អានតួអត្ថបទ
ព្រឹត្តិការណ៍អន្តរជាតិប្រចាំថ្ងៃ

សភា​សង្ឃ​កាតូលិក​ស្តីពី​គ្រួសារ បិទ​បញ្ចប់​ដោយ​គ្មាន​​ការ​ព្រមព្រៀងលើ​ចំណុច​លែង​លះ និង​អ្នក​ស្រលាញ់​ភេទ​ដូចគ្នា​

សំឡេង ០៦:២៩
សម្តេច​ប៉ាប François និង​ប្រមុខ​សាសនា​កាតូលិក​ ក្នុង​ពិធី​បើក​សម័យ​ប្រជុំ​សភា​សង្ឃ​ ថ្ងៃទី ៥ តុលា ២០១៤
សម្តេច​ប៉ាប François និង​ប្រមុខ​សាសនា​កាតូលិក​ ក្នុង​ពិធី​បើក​សម័យ​ប្រជុំ​សភា​សង្ឃ​ ថ្ងៃទី ៥ តុលា ២០១៤ REUTERS/Tony Gentile
ដោយ៖ អៀង សុខម៉ិញ
៣០ នាទី

សម័យ​ប្រជុំ​សភា​សង្ឃ​កាតូលិក​វិសាមញ្ញ​ (​ពី​ថ្ងៃ​ទី ៥ - ១៩ តុលា ២០១៤) ដែល​មាន​សម្តេច​ ប៉ាប ហ្វ្រង់ស័រ ជា​អធិបតី និងមាន​​​​ប្រមុខ​សាសានា​កាតូលិក​សំខាន់ៗ ​តំណាង​ថ្នាក់​ដឹកនាំ​វិហារ​កាតូលិក​ នៅក្នុង​ប្រទេស​ ប្រចាំ​តំបន់​​ប៉ែក​ខាង​កើត​ និង​ ព្រម​ទាំងឥស្សរជន​​​ផ្សេងៗ ចំនួន​២៥៣​នាក់​ចូល​រួម ដើម្បី​ពិភាក្សា​អំពី​បញ្ហា​គ្រួសារ។ អង្គ​សភា​បាន​ចេញ​របាយការណ៍​បញ្ចប់ មាន​ឈ្មោះ​ថា “Relatio synodo” ដែល​អនុម័ត​ដោយ​​សម្តេច​ប៉ាប ប៉ុន្តែ​គ្មាន​ឡើយ​ការ​ព្រមព្រៀង​គ្នា​លើ​​ចំណុច​ទាក់ទង​នឹង​ការ​លែង​លះ​ប្តី​ប្រពន្ធ និង​អាពាហ៍ពិពាហ៍​រវាង​អ្នក​ស្រឡាញ់​ភេទ​ដូច​គ្នា។

ផ្សាយពាណិជ្ជកម្ម

សភា​សង្ឃ​ តែង​ប្រព្រឹត្តទៅ​ជា​រៀង​រាល់​បី​ឆ្នាំ​ម្តង ក្នុង​ប្រធានបទ​ប្លែកៗ​គ្នា ដើម្បី​​ពិចារណា​ មិនមែន​ត្រឹម​តែ​ អំពី​បញ្ហា​លទ្ធិ​សាសនា វិហារ​កាតូលិក​ មនោគមវិជ្ជា​ទេ តែ​ក៏មាន​ការ​តស៊ូ​មតិ​ជុំ​វិញ​​ប្រធាន​បទ​ដែល​គ្មាន​លក្ខណៈ​សាសនា បញ្ហា​សន្តិភាព​ ឬ​សង្គម​ផងដែរ។

 
សម័យ​ប្រជុំ​សភា​លើក​នេះ គឺ​ជា​លើក​ទី​មួយ​សម្រាប់​សម្តេច​ប៉ាប ហ្វ្រង់ស័រ និង​​ជា​សម័យ​ប្រជុំ​​វិសាមញ្ញ ដែល​មាន​កម្មវត្ថុ​ត្រៀម​សម្រាប់​បើក​សម័យ​ប្រជុំ​សភា​ទូទៅ​​នៅ​ខែ​តុលា​ឆ្នាំ​២០១៥។ ប្រធានបទ​សង្គម​ដ៏​រសើប​បំផុត ដែល​ត្រូវ​បាន​លើក​មក​ពិភាក្សា​គ្នា​នា​ឱកាស​នេះ ដោយ​សង្ឃឹម​នឹង​អាច​មាន​ការ​សម្រេច​លទ្ធផល​នៅ​ពេល​ប្រជុំ​ធំ​នោះ​ គឺ​បញ្ហា​គ្រួសារ និង​សីលធម៌​ផ្លូវ​ភេទ។

នៅ​ក្នុង​របាយការណ៍​យប់មិញ សភា​សង្ឃ​កាតូលិក​ បាន​រាយ​​ឈ្មោះ​បញ្ហា​ជា​ច្រើន​ទាក់ទង​នឹង​គ្រួសារ​កាតូលិក នៅ​ក្នុង​ទ្វីប​ទាំង​៥​​នៃ​ភព​ផែនដី ក្នុង​ក្របខ័ណ្ឌ​នៃ​ទស្សនៈ​បើក​ចំហ​របស់​សម្តេច​ប៉ាប​ហ្វ្រង់ស័រ។ ចំណោទ​ជុំ​វិញ ​ការ​ទទួលចូល​ក្នុង​វិហារ​ចំពោះ​​​បុគ្គល​ដែល​រស់​ជា​គូ​ដោយ​គ្មាន​ឆ្លង​កាត់​អាពាហ៍ពិពាហ៍​ ចំពោះ​ក្រុម​អ្នកស្រលាញ់​ភេទ​ដូច​គ្នា និងចំពោះ​បុគ្គល​ដែល​បាន​ឆ្លង​កាត់​ការ​លែងលះ​ប្តីប្រពន្ធ ជា​សំណុំ​រឿង​ដ៏​ស្មុគស្មាញ​ដែល​ក្រុម​សង្ឃ​កាតូលិក​អភិរក្ស​ជ្រុល​និយម​មិន​អាច​ទទួល​យក​បាន​ឡើយ។

 

​របាយការណ៍​ “Ralatio synodo” ​មាន​៦២កថាខណ្ឌ។ កថាខណ្ឌនីមួយៗ អាច​អនុម័ត​បាន​ លុះ​ណា​តែ​មាន​សំឡេង​គាំទ្រ​ដាច់​ខាត ២ភាគ​បី។ តែ​មាន​កថាខណ្ឌ​បី ដែល​ពាក់ព័ន្ធ​នឹង​គ្រួសារ​លែង​លះ​គ្នា រួច​រៀប​ការ​ជា​ថ្មី និង​អ្នក​ស្រឡាញ់​ភេទ​ដូច​គ្នា បាន​ទទួល​សំឡេង​គាំទ្រដាច់​ខាត​​លើស​ពី​៥០%​ដែរ តែ​មិន​គ្រប់​២/៣​ទេ។ គេ​អាច​បក​ស្រាយ​បាន​ថា​ច្បាប់​នេះ គ្មានការ​ព្រមព្រៀង​មែន តែ​មិន​មែន​ជា​ច្រាន​ចោល​ទាំង​ស្រុង​ឡើយ ! ហេតុ​ដូច្នេះ​ កថាខណ្ឌ​មិន​ត្រូវ​បាន​ដក​ចេញ​របាយការណ៍​ចុង​ក្រោយ​ដែល​សម្តេច​ប៉ាប​បាន​អនុម័ត​នៅ​ថ្ងៃ​ម្សិលមិញឡើយ​។

 
ទស្សនៈ​បើក​ទូលាយ

បើយោង​តាម​របាយការណ៍​ស្តីពី​គ្រួសារ វិហារ​កាតូលិក កំពុង​តែ​រៀប​ចំ​ការ​ប្តូរ​ផ្លាស់​​យ៉ាង​សំខាន់​មួយ​ ដោយ​​​​ចង់​​បើក​ទូលាយ លើក​ចំណុច​តឹង​តែង​ខ្លះ។

ពី​មុន​​មក​ បញ្ហា​គ្រួសារ​ប្តីប្រពន្ធ​​រស់​នៅ​ជា​មួយ​គ្នា​ដោយ​គ្មាន​ឆ្លង​កាត់​អាពាហ៍ពិពាហ៍ ​បញ្ហា​អ្នក​ស្រលាញ់​ភេទ​ដូច​គ្នា មាន​កូន​ ឬ​អត់​កូន ការ​ឬ​អត់​ការ ប្តីប្រពន្ធ​លែង​លះ​ រួច​ការ​ជា​ថ្មី ជា​ប្រធានបទ​ដែល​មិន​អាច​ទទួល​យក​បាន​ឡើយ សម្រាប់​វិហារ​កាតូលិក ប៉ុន្តែ​ពេល​នេះ​​មាន​ការ​ប្តូរ​សំនៀង អត្ថបទ​​ដែល​បង្ហាញ​ជា​សាធារណៈ​តាំង​ពី​ថ្ងៃ​ទី ១៣​តុលា និង​ដែល​ទើប​អនុម័ត​នៅ​ល្ងាច​មិញ ​បាន​អំពាវនាវ​ឱ្យ​មាន​ការ​សរសេរ​ច្បាប់​ ក្នុង​ជំពូក​ខ្លះ​ឡើង​វិញ​។

វិហារ​កាតូលិក​មិន​​ប្តូរ​ផ្លាស់​និយម​ន័យ​​​​គ្រួសារទេ។ តម្លៃ​គ្រួសារ​ដែល ជា​គំរូ​​​​ល្អ​ឥត​ខ្ចោះ សម្រាប់​វ៉ាទីកង់ ៖​ ជាការ​​រួម​រស់ជា​គូ​​រវាង​បុរស​ម្នាក់ និងស្រ្តី​ម្នាក់។ ​រៀបការ​មាន​ប្តី​មួយ​ប្រពន្ធមួយ​ បង្កើត​ជា​កូន​ពូន​ជា​ចៅ តាម​បែប​ធម្មជាតិ ! ប៉ុន្តែ​គំរូ​នេះ កំពុង​ត្រូវ​បាន​អង្រួន​ដោយ​​ការវិវឌ្ឍន៍​​របស់​មនុស្ស សង្គម​វប្បធម៌ និង​កាលៈទេសៈ។ ហេតុដូច្នេះ​ហើយបាន​ជា របាយការណ៍​​​ណែនាំ ឱ្យ​​វិហារកាតូលិក​ ជ្រើសរើស​ ការ​ទទួលបុគ្គល​ ដែល​មាន​រូប​ពិត​ ជា​ជាង​មើល​លើ​ចំណុច​ខ្វះ​ខាត​ ចំណុច​មិន​ល្អ​របស់​បុគ្គល ឬ​​​ចាំ​តែ​ស្រែក​ថ្កោល​ទោស។ ​

ចំណុច​បើក​ទូលាយ​មួយ​ទៀត ដែលមាន​ចែង​ក្នុង​​អត្ថបទ​ច្បាប់ ​ គឺ​ទាក់ទង​នឹង​ក្រុម​អ្នក​ស្រលាញ់​ភេទ​ដូចគ្នា។ ​ការ​ភ្ញាក់​ផ្អើលមាន​ខ្លាំង​ របាយការណ៍​ដែល​បាន​សរសេរ​ជា​លក្ខណៈ​ចោទ​សួរ​ អំពាវនាវ​ឱ្យមាន​ការ​​ទទួល​តម្លៃ​របស់​មនុស្ស​ម្នាក់ ដោយមិន​​បែង​ចែក​ថា​បុគ្គលនេះ​​ស្រលាញ់​ភេទ​ដូចគ្នា ឬស្រលាញ់​ភេទ​ផ្ទុយ​គ្នាឡើយ​។ ជាង​នេះ​ទៅ​ទៀត ថ្វីបើ​វិហារ​កាតូលិក​ គ្មាន​ថ្ងៃ​ទទួល​ស្គាល់​អាពាហ៍ពិពាហ៍​រវាង​អ្នក​ស្រលាញ់​ភេទ​ដូចគ្នា និងមិន​លូក​លាន់​ក្នុង​​រឿង​វិបត្តិ​នេះ​​មែន តែ​ចង់​ឃើញ​មានការ​យក​ចិត្ត​ទុក​ដាក់​ជាពិសេស​​ចំពោះ​កូន​​ដែល​អ្នក​ស្រលាញ់​ភេទ​ដូច​គ្នា​ចិញ្ចឹម។

របាយការណ៍​ដែល​ស្ថិត​នៅ​ក្នុង​ដំណាក់​កាល​ពិចារណា​នេះ ក៏ចង់​អនុគ្រោះ​ដល់​គូ​ស្រករ​រៀប​ការ​តាម​ច្បាប់​ស៊ីវិល ឬ​ដោយ​ស្រុះស្រួល​​គ្មាន​ឆ្លង​កាត់​អាពាហ៍ពិពាហ៍​ ឱ្យ​មាន​សិទ្ធិ​ចូល​ប្រារព្ធ​​​​​ពិធី​ផ្សេងៗ​ក្នុង​សាសនា​គ្រិស្ត​បាន។

ប្រធានបទ​ទាំង​អស់​នេះ នៅ​តែ​ជា​សំណុំ​រឿង​ជជែក​គ្នា​នៅឡើយ។ អត្ថបទ​បាន​អនុម័ត​ ហើយ នឹង​ក្លាយ​ជា​មូលដ្ឋាន​នៃការ​ពិភាក្សា​គ្នា​នា​ឱកាស​សម័យ​ប្រជុំ​សភា​ទូទៅ​នៅ​ឆ្នាំ​ក្រោយ។ បន្ទាប់​មក​គឺ​សម្តេច​ប៉ាប ហ្វ្រង់ស័រ ដែល​ល្បី​ខាង​ទាន់​សម័យ ស្និទ្ធ​នឹង​ប្រជាជន​ មាន​និស្ស័យ​បើក​ទូលាយ ជា​អ្នក​សម្រេច​គូសវាស​ផែន​ទី​ចង្អុល​ផ្លូវ​ថ្មី​ស្តី​ពី​គ្រួសារ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ