អានតួអត្ថបទ
ព្រឹត្តិការណ៍អន្តរជាតិប្រចាំថ្ងៃ

អាមេរិក និង​ក្រុមឧទ្ទាម​តាលីបង់​គ្រោង​អង្គុយ​ជជែកគ្នា​ដើម្បី​ស្វែង​រកសន្តិភាព​ឲ្យ​ប្រទេស​អាហ្វហ្កានីស្ថាន

សំឡេង ០៥:២០
ទិដ្ឋភាព​ខាងក្នុង​ការិយាល័យ​របស់​ពួកឧទ្ទាម​តាលីបង់ ក្នុង​ទីក្រុង​ដូហា ប្រទេស​កាតារ
ទិដ្ឋភាព​ខាងក្នុង​ការិយាល័យ​របស់​ពួកឧទ្ទាម​តាលីបង់ ក្នុង​ទីក្រុង​ដូហា ប្រទេស​កាតារ REUTERS/Mohammed Dabbous
៣១ នាទី

នៅ​ថ្ងៃ​អង្គារ ទី១៨ មិថុនា ក្រុមឧទ្ទាម​តាលីបង់​អាហ្វហ្កានីស្ថាន​ទើប​មាន​ការិយាល័យ​ផ្លូវការ​មួយ​របស់​ខ្លួន​ប្រចំា​នៅ​ក្នុង​ទីក្រុង​ដូហា ប្រទេស​កាតារ។ ការ​បើក​ឲ្យ​មាន​ការិយល័យ​មួយ​របស់​ក្រុម​ឧទ្ទាម​តាលីបង់​ពេល​នេះ​បាន​ធ្វើ​ឡើង ចំ​ថ្ងៃ​ដែល​រដ្ឋាភិបាល​អាហ្វហ្កានីស្ថាន​ទើប​បាន​ទទួល​តួនាទី​ជា​អ្នកគ្រប់គ្រង​សន្តិសុខ​នៅ​ទូទំាងប្រទេស​ពី​អង្គការ​ណាតូ។ តាម​រយៈ​ការិយាល័យ​នេះ អាមេរិក និង​ពួកតាលីបង់​គ្រោង​នឹង​អង្គុយ​ចរចា​គ្នា​នៅ​ថ្ងៃ​ខាង​មុខ​ដើម្បី​ស្វែង​រក​សន្តិភាព និង​សន្តិសុខ​ឲ្យ​ប្រទេស​អាហ្វហ្កានីស្ថាន។ តែ​នៅ​មាន​បញ្ហា​ប្រឈម​ជា​ច្រើន​ដែល​អាមេរិក និង​ពួកឧទ្ទាម​ត្រូវ​ដោះស្រាយ។

ផ្សាយពាណិជ្ជកម្ម

ចាប់​ពី​ពេល​នេះ​ត​ទៅ គ្រប់​ភាគី​ជម្លោះ​នៅ​ក្នុង​ប្រទេស​អាហ្វហ្កានីស្ថាន​ទំាង​អស់​អាច​ណាត់​ជួប​ចរចា​ជាមួយ​ពួកឧទ្ទាម​តាលីបង់​នៅ​ក្នុង​ទីក្រុង​ដូហា ប្រទេស​កាតារ។ ភាគី​ជម្លោះ រួម​មាន​រដ្ឋាភិបាល​អាហ្វហ្កានីស្ថាន ក្រុមឧទ្ទាម​តាលីបង់ និង​សហគមន៍​អន្តរជាតិ​ដែល​មាន​សហរដ្ឋអាមេរិក ជា​មេក្លោង។ គោលដៅ​នៃ​ការ​ជួបចរចា​រវាង​ភាគី​ពាក់ព័ន្ធ គឺ​ដើម្បី​ស្វែង​រក​សន្តិភាព និង​សន្តិសុខ​ឲ្យ​ប្រទេស​អាហ្វហ្កានីស្ថាន។ អាហ្វហ្កានីស្ថាន​ដែល​ស្ថានភាព​ក្នុង​រយៈពេល​ជាង ១០ឆ្នំា​ចុង​ក្រោយ​នេះ បាន​បង្កប់​ដោយ​អំពើហឹង្សា​គ្មាន​រលួស​ថ្ងៃ​ដែល​បង្ក​ឡើង​ដោយ​ពួក​តាលីបង់។

ទោះបី​ជា​មាន​វត្តមាន​របស់​កម្លំាង​ណាតូ​រហូត​ដល់​ទៅ​ជាង ១០ម៉ឺន​នាក់​ក៏​ដោយ ក៏​ចលនា​ឧទ្ទាម​មួយ​នេះ​ហាក់​ដូច​ជា​មាន​ឥទ្ធិពល​កាន់​តែ​ខ្លំាង​ទៅៗ។ ពួក​គេ​មាន​លទ្ធភាព និង​សមត្ថភាព​គ្រប់គ្រាន់​ក្នុង​ការ​រៀបចំ​អំពើ​ភេរវកម្ម​បង្ហូរ​ឈាម​នៅ​ពេល​ណា​ក៏​បាន និង​នៅ​ទីកន្លែង​ណា​ក៏​បាន រហូត​ដល់​ចំ​កណ្តាល​បេះដូង​ទីក្រុង​កាប៊ូល។ ឥទ្ធិពល​កាន់​តែ​ខ្លំាង​ឡើងៗ​របស់​ពួក​តាលីបង់​ដែល​បាន​ធ្វើ​ឲ្យ​អាមេរិក​មិន​បដិសេធ​ពី​គំនិត​ផ្តួចផ្តើម​ឲ្យ​មាន​ការ​ចរចា​ផ្ទាល់​ជាមួយ​ពួក​ឧទ្ទាម​ទេ។ មួយ​វិញ​ទៀត វត្តមាន​ការិយាល័យ​របស់​ឧទ្ទាម​តាលីបង់​ក្នុង​ប្រទេស​កាតា​ពេល​នេះ ក៏​ជា​លទ្ធផល​បាន​មក​ពី​ការ​ព្រមព្រៀង​គ្នា​រវាង​ទីក្រុង​វ៉ាស៊ីនតាន និង​ពួក​ឧទ្ទាម​ដែរ។

អាមេរិក និង​ពួកតាលីបង់​មាន​ឧបសគ្គ​ជា​ច្រើន​ដែល​ត្រូវ​ដោះស្រាយ

អាមេរិក និង​ពួក​ឧទ្ទាម​តាលីបង់​គ្រោង​នឹង​អង្គុយ​ជជែក​ទល់​មុខ​គ្នា​ជា​លើកទីមួយ​នៅ​ពេល​ខាង​មុខ​ក្នុង​ទីក្រុង​ដូហា ប្រទេស​កាតារ។ គេ​ពិបាក​នឹង​ទទួល​បាន​ព័ត៌មាន​លំអិត​បន្ថែម​ជុំវិញ​ជំនួប​រវាង​តាលីបង់ និង​អាមេរិក​នៅ​ថ្ងៃ​ខាង​មុខ។ តែ​ប្រហែល​ជា​គ្មាន​អ្វី ក្រៅ​ពី​ការ​ស្វែង​រក​សន្តិភាព និង​សន្តិសុខ​ឲ្យ​ប្រទេស​អាហ្វហ្កានីស្ថាន​ឡើយ។ ជាង ១០ឆ្នំា​ក្រោយ​ការ​ដួលរលំ​របប​តាលីបង់​មក ចលនា​ឧទ្ទាម​មួយ​នេះ​នៅ​បន្ត​ជា​តួអង្គ​មួយ​យ៉ាង​សំខាន់ និង​ចំាបាច់​នៅ​ក្នុង​ដំណើរ​ស្វែង​រក​សន្តិភាព និង​សន្តិសុខ​ឲ្យ​ប្រទេស​អាហ្វហ្កានីស្ថាន។ ប៉ុន្តែ មុន​នឹង​អាច​និយាយ​ដល់​រឿង​សន្តិភាព និង​សន្តិសុខ​បាន អាមេរិក និង​ពួកឧទ្ទាម​មាន​ចំណុច​មិន​ចុះ​សម្រុង​គ្នា​មួយ​ចំនួន​ដែល​ត្រូវ​ជជែក​ដោះស្រាយ រួម​មាន អនាគត​របបនយោបាយ​ថ្មី​របស់​ប្រទេស​អាហ្វហ្កានីស្ថាន ឬ​មួយ​ក៏​វត្តមាន​ទាហាន​អាមេរិកំាង​ក្នុង​ទឹកដី​អាហ្វហ្កានីស្ថាន​ជា​ដើម។

ត្រង់​ចំណុច​នេះ ទីក្រុង​វ៉ាស៊ីតោន​ធ្លាប់​បាន​បញ្ជាក់​ថា ខ្លួន​នឹង​មិន​ព្រម​ដក​ទ័ព​ចេញ​ពី​អាហ្វហ្កានីស្ថាន​ទេ ដរាប​ណា​អាហ្វហ្កានីស្ថាន​នៅ​តែ​ជា​ប្រទេស​គំរាមកំហែង​ដល់​សន្តិសុខ​របស់​អាមេរិក។ ចំណែក​ក្រុម​តាលីបង់​ធ្លាប់​បាន​ប្រកាស​ថា ពួក​គេ​នឹង​មិន​យល់​ព្រម​ឲ្យ​អង្គការ ឬ​ចលនា​ណា​មួយ​ប្រើប្រាស់​ទឹកដី​អាហ្វហ្កានីស្ថាន​ដើម្បី​គំរាមកំហែង​ប្រទេស​ណា​មួយ​ទេ។ តែ​ពួក​នេះ​មិន​បាន​និយាយ​ចំ​ឈ្មោះ​អង្គការ​អាល់កៃដា​ដែល​ជា​សត្រូវ​របស់​អាមេរិក​ឡើយ។ ទន្ទឹម​គ្នា​នេះ ពួក​ឧទ្ទាម​ក៏​ធ្លាប់​បាន​ស្នើ​អាមេរិក​ឲ្យ​ដោះលែង​អ្នកទោស​របស់​គេ​ទំាង​អស់​ដែល​អាមេរិក​បាន​ចាប់​ឃុំ​នៅ​ពន្ធធនាគារ Guantanamo ក្នុង​ប្រទេស​គុយបា។

ដូច្នេះ​ឃើញ​ថា ផ្លូវ​ដែល​អាមេរិក និង​ពួកឧទ្ទាម​ត្រូវ​ដើរ នៅ​វែង​ឆ្ងាយ និង​លំបាក មុន​នឹង​ឈាន​ទៅ​និយាយ​ពី​សន្តិភាព និង​សន្តិសុខ​សម្រាប់​ប្រទេស​អាហ្វហ្កានីស្ថាន។

សហគមន៍​អន្តរជាតិ​អស់​លទ្ធភាព​ក្នុង​ការ​បង្រ្កាប​ពួក​តាលីបង់​ឲ្យ​ដល់​ឫសគល់

ការ​ដែល​គ្រប់​ភាគី​ពាក់ព័ន្ធ ពិសេស​អាមេរិក​ប្តូរ​យុទ្ធសាស្រ្ត​ងាក​មក​ចង់​ចរចា​ជាមួយ​ក្រុម​ឧទ្ទាម​ទៅ​វិញ មក​ពី​ការ​ប្រើ​កម្លំាងបាយ មិន​បាន​ហុច​លទ្ធផល​អ្វី​ទំាង​អស់។ របប​តាលីបង់​បាន​រលំ ពួក​តាលីបង់​បាន​បែក​ខ្ញែក រត់​ខ្ចាត់ខ្ចាយ ក៏​ប៉ុន្តែ រចនាសម្ព័ន្ធ​របស់​ចលនា​ឧទ្ទាម​មួយ​នេះ​នៅ​តែ​មាន។ ពួក​គេ​បាន​ក្លាយ​ខ្លួន​ជា​ទ័ពព្រៃ និង​ចង់​បើក​ការ​វាយឆ្មក់​ទៅ​លើ​កម្លំាង​អន្តរជាតិ និង​កម្លំាង​រដ្ឋាភិបាល​អាហ្វហ្កានីស្ថាន​ពេល​ណា​ក៏​បាន និង​នៅ​កន្លែង​ណា​ក៏​បាន។

ឥទ្ធិពល​របស់​ពួក​ឧទ្ទាម​ដែល​ហាក់​ដូច​ជា​គ្មាន​កម្លំាង​ណា​អាច​ទប់ទល់​បាន​ទៀត​ឡើយ ទំាង​កម្លំាង​អូតង់ ក៏​ដូច​ជា​កម្លំាង​របស់​លោក​ប្រធានាធិបតី​អាហ្វហ្កានីស្ថាន Hamid Karzaï។ កុំ​ថា​ឡើយ​តែ​កម្លំាង​បរទេស​ដែល​ពិបាក​នឹង​ស្គាល់​ថា នរណា​ជា​ទាហាន​អាហ្វហ្កានីស្ថាន​ និង​នរណា​ជា​ពួក​តាលីបង់ សូម្បី​តែ​ទាហាន​អាហ្វហ្កានីស្ថាន​ខ្លួន​ឯង ក៏​ពិបាក​នឹង​បែងចែក​ដែរ ព្រោះ​មុខមាត់ និង​រាងរៅ​របស់​ពួក​តាលីបង់​ក៏​ដូច​ខ្លួន ខ្លួន​ក៏​ដូច​ពួក​តាលីបង់​ដែរ។ ម្យ៉ាង​វិញ​ទៀត ការ​ធ្វើ​សង្រ្គាម​ប្រឆំាង​នឹង​ទ័ពព្រៃ ក៏​មិន​មែន​ជា​រឿង​ងាយស្រួល​ដែរ ពិសេស​កម្លំាង​បរទេស​ដែល​មិន​ធ្លាប់​ស្គាល់​​ទីតំាង​នៃ​ការ​លាក់ខ្លួន​របស់​ពួក​ឧទ្ទាម ដូច​នៅ​ប្រទេស​អាហ្វហ្កានីស្ថាន​ដែល​សំបូរ​ទៅ​ដោយ​ព្រៃ ភ្នំ។

ដូច្នេះ ឃើញ​ថា ជម្រើស​ដែល​ល្អ ក្នុង​ការ​បិទបញ្ចប់​សង្រ្គាម​រំារ៉ៃ​នៅ​ក្នុង​ប្រទេស​អាហ្វហ្កានីស្ថាន គឺ​ការ​ចរចា​ជាមួយ​ពួកឧទ្ទាម។ ត្រង់​ចំណុច​នេះ អាមេរិក និង​រដ្ឋាភិបាល​របស់​លោក Hamid Karzai សុទ្ធ​តែ​បាន​យល់​ឃើញ​ដូច​គ្នា។ តែ​សួរ​​ថា តើ​ការ​ចរចា​ហ្នឹង​ត្រូវ​ប្រើ​ពេល​ប៉ុន្មាន និង​ទទួល​បាន​លទ្ធផល​យ៉ាង​ណា​នោះ, វា​ជា​រឿង​មួយ​ដែល​គេ​ត្រូវ​រង់ចំា​មើល​នៅ​ពេល​ខាង​មុខ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ