អាមេរិក-ភូមា

សហរដ្ឋអាមេរិក​ប្រកាស​លើក​ទ័ណ្ឌកម្ម​លើ​ការ​នំា​ផលិតផល​ភូមា​ចូល​អាមេរិក

ជំនួប​រវាង​លោកស្រី អ៊ុង សានស៊ូជី និង​លោកស្រី ហ៊ីលឡារី គ្លីនតុន
ជំនួប​រវាង​លោកស្រី អ៊ុង សានស៊ូជី និង​លោកស្រី ហ៊ីលឡារី គ្លីនតុន REUTERS/Gary Cameron

សហរដ្ឋអាមេរិក​បាន​ប្រកាស​ឲ្យ​ដឹង​ពី​ការ​លើក​ចេញ​វិញ​នូវ​ទ័ណ្ឌកម្ម​លើ​ការ​នំា​ផលិតផល​ភូមា​ចូល​ក្នុង​ទឹកដី​អាមេរិកំាង។ ការ​អនុញ្ញាត​ឲ្យ​មាន​ការ​នំា​ផលិតផល​ភូមា​ចូល​អាមេរិក​ជាថ្មី​នេះ គឺ​ជា​ជំហាន​វិជ្ជមាន​មួយ​ឆ្ពោះ​កាន់​ភាពប្រក្រតី​នៅ​ក្នុង​ទំនាក់ទំនង​រវាង​ទីក្រុង​វ៉ាស៊ីនតោន និង​ទីក្រុង​ណៃពីដ៏។ ដំណឹង​ល្អ​នេះ​ត្រូវ​បាន​ប្រជាជន​ភូមា​គ្រប់​ស្រទាប់​វណ្ណៈ​សម្តែង​ការ​សប្បាយ​រីករាយ​យ៉ាង​ខ្លំាង។

ផ្សាយពាណិជ្ជកម្ម

ដំណឹង​នេះ​ត្រូវ​បាន​លោកស្រី​ប្រមុខការទូត​អាមេរិក ហ៊ីលឡារី គ្លីនតុន ជម្រាប​ប្រាប់​លោក​ប្រធានាធិបតី​ភូមា ថេន សេន នៅ​ក្នុង​ជំនួប​មួយ ក្រៅ​ក្របខណ្ឌ​មហាសន្និបាត​អង្គការ​សហប្រជាជាតិ​ក្នុង​ទីក្រុង​ញូយ៉ក។ « រដ្ឋបាល​អាមេរិកំាង​នឹង​ផ្តើម​លើក​ចេញ​វិញ​នូវ​ការ​ហាមឃាត់ ការ​នំា​ចូល​ផលិតផល​ភូមា​ទៅ​កាន់​សហរដ្ឋអាមេរិក » នេះ​ជា​ការ​ថ្លែង​របស់​លោកស្រី គ្លីនតុន ដែល​បាន​ទទួល​ស្គាល់​ពី​ស្ថានការណ៍​វិវត្តន៍​ប្រកប​ដោយ​វិជ្ជមាន​នៅ​ក្នុង​ប្រទេស​ភូមា​នា​រយៈពេល​ចុង​ក្រោយ​នេះ។ លោកស្រី​គ្លីនតុន​​បាន​បន្ថែម​ថា ទីក្រុង​វ៉ាស៊ីនតោន​បាន​បោះ​មួយជំហាន​ថែម​ទៀត​នៅ​ក្នុង​ភាពប្រក្រតី​នៃ​ទំនាក់ទំនង​ពាណិជ្ជកម្ម​ជាមួយ​ទីក្រុង​រ៉ង់ហ្គូន។ ជា​ការ​ឆ្លើយតប​វិញ លោកប្រធានាធិបតី​ភូមា​ថេន សេន​បាន​សម្តែង​ការ​អរគុណ​ចំពោះ​សហរដ្ឋអាមេរិក និង​ថា ប្រជាជន​ភូមា​មាន​ការ​ពេញ​ចិត្ត និង​សប្បាយ​រីករាយ​យ៉ាង​ខ្លំាង។

សូម​ជម្រាប​ជូន​ថា ដោយ​បាន​មើល​ឃើញ​ពី​ភាពស្មោះត្រង់​របស់​ថ្នាក់ដឹកនំាថ្មី​នៅ​ភូមា​បច្ចុប្បន្ន អាមេរិក​ធ្លាប់​បាន​លើក​ចេញ​កាល​ពី​ដំណាច់​ខែ​កក្កដា​កន្លង​មក​នូវ​ទ័ណ្ឌកម្ម​មួយ​ចំនួន​ពាក់ព័ន្ធ​នឹង​វិនិយោគ​របស់​អាមេរិក​ក្នុង​ប្រទេស​ភូមា ពិសេស​វិស័យ​ឧស្ម័ន និង​ប្រេងឥន្ធនៈ។ បន្ទាប់​មក ឈ្មោះ​លោក ថេន សេន​ក៏​ត្រូវ​បាន​លប់​ចេញ​ពី​បញ្ជី​ខ្មៅ​នៃ​ឥស្សរជន​ដែល​ទទួល​ទ័ណ្ឌកម្ម។ ចំណែក​ឯកអគ្គរដ្ឋទូត​អាមេរិក​​ថ្មី​ក៏​ត្រូវ​បាន​បញ្ជូន​ទៅ​ប្រចំាការ​នៅ​ក្នុង​ប្រទេស​ភូមា ដែល​នេះ ជា​លើក​ទីមួយ​គិត​តំាង​ពី ២២ឆ្នំា​កន្លង​មក។ គួរ​រំលឹកជូន​ថា នៅ​មុន​ទណ្ឌកម្ម អាមេរិក​ច្រើន​ទិញ​ពី​ភូមា​នូវ​ឈើ ត្បូងធម្មជាតិ​មាន​តម្លៃ និង​សំលៀកបំពាក់។ ឥឡូវ​នេះ និង​បើ​យោង​តាម​អ្នកទទួលខុសត្រូវ​ម្នាក់​នៃ​ក្រសួង​ការបរទេស​អាមេរិក សភា​អាមេរិក​នឹង​ផ្តើម​ពិនិត្យ​មើល​លើ​ប្រភេទ​ផលិតផល​ដែល​នឹង​ត្រូវ​លើក​ទណ្ឌកម្ម​ចេញ​វិញ។

យ៉ាង​ណា​ក៏​ដោយ ដំណឹង​ល្អ​នេះ​បាន​បំផុស​ឲ្យ​មាន​សេចក្តីសោមនស្ស​យ៉ាង​ខ្លំាង​ពី​សំណាក់​ប្រជាជន​ភូមា​ទូទៅ ក្រោយ​ពី​សេដ្ឋកិច្ច​របស់​ប្រទេស​បាន​ធ្លាក់​ដល់​កម្រិតសូន្យ​នៅ​ក្នុង​ការ​កាន់​អំណាច​របស់​របបសឹក​អស់​រយៈពេល ៥០ឆ្នំា។ « ខ្ញុំ​បាន​រង់ចំា​ព្រឹត្តិការណ៍​នេះ តំាង​ពី​ឆ្នំា ២០០៣ មក​ម្ល៉េះ » នេះ​ជា​ការ​អះអាង​របស់​លោក អ៊ុង វីន អនុប្រធាន​សមាគម​ផលិតករ​វាយនភណ្ឌ។ ងាក​ទៅ​មើល​គណបក្សប្រឆំាង​របស់​លោកស្រី អ៊ុង សានស៊ូជី​វិញ​ម្តង ក្រៅ​ពី​ការ​សាទរ បក្សប្រឆំាង​បាន​បញ្ជាក់​ថា ប្រជាជន​ភូមា​នឹង​មិន​អាច​ទទួល​បាន​ផល​ភ្លាមៗ​ពី​ការ​លើក​ទណ្ឌកម្ម​នោះ​ទេ តែ​វា​ជា​រឿង​ល្អ​ណាស់​សម្រាប់​ពេល​អនាគត៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI