វៀតណាម-ចិន-ហ្វីលីពីន

វៀតណាម​​​គំរាម​​​ប្តឹង​ចិន​​តាម​​ផ្លូវច្បាប់​​​ ទាក់ទង​​សកម្មភាព​ខួងរកប្រេង​ចិនក្នុង​តំបន់​ជម្លោះ​​

នាយករដ្ឋមន្ត្រី​វៀតណាម ង្វៀន តាន់ជុង ជួប​ប្រធានាធិបតី​ហ្វីលីពីន អាគីណូ នៅ​ក្រុងម៉ានីល ថ្ងៃ​២១ឧសភា ឆ្នាំ២០១៤។
នាយករដ្ឋមន្ត្រី​វៀតណាម ង្វៀន តាន់ជុង ជួប​ប្រធានាធិបតី​ហ្វីលីពីន អាគីណូ នៅ​ក្រុងម៉ានីល ថ្ងៃ​២១ឧសភា ឆ្នាំ២០១៤។ REUTERS/Aaron Favila/Pool

នៅ​ល្ងាច​ថ្ងៃពុធ ម្សិលមិញ នាយក​​រដ្ឋមន្ត្រី​វៀតណាម ង្វៀន​ តាន់ជុង បាន​ផ្ញើ​លិខិត​មួយ​ទៅ​សារព័ត៌មាន​រ៉យតឺ ប្រាប់​ថា ​វៀតណាម​អាច​នឹង​​ដាក់​ពាក្យ​​ប្តឹង​តុលាការ​ ​ប្រឆាំង​ចិន តាម​ផ្លូវច្បាប់​ ដោយសារ​តែ​​ចិន​បាន​ធ្វើ​សកម្មភាព​ខួង​រក​​ប្រេងក្រោម​បាតសមុទ្រ​​ ​ក្នុង​ដែនទឹក​​ជាប់ជម្លោះ​ជាមួយ​​វៀតណាម។ នៅថ្ងៃ​ពុធ​ម្សិលមិញ នាយករដ្ឋមន្ត្រី​វៀតណាម​បាន​បំពេញ​ទស្សនកិច្ច​​នៅ​ហ្វីលីពីន ជួប​ប្រធានាធិបតី​អាគីណូ។​ ​នាយក​រដ្ឋមន្ត្រី​វៀតណាម​​បាន​​ប្រកាស​​ថា ហ្វីលីពីន​និង​វៀតណាម ​ព្រមព្រៀងគ្នា​​ចាត់ទុក​​ សកម្មភាព​ខួងរក​ប្រេង​​ចិន​​ ថា​​ខុសច្បាប់។

ផ្សាយពាណិជ្ជកម្ម

 

វៀតណាម​គម្រាមចិន​​​ថា ​អាចនឹង​ប្តឹង​​តុលាការ​ប្រឆាំង​ចិន​ ទាក់ទង​នឹង​សកម្មភាព​ខួង​រក​ប្រេង​​ចិន នៅបាតសមុទ្រ​ជាប់ជម្លោះ​រវាង​ប្រទេស​ទាំង២ ក្បែរ​ប្រជុំ​កោះ​ប៉ារ៉ាសែល ​នៅ​សមុទ្រ​ចិន​ខាងត្បូង។ ​ក្នុង​លិខិត​​ ​សរសេរ​​ផ្ញើ​​អោយ​សារព័ត៌មាន​រ៉យតឺ ម្សិលមិញ នាយក រដ្ឋមន្ត្រី វៀតណាម ង្វៀន តាន់ជុង បាន​​លើកឡើង​ថា ​វៀតណាម​កំពុង​គិត​ពី​ជម្រើស​​ផ្នែក​ការពារ​​​​​ជាច្រើន​ ពិសេស​គិតពី​​សកម្មភាព​ផ្លូវច្បាប់​​ ​សមស្រប​តាម​ច្បាប់​អន្តរជាតិ។ លោក​ង្វៀន​ តាន់ជុង មិនបានប្រាប់ថា តើ​ជម្រើសផ្នែក​ការពារ​​​ដែល​វៀតណាម​កំពុង​គិត​នោះ​ ​មាន​លក្ខណៈ​​ដូចម្តេច​ទេ។

វៀតណាម​​បញ្ជាក់​ថា សកម្មភាព​ខួងរក​​ប្រេង​របស់​ចិន ធ្វើឡើងក្នុង​តំបន់​សេដ្ឋកិច្ច​ផ្តាច់មុខ​​​របស់​វៀតណាម។ ចិនបាន​តប​វិញថា សកម្មភាព​បូមប្រេង​នេះស្ថិត​ក្នុង​ដែនទឹក​ជា​​កម្មសិទ្ធិ​របស់​ចិន។ គួររំលឹក​ថា សកម្មភាព​ខួងបូមប្រេង​ចិន​នេះ បានបង្ក​អោយ​មាន​បាតុកម្ម​ហិង្សា​ប្រឆាំង​ចិន នៅ​វៀតណាម ធ្វើអោយ​ជនជាតិ​ចិន​៤នាក់ស្លាប់ និង​​មនុស្ស​ជាង​១រយនាក់​រងរបួស។ ចិន​បាន​ជម្លៀស​ប្រជាជន​ខ្លួន​រាប់ពាន់​នាក់ចេញ​ពីវៀតណាម និង​ប្រកាស​ព្យួរ​ផែនការ​​ពាណិជ្ជកម្ម​ទ្វេភាគី​មួយចំនួន ​ជាមួយវៀតណាម។

ម្សិលមិញ​ នាយករដ្ឋមន្ត្រី​វៀតណាម​បាន​ចុះ​ទៅ​ហ្វីលីពីន ជួបប្រធានាធិបតី​បេនីញ៉ូ អាគីណូ និង​បានចេញមុខ​ប្រកាស​ថា វៀតណាម​និង​ហ្វីលីពីន​ចាត់ទុក​សកម្មភាពខួង​បូមប្រេង​របស់​ចិន ថា​ជា​ទង្វើ​ខុសច្បាប់ ក្នុង​ចំណោម​សកម្មភាព​ដទៃ​ទៀត​របស់​ចិន ក្នុង​តំបន់​ជម្លោះ នៅ​សមុទ្រ​ចិន។ ដោយសារ​វៀតណាម​និង​ហ្វីលីពីន​មាន​ជម្លោះ​បូរណភាព​ដែនទឹក​ជាមួយ​ចិនដូចគ្នា ​​ទំនាក់ទំនង​រវាង​​វៀតណាម​និង​ហ្វីលីពីន​​បាន​ឈាន​ទៅ​រក​ភាព​​ជិតដិត​នឹងគ្នា។ លោក​តាន់ជុង និង​លោក​អាគីណូ​ ​ប្រាប់ថា ប្រទេស​ទាំងពីរ​ចាប់ផ្តើម​​ធ្វើការ​​​​ជាមួយ​គ្នា ដើម្បីរៀបចំ​ឡើង​នូវ​កិច្ចសហប្រតិបត្តិការ​​យុទ្ធសាស្ត្រ​មួយ។

​កាលពី​​ខែ​មិនា ​ហ្វីលីពីនធ្លាប់​បាន​​​ប្តឹងផ្តល់​ចិន​តាម​ផ្លូវច្បាប់​រួចហើយ​​ ទាក់ទង​នឹង​ជម្លោះ​បូរណភាព​ នៅ​​សមុទ្រ​ចិន​។ ហ្វីលីពីន​បានដាក់ពាក្យប្តឹង​ទៅ​តុលាការ​អាជ្ញាកណ្តាល​​នៃ​អង្គការ​សហប្រជាជាតិ​​នៅ​ក្រុង​ឡាអេ។ ​ហ្វីលីពីន​សុំអោយ​តុលាការ​នេះ​គូសបញ្ជាក់​ថា ពី​​​សិទ្ធិ​​​​ទាញយកប្រយោជន៍​ ក្នុង​តំបន់​សេដ្ឋកិច្ច​​ផ្តាច់មុខ​របស់​ហ្វីលីពីន​​ នៅ​សមុទ្រ​ចិន​ខាងត្បូង។ ក្រុងប៉េកាំង​ដែល​​ទាមទារ​បូរណភាពដែនទឹក​រហូត​៩០ភាគរយ​ នៅ​សមុទ្រ​ចិន​នេះ បាន​បដិសេធ​មិន​ចូលខ្លួន​ក្នុង​រឿង​ប្តឹងផ្តល់​របស់​ហ្វីលីពីន។ ​ក្រុងប៉េកាំង​​​​ព្រមាន​​​ថា ​បណ្តឹង​របស់​ក្រុង​ម៉ានីល​នេះ នឹង​ប៉ះពាល់​ដល់​ទំនាក់ទំនង​​​រវាង​ប្រទេស​ទាំង២៕  ​
 

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI