ក្រុមអ្នកភូមិបឹងកក់ ប្តឹងអាជ្ញាធរខណ្ឌដូនពេញ
ចុះផ្សាយនៅថ្ងៃ៖ កែប្រែថ្ងៃទី៖
ក្រុមអ្នកភូមិបឹងកក់រងរបួស ១០នាក់ រួមទាំងជនបរទេសម្នាក់ ដែលជាសកម្មជនអ្នកឃ្លាំមើលសិទ្ធិមនុស្ស បានដាក់ពាក្យបណ្តឹង ទៅកាន់តុលាការក្រុងភ្នំពេញ នៅព្រឹកថ្ងៃទី១១តុលានេះ។ ជាពាក្យបណ្តឹង ដែលប្តឹងចោទប្រកាន់អភិបាលរងខណ្ឌដូនពេញ លោក សុខ ពេញវុធ លោកស្រី ពេជ្រ សុជាតា និងលោក សៅ ណុល អធិការខណ្ឌដូនពេញ ពីបទប៉ុនប៉ងមនុស្សឃាត និងបង្ករបួសស្នាម។ ក្រុមអ្នកភូមិបឹងកក់ ១០នាក់ និងជនបរទេសម្នាក់ ជាដើមបណ្តឹង បានរងរបួសធ្ងន់ធ្ងរ ក្នុងហេតុការណ៍អាជ្ញាធរ ខណ្ឌដូនពេញ ប្រើអំពើហិង្សា វាយនឹងដំបង និងបាញ់ជំពាម គ្រាប់ខ្លី បំបែកការជួបជុំរបស់អ្នកភូមិបឹងកក់ នៅវត្តភ្នំ កាលពីយប់ថ្ងៃទី២២ ខែកញ្ញា ឆ្នាំ២០១៣។
តាមពាក្យបណ្តឹង អភិបាលរងខណ្ឌ និងអធិការនគរបាលខណ្ឌដូនពេញ ទាំង ៣ រូបនោះ ជាអ្នកដឹកនាំ បញ្ជា និងចូលដោយផ្ទាល់ ក្នុងសកម្មភាពវាយបំបែកការជួបជុំ ធ្វើកូដកម្ម បង្អត់អាហារ របស់ក្រុមអ្នកភូមិបឹងកក់ ដែលមានជម្លោះដីធ្លី កាលពីយប់ថ្ងៃទី២២កញ្ញា នៅវត្តភ្នំ។
ក្នុងពាក្យបណ្តឹង ដែលបានដាក់ទៅកាន់តុលាការ នៅព្រឹកថ្ងៃសុក្រ ទី១១តុលានេះ អ្នកភូមិបឹងកក់ ១០ នាក់ និងជនបរទេសម្នាក់ ដែលរងរបួស ក្នុងអំពើហិង្សា វាយបង្ក្រាបពីសំណាក់អាជ្ញាធរ បានប្តឹង ចោទប្រកាន់មន្ត្រីអាជ្ញាធរទាំង ៣ នាក់នោះ ពីបទប៉ុនប៉ង់មនុស្សឃាត និងបង្ករបួសស្នាម ដោយចេតនា។
អ្នកស្រី សុង ស្រីលាភ អ្នកភូមិបឹងកក់ និងជាសាក្សី នៅក្នុងសំណុំរឿងក្តីនេះ បានឲ្យដឹងថា នៅយប់ថ្ងៃទី២២កញ្ញា ក្រោមការដឹកនាំបញ្ជាពីលោក សុខ ពេញវុធ អ្នកស្រី ពេជ្រ សុជាតា និងលោកអធិការ សៅ ណុល នៅយប់នោះ ក្រុមអាជ្ញាធរខណ្ឌដូនពេញ បានបាញ់ជំពាមកៅស៊ូ គ្រាប់ឃ្លី និងវាយដោយដំបងយ៉ាងព្រៃផ្សៃ មកលើក្រុមអ្នកភូមិបឹងកក់។ ហេតុការណ៍នោះ បានធ្វើឲ្យអ្នកភូមិ ៦ នាក់ រងរបួសធ្ងន់ ដោយត្រូវគេបាញ់ជំពាមកៅស៊ូត្រូវមុខ ចង្ការ ចុងដង្ហើម និងវាយដោយដំបងជាដើម។
មិនទាន់មានការបំភ្លឺបែបណា ពីអភិបាលរង និងអធិការខណ្ឌដូនពេញ ជុំវិញពាក្យបណ្តឹង របស់អ្នកភូមិបឹងកក់ខាងលើនៅឡើយទេ។
ប៉ុន្តែលោក ឡុង ឌីម៉ង់ អ្នកនាំពាក្យសាលារាជធានីភ្នំពេញ បានឲ្យដឹងថា ការប្តឹងផ្តល់ទៅតុលាការ ជាសិទ្ធិរបស់អ្នកភូមិ ហើយបើសិនជាមានដីកាកោះហៅពីតុលាការ អាជ្ញាធរបានត្រៀមខ្លួន ដើម្បីចូលបំភ្លឺ។ សកម្មភាពកន្លងមករបស់អាជ្ញាធរ ត្រូវបានលោក ឡុង ឌីម៉ង់ បញ្ជាក់ថា គ្រាន់តែជាការរៀបចំសណ្តាប់ធ្នាប់សាធារណៈ និងជាការអនុវត្តតាមច្បាប់ ដោយអាជ្ញាធរ មិនអាចឲ្យមានក្រុមអាណាធិបតេយ្យ ដើរតាមផ្លូវ និងទីសាធារណៈបាននោះទេ។
ជាការកត់សម្គាល់ កន្លងមក អ្នកភូមិបឹងកក់ បានដាក់ពាក្យបណ្តឹងជាច្រើន ទៅតុលាការ ប្តឹងអាជ្ញាធរ ពាក់ព័ន្ធនឹងការវាយបង្ក្រាបដោយហិង្សាជាដើម។ ប៉ុន្តែបណ្តឹងទាំងនោះ មិនត្រូវបានតុលាការ ចាត់ការឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ