វៀតណាម

ពលរដ្ឋ​វៀតណាម​បោះឆ្នោត​រើស​តំណាងរាស្រ្ត​ថ្មី​ចេញពី​គណបក្ស​កុម្មុយនិស្ត​តែមួយ

លោក​ង្វៀន ភូ ទ្រុង អគ្គលេខាធិការ​បក្ស​កុម្មុយនិស្ត​វៀតណាម​ បោះឆ្នោត​ថ្ងៃ​អាទិត្យ ២២ ឧសភា ២០១១
លោក​ង្វៀន ភូ ទ្រុង អគ្គលេខាធិការ​បក្ស​កុម្មុយនិស្ត​វៀតណាម​ បោះឆ្នោត​ថ្ងៃ​អាទិត្យ ២២ ឧសភា ២០១១ ©Reuters

នៅថ្ងៃ​អាទិត្យ​នេះ ពលរដ្ឋ​វៀតណាម​ជាង ៦០​លាន​នាក់ ត្រូវ​ចេញ​ទៅ​បោះឆ្នោត​ជ្រើសរើស​សមាជិក​សភា សម្រាប់​អាណត្តិ​ថ្មី។ អាជ្ញាធរ​វៀតណាម​បាន​ហៅ​ការបោះឆ្នោត​នេះ​ថា ជា​ព្រឹត្តិការណ៍​នយោបាយ​ដ៏​អស្ចារ្យមួយ ក៏ប៉ុន្តែ ពលរដ្ឋ​វៀតណាម​​ហាក់​ដូចជា​គ្មាន​ជម្រើស​​អ្វី​ប៉ុន្មាន​ទេ ពីព្រោះ​បេក្ខជន​ដែល​ឈរឈ្មោះ​​ក្នុង​ការ​បោះឆ្នោតនេះ ​ចេញ​ពី​គណបក្ស​តែមួយ​គត់ គឺ​គណបក្ស​កុម្មុយនិស្ត​វៀតណាម។

ផ្សាយពាណិជ្ជកម្ម

រដ្ឋសភា​វៀតណាម​មាន​សមាជិក​​សរុប ចំនួន ៥០០​រូប ដែល​ពលរដ្ឋ​វៀតណាម​ត្រូវបោះឆ្នោត​ជ្រើសរើស សម្រាប់​អាណត្តិ​ថ្មី នៅថ្ងៃ​អាទិត្យ​នេះ។ បេក្ខជន​ឈរឈ្មោះ​​ជា​តំណាងរាស្រ្ត ក្នុង​ការ​បោះឆ្នោត​ថ្ងៃ​នេះ មាន​ចំនួន ៨២៧​រូប។

​ថ្វីដ្បិត​តែ​ មេដឹកនាំ​​វៀតណាម​តែងតែ​​បដិសេធ​មិន​​លុបចោល​ប្រព័ន្ធដឹកនាំ​បែប​ឯកបក្ស ក៏ប៉ុន្តែ បាន​អនុញ្ញាត​ឲ្យ​មាន​សមាជិក​សភា​ចំនួន ១០% ជា​​អ្នក​មក​ពី​ក្រៅ​គណបក្ស​កុម្មុយនិស្ត។ ទោះជា​យ៉ាងណា ដើម្បី​បាន​ឈរឈ្មោះ បេក្ខជន​​ដែល​មិនមែន​ជា​​សមាជិក​គណបក្ស​កុម្មុយនិស្ត​ចាំបាច់​ត្រូវ​ឆ្លងកាត់​ការ​ត្រួតពិនិត្យ​យ៉ាងម៉ត់ចត់​​ពី​សំណាក់​​គណបក្ស​កុម្មុយនិស្ត។

ការិយាល័យ​បោះឆ្នោត​​បាន​ចាប់​ផ្តើម​បើកទ្វារ កាល​ពី​ម៉ោង ៧ព្រឹក ម៉ោង​នៅ​ក្នុង​ប្រទេស​វៀតណាម។ យោងតាម​ទីភ្នាក់ងារ​សារព័ត៌មាន​បារាំង (AFP) គ្រាន់តែ​ការិយាល័យ​បោះឆ្នោត​បើក​ទ្វារភ្លាម ពលរដ្ឋ​វៀតណាម​ក៏​បាន​ចាប់ផ្តើម​នាំ​គ្នា​ចូល​ទៅ​បោះឆ្នោត​ភ្លាមៗ​ដែរ។ ក៏ប៉ុន្តែ ក្នុង​ចំណោម​អ្នក​បោះឆ្នោត​ទាំងនោះ មាន​អ្នក​ខ្លះ​និយាយ​ថា គេ​ចេញ​មក​បោះឆ្នោត គឺ​ដោយសារ​តែ​ជា​កាតព្វកិច្ច​តម្រូវ​ប៉ុណ្ណោះ។

លទ្ធផលបោះឆ្នោត​អាច​នឹង​ត្រូវ​គេ​ប្រកាស​ឲ្យ​ដឹង​នៅ​ក្នុង​រយៈពេល ៧ ឬ​១០​ថ្ងៃ​ខាងមុខ។ សមាជិក​សភា​ថ្មី ដែល​មាន​អាណត្តិ ៥ឆ្នាំ គ្រោង​នឹង​បើក​កិច្ចប្រជុំ​ជា​លើក​ដំបូង នៅថ្ងៃ​ទី២១ កក្កដា ខាងមុខ ដើម្បី​បោះឆ្នោត​ផ្តល់​សេចក្តី​ទុកចិត្ត​លើ​រដ្ឋាភិបាល។​

ទោះជាយ៉ាងណា ការបោះឆ្នោតនេះ​គ្រាន់តែ​ជា​នីតិវិធី​ ដើម្បី​បង្រ្គប់​កិច្ច​ប៉ុណ្ណោះ។ អ្វីៗ​ត្រូវ​បាន​​បក្ស​កំណត់​រួចជា​ស្រេច​ទៅហើយ។ នៅ​វៀតណាម អំណាច​ពិត​ប្រាកដ គឺ​ស្ថិត​ក្នុង​ដៃ​គណៈអចិន្រ្តៃយ៍ និង​គណៈកម្មាធិការ​មជ្ឈិម​បក្ស​ ដែល​មាន​សមាជិក ២០០​​នាក់ កើតចេញ​ពី​​​សមាជ​បក្ស​​ កាល​ពី​ខែ​មករា កន្លងទៅ​ថ្មីៗ​នេះ។ គណៈអចិន្រ្តៃយ៍​បក្ស​បាន​កំណត់​ជ្រើសរើស​មេដឹកនាំ​ធំៗ​រួចជា​ស្រេច​ទៅហើយ។ គេរំពឹង​ថា លោក​ង្វៀន ថាន់ ស៊ុង នឹង​នៅ​បន្ត​កាន់​តំណែង​ជា​នាយករដ្ឋមន្រ្តី​តទៅទៀត។ គូ​ប្រជែង​របស់​លោក​ង្វៀន ថាន់ ស៊ុង គឺ​លោក​ ទ្រឿង ថាន់ សាង ទំនង​ជា​នឹង​ត្រូវ​ទទួល​តំណែង​ជា​ប្រធានាធិបតី៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI