១៣០​នាក់​ទៅ​អ៊ីរ៉ាក់

ជនជាតិ​ភាគ​តិច​យ៉ាហ្ស៊ីឌីស ភៀសខ្លួន​នៅ​តំបន់​ភ្នំSinjar ភាគ​ខាង​ជើង​អ៊ីរ៉ាក់
ជនជាតិ​ភាគ​តិច​យ៉ាហ្ស៊ីឌីស ភៀសខ្លួន​នៅ​តំបន់​ភ្នំSinjar ភាគ​ខាង​ជើង​អ៊ីរ៉ាក់ © Reuters
ដោយ៖ អៀង សុខម៉ិញ
១២ នាទី

លោក ឆាក់ ហាហ្កែល រដ្ឋមន្ត្រី​ក្រសួង​ការពារជាតិ​អាមេរិក​ បាន​ប្រកាស​នៅ​ថ្ងៃ​យប់​អង្គារ ទី​១២ សីហា បញ្ជូន​យោធា​បន្ថែម​ ទៅ​កាន់​ក្រុង​អែរប៊ីល រដ្ឋធានី​នៃ​តំបន់​ស្វយ័ត​គៀរឌីស្តង់​របស់​អ៊ីរ៉ាក់។ ​មាន​​ជំនាញផ្នែក​ប្រឹក្សា​​ស្ថានការណ៍ ក្រុម​ទាហាន​អាមេរិកទាំង​១៣០​នាក់​​ មាន​ភារកិច្ច​​​​ចុះ​ទៅ​វាយ​តម្លៃ​ឱ្យ​បាន​ស៊ី​ជម្រៅ​ សេចក្តី ត្រូវ​ការ​របស់​បណ្តា​ជន​ជាតិ​ភាគ​តិច​យ៉ាហ្ស៊ីឌី (Yazidi)  ដែល​ពួក​ជីហាត​អ៊ីស្លាម​បណ្តេញ​តាម​កាប់​សម្លាប់។

ផ្សាយពាណិជ្ជកម្ម

 

ទីប្រឹក្សា​យោធា​ប្រមាណ​១៣០​នាក់ បាន​ទៅ​ដល់​​ភាគ​ខាង​ជើង​ប្រទេស​អ៊ីរ៉ាក់​ នៅ​ថ្ងៃ អង្គារ​ម្សិលមិញ បន្ទាប់​ពី​បាន​ទទួល​ការ​អនុញ្ញាត​ពី​ប្រធានាធិបតី​បារ៉ាក់អូបាម៉ាភ្លាម។ ក្រុម​ឯកទេស​នេះ ត្រូវ​ចុះ​ទៅ​វាយ​តម្លៃ​ ឱ្យ​បាន​ស៊ីជម្រៅ​ អំពី​អ្វី​ដែល​អាមេរិក​គួរ​ធ្វើ​ដើម្បី​ជួយ​សង្គ្រោះ​អ៊ីរ៉ាក់​ចេញ​ពី​វិបត្តិ ! គ្មាន​កាតព្វកិច្ច​ជា​​អ្នក​ប្រយុទ្ធ​លើ​សមរភូមិ​ទេ​ ពី​ព្រោះ​អាមេរិក​ក្រោយ​ពី ចាក​ចេញពី​អ៊ីរ៉ាក់ គ្មាន​សោះ​ឡើយ​ចេតនា​ចង់​វិល​ទៅ​ដើរ​លើ​ដាន​ចាស់។

នេះ​ជា​យោធា​​ក្រុមទីពីរ​ហើយ​ដែល​អាមេរិក​បាន​បញ្ជូន​ទៅ​ធ្វើអ៊ីរ៉ាក់។ កាលពី​ខែ​មិថុនា​ លោក​ប្រធានាធិបតី​​ អូបាម៉ា ក៏​បាន​បញ្ជូន​ទីប្រឹក្សា​យោធា ប្រមាណ​បីរយ​នាក់ ឱ្យ​ទៅ​ជួយ​ពង្រឹង​និង​សហការ​ជាមួយ​​រដ្ឋាភិបាល​អ៊ីរ៉ាក់​ ក្នុង​ការ​ប្រយុទ្ធ​ទប់ទល់​ជាមួយ​ពួក​ជីហាត​រដ្ឋ​អ៊ីស្លាម។

ប៉ុន្តែ​បើ​តាម​ប្រភ​ព​មន្ទីរ​បញ្ចកោណ​សុំ​មិន​បញ្ចេញ​ឈ្មោះ ភារកិច្ច​របស់​ទីប្រឹក្សា​​យោធា​នេះ គឺ​រៀប​ចំ​ដាក់​ផែនការជំនួយ​សង្គ្រោះ​ជនជាតិ​យ៉ាហ្សេឌី បន្ថែម​ពីលើ​មនុស្សធម៌​ដែល​អាមេរិក​កំពុង​ធ្វើ​បច្ចុប្បន្ន (ទម្លាក់​ជំនួយ​ស្បៀង​អាហារ​ និង​ទឹក)។ យ៉ាហ្សេឌីស ជនជាតិ​ភាគ​តិច​​និយាយ​ភាសាស​គៀរឌីស្តង់ ​ដែល​ជា​ទិស​ដៅ​វាយប្រហារ​​ពី​សំណាក់​ពួក​ជីហាត​អ៊ីស្លាម ត្រូវ​បង្ខំ​ចិត្ត​រត់​ចេញ​ពី​ផ្ទះ​​សម្បែង​និង​នាំ​គ្នា​ទៅ​សំងំភៀស​ខ្លួន​ក្នុង​​តំបន់​ភ្នំSinjar។ ពេល​នេះ​ទំនង​ធ្លាក់​ក្នុង​អន្ទាក់ ជាប់​កុន​​ព័ទ្ធ​ដោយ​ពួក​ជីហាត​ចេញ​មិន​រួច។ ពួកជីហាត​ដែល​មិន​សំចៃ​នឹង​កាប់​សម្លាប់ ឬ​កប់​ទាំង​រស់​ជនជាតិ​ភាគ​តិច​ក្រុម​នេះ​ទេ នៅ​ពេលវាយ​លុក​ចូល​ដល់។

ព័ត៌មាន​នេះ​អាច​យក​ជា​ការណ៍​បាន​ ដ្បិត​នៅ​ព្រឹក​នេះ ប្រមុខ​ការទូត​​អាមេរិក លោក ចន ឃែរី បាន​ប្រកាស​ថា​កំពុង​សិក្សា​​រកគ្រប់​​មធ្យោបាយ​ជម្លៀស​ជា​បន្ទាន់​​បណ្តាជន​ជាប់កុន​ក្នុង​តំបន់​ភ្នំ​ភាគ​ខាង​ជើង​អ៊ីរ៉ាក់ ព្រោះ​ពួក​ជីហាត​រុល​សំដៅ​ទិស​នោះ។ អ្នក​ឯកទេស​​អង្គការ​សហប្រជាជាតិ​​ផ្នែក​សិទ្ធិមនុស្ស​ក៏​បានអំពាវនាវ​ឱ្យ​សហគមន៍​អន្តរជាតិ​បញ្ចេញ​សកម្មភាព​បន្ទាន់ ទប់​ស្កាត់​គ្រោះ​​ប្រល័យ​ពូជសាសន៍​ លើ​ពូជសាសន៍​យ៉ាហ្សេឌីស ដែល​មាន​គ្នា​ប្រមាណ​​៣៥០០០​នាក់​លាក់​ខ្លួន​នៅ​តំបន់​ភ្នំនោះ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ