វៀតណាម

វៀតណាម៖ អតីត​រដ្ឋមន្ត្រី​​ក្រសួង​ព័ត៌មាន ត្រូវ​តុលាការ​កាត់​ទោស​ដាក់​ពន្ធនាគារ​អស់​មួយ​ជីវិត ពីរឿង​សូកប៉ាន់​

លោក Nguyễn Bắc Son អតីតរដ្ឋមន្ត្រីក្រសួងព័ត៌មានវៀតណាម ចន្លោះ​ឆ្នាំ​២០១១ ដល់​២០១៦ ។
លោក Nguyễn Bắc Son អតីតរដ្ឋមន្ត្រីក្រសួងព័ត៌មានវៀតណាម ចន្លោះ​ឆ្នាំ​២០១១ ដល់​២០១៦ ។ សហការី

អតីត​រដ្ឋមន្ត្រី​ក្រសួង​ព័ត៌មាន​វៀតណាម ថ្ងៃទី​២៨ធ្នូ​ត្រូវតុលាការ​ក្រុង​ហាណូយ កាត់ទោស​ដាក់​ពន្ធនាគារ​អស់​មួយ ជីវិត​ពី​បទ​ល្មើស​ពុករលួយ​សូកប៉ាន់។ បទល្មើស​នេះ កើត​ចេញពីការណ៍​​​ដែល​​អតីត​រដ្ឋមន្ត្រី​បាន​អនុញ្ញាត​ផ្តល់​ភ្លើង​ខៀវ​ឱ្យ​ក្រុម​ហ៊ុន​ទូរគមនាគមន៍​រដ្ឋ​ទិញ​ក្រុម​ហ៊ុនសោតទស្សន៍​ឯកជន និង​ដែល​បង្ក​ការ​ខាត​បង់​ប្រាក់​រដ្ឋ​ ប្រមាណ​៣០០លាន​ដុល្លារ។ ជុំវិញរឿងនេះ ក៏​មាន​មនុស្ស​ជំនិតមួយ​ចំនួនរបស់​លោករដ្ឋមន្ត្រី​​ ​និងមន្ត្រី​រដ្ឋការ​ជាង​១០នាក់​ផ្សេងទៀត​ ក៏ត្រូវ​តុលាការ​វៀតណាម​កាត់​ទោស​ដាក់​ពន្ធនាការផងដែរ។​​

ផ្សាយពាណិជ្ជកម្ម

អតីតរដ្ឋមន្ត្រីក្រសួងព័ត៌មានវៀតណាម ចន្លោះ​ឆ្នាំ​២០១១ ដល់​២០១៦ លោក ង្វៀន បាក សង (Nguyễn Bắc Son) ក៏​ជា​​សមាជិកសំខាន់​និងដ៏​មាន​ឥទ្ធិពល​មួយ​រូប​ ក្នុង​គណៈកម្មការ​កណ្តាល​របស់មជ្ឈិមបក្ស​កុម្មុយនិស្ត​វៀតណាម។ លោកអតីតរដ្ឋមន្ត្រីក្រសួងព័ត៌មាន​ ត្រូវ​សមត្ថកិច្ចចាប់​ឃុំ​ខ្លួន​កាលពី​ខែ​កុម្ភៈ​ឆ្នាំទៅមិញ​​ ហើយត្រូវ​អយ្យការ​រដ្ឋ​អាជ្ញា​វៀតណាម ស្នើ​សុំ​តុលាការ​ផ្តន្ទាទោស​ប្រហារ​ជីវិតតែម្តង។​ ក៏ប៉ុន្តែ ក្រោយ​ការ​ចរចា​គ្នានិងការ​​សម្រុះ​សម្រួល​ផ្តល់​សំណង​​ជូន​រដ្ឋ​វិញ ក្នុង​រង្វង់​ទឹក​ប្រាក់​រាប់​លាន​ដុល្លារ​រួច​មក​​ នៅទីបំផុត សាលា​ជម្រះក្តី​ក្រុង​ហាណូយ ក៏​បានសម្រេច​​ផ្តន្ទា​​ទោស​ឧក្រិដ្ឋ​ ត្រឹម​ជាប់​ពន្ធនាគារ​អស់​មួយ​ជីវិត​​ នៅថ្ងៃ​ទី​២៨ធ្នូ​នេះ​។

ជុំវិញ​​សំណុំ​រឿង​ពុករលួយ​សូកប៉ាន់នេះ បើ​តាម​ការ​ផ្សាយ​ពី​កាសែត​ក្នុង​ស្រុក​វៀតណាម​ គឺ​ក្នុងពេល​កាន់​អំណាចជារដ្ឋមន្ត្រី ​លោក​បាន​ឃុបឃិត​ទទួល«​ប្រាក់​ទឹកតែ»​ពីសេដ្ឋី​​ម្ចាស់​​ក្រុម​ហ៊ុន​ឯកជន​មួយខាង​ប្រព័ន្ធផ្សព្វផ្សាយ ដើម្បី​អនុញ្ញាត​ឱ្យ​ក្រុម​ហ៊ុន​រដ្ឋ MobiFone ទិញ​ក្រុម​ហ៊ុន​ឯកជន​ Audio Visual Global -AVG។ រឿងនេះ ធ្វើ​ឱ្យ​រដ្ឋខាត​បង់​ប្រាក់​ ​ប្រមាណ​ជា​៣០០លា​នដុល្លារ​។

សំណុំ​រឿងពុករលួយ​សូកប៉ាន់​នេះ ក៏​មាន​ជាប់​ពាក់ព័ន្ធ​នឹង​មនុស្ស​ជំនិត​និង​មន្ត្រីរដ្ឋការ ដូច​សម្ល​កំពីស។ អនុប្រធាន​របស់​លោកអតីត​រដ្ឋមន្ត្រីព័ត៌មាន​ គឺលោក ជើង មិញ ទុង (Trương Minh Tuấn)​ ជារដ្ឋមន្ត្រីកាន់​តំណែង​បន្តពី​លោកអតីត​រដ្ឋមន្រ្តី និង​ជាមនុស្ស​ខ្លឹម​នៅក្នុង​បក្សបក្ស​កុម្មុយនិស្ត​វៀតណាមដែរ ក៏ត្រូវ​តុលាការ​កាត់ទោស​ដេក​ពន្ធនាគារ​១៤ឆ្នាំ​។ មន្ត្រីរដ្ឋ​​ប្រមាណ​ជាង​១០នាក់ទៀត​ ត្រូវ​រងទោស​ ចាប់ពី​២ឆ្នាំរហូត​ដល់​២៣ឆ្នាំ នៅក្រោយ​ចម្រឹងដែក​។ ​

ចំពោះ​អ្នក​សង្កេតការណ៍​នៅវៀតណាម អតីតរដ្ឋមន្ត្រីក្រសួងព័ត៌មានវៀតណាមនេះ គឺ​គ្រាន់តែ​ជាមនុស្ស​កណ្តាល​មួយ​តែប៉ុណ្ណោះ សំណុំ​រឿងសូកប៉ាន់​នេះ គឺនៅមាន​មនុស្ស​ធំៗ​មាន​អំណាច​គ្រាក់ៗ​នៅ​ពីក្រោយ​លោក​ច្រើន​ទៀត។​

ទោះយ៉ាងណាក៏ដោយ ការ​កាត់ទោស​នេះ គឺ​ត្រូវ​គេ​មើលឃើញថា ស្ថិតនៅក្រោម​យុទ្ធនាការ​បោសសម្អាត​អំពើ​ពុករលួយ​របស់​រដ្ឋាភិបាល​វៀតណាម ដែល​បានដាក់​ចេញ​វិធានការ​ នៅ​ឆ្នាំ​២០១៦ ទន្ទឹម​នឹង​ការ​មកដល់​នៃ​ក្បាលម៉ាស៊ីន​នីតិប្រតិបត្តិ​ថ្មី។ 

បើ​តាម​អង្គការ​តម្លាភាព​អន្តរជាតិ វៀតណាម​ជា​ប្រទេស​ពុក​រលួយ​នៅ​អាស៊ី​អាស៊ី​អគ្នេយ៍ ដែល​ជាប់​លំដាប់​លេខ ១១៧ ក្នុង​ចំណោម​១៨០ប្រទេស៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI