ព្រឹត្តិការណ៍អន្តរជាតិប្រចាំថ្ងៃ

អាមេរិក និង​កូរ៉េខាងត្បូង​ពង្រឹង​ផែនការ​វាយបក​នឹង​ការ​គំរាមកំហែង​នុយក្លេអ៊ែរ​កូរ៉េខាងជើង

សំឡេង ០៤:៥៩
លោក​រដ្ឋមន្រ្តី​ការពារជាតិ​អាមេរិក Chuck Hagel និង​លោក​រដ្ឋមន្រ្តី​ការពារជាតិ​កូរ៉េខាងត្បូង Kim Kwan-jin
លោក​រដ្ឋមន្រ្តី​ការពារជាតិ​អាមេរិក Chuck Hagel និង​លោក​រដ្ឋមន្រ្តី​ការពារជាតិ​កូរ៉េខាងត្បូង Kim Kwan-jin

នៅ​ថ្ងៃ​ពុធ ទី២ តុលា​នេះ សហរដ្ឋអាមេរិក និង​កូរ៉េខាងត្បូង​បាន​អនុម័ត​លើ​ផែនការ​មួយ​សម្រាប់​វាយបក​ទប់ទល់​នឹង​ការ​គំរាមកំហែង​នុយក្លេអ៊ែរ​របស់​កូរ៉េខាងជើង។ កិច្ចព្រមព្រៀង​នេះ​ត្រូវ​បាន​ធ្វើ​ឡើង​ក្នុង​ឱកាស​ដំណើរ​ទស្សនកិច្ច​របស់​លោក​រដ្ឋមន្រ្តី​ការពារជាតិ​អាមេរិក Chuck Hagel ក្នុង​ទីក្រុង​សេអ៊ូល។ ទន្ទឹម​គ្នា​នេះ អាមេរិក និង​កូរ៉េខាងត្បូង​ក៏​បាន​ឯកភាព​ក្នុង​ការ​បន្ត​ជជែក​គ្នា​ជុំវិញ​ការ​ផ្ទេរ ឬ​ពន្យារពេល​នូវ​បញ្ជាការ​កម្លំាងទ័ព​កូរ៉េខាងត្បូង​ទៅ​ឲ្យ​ទាហាន​កូរ៉េខាងត្បូង​ក្នុង​ករណី​មាន​ផ្ទុះ​សង្រ្គាម។

ផ្សាយពាណិជ្ជកម្ម

 

សូម​ជម្រាប​ជូន​ថា ផែនការ​មួយ​នេះ​ត្រូវ​បាន​អនុម័ត​នៅ​ថ្ងៃ​ចុង​ក្រោយ​នៃ​ដំណើរ​ទស្សនកិច្ច​របស់​លោក​រដ្ឋមន្រ្តី​ការពារជាតិ​អាមេរិក Chuck Hagel ក្នុង​ទីក្រុង​សេអ៊ូល មុន​នឹង​លោក​បន្ត​ដំណើរ​ទៅ​កាន់​ទីក្រុង​តូក្យូ ប្រទេស​ជប៉ុន។ នៅ​ក្នុង​ទឹកដី​កូរ៉េខាងត្បូង លោក Chuck Hagel បាន​បញ្ជាក់​ជា​ថ្មី​ម្តង​ទៀត អំពី​ជំហរ​របស់​ទីក្រុង​វាស៊ីនតោន​ក្នុង​ការ​បន្ត​ជួយ​រក្សា​សន្តិសុខ​សម្ព័ន្ធមិត្ត​សេអ៊ូល​នៅ​ចំពោះ​មុខ​ការ​គំរាមកំហែង​នុយក្លេអ៊ែរ​របស់​កូរ៉េខាងជើង។

គឺ​ដើម្បី​ប្រឈម​ទប់​នឹង​ការ​គំរាមកំហែង​នុយក្លេអ៊ែរ​ពី​សំណាក់​កូរ៉េខាងជើង​ដែល​អាមេរិក និង​កូរ៉េខាងត្បូង​បាន​ពង្រឹង​កិច្ចសហប្រតិបត្តិការ​រវាង​គ្នា​បន្ថែម​ទៀត តាម​រយៈ​កិច្ចព្រមព្រៀង​លើ​ផែនការ​មួយ​ដែល​គេ​ឲ្យ​ឈ្មោះ​ថា ផែនការ​វាយបក។ នៅ​ក្នុង​សេចក្តីជូន​ដំណឹង​រួម​គ្នា​មួយ ភាគី​ទំាង​ពីរ​មិន​បាន​លំអិត​ឲ្យ​បាន​ច្បាស់​អំពី​វិធានការ​ដែល​មាន​ចែង​នៅ​ក្នុង​ផែនការ​នោះ​ទេ តែ​បាន​បញ្ជាក់​ថា ផែនការ​នោះ​ត្រូវ​បាន​​ធ្វើ​ឡើង នៅ​ក្នុង​ក្របខ័ណ្ឌ​យុទ្ធសាស្រ្ត​នៃ​សម្ព័ន្ធមិត្ត​ទំាង​ពីរ​ដើម្បី​ប្រឈម​ទប់​នឹង​សេណារីយ៉ូ​គំរាមកំហែង​តាម​គ្រប់​រូបភាព​ពី​សំណាក់​កូរ៉េខាងជើង​ទំាង​នៅ​ក្នុង​ពេល​សន្តិភាព ក៏​ដូច​ជា​ពេល​ផ្ទុះ​សង្រ្គាម។

ថ្លែង​នៅ​ក្នុង​សន្និសីត​កាសែត​ជាមួយ​សមភាគី​កូរ៉េខាងត្បូង លោក Kim Kwan-jin នៅ​ព្រឹកមិញ លោក Chuck Hagel បាន​បញ្ជាក់​ថា ផែនការ​វាយបក​ដែល​ទើប​បាន​ឯកភាព​គ្នា មិនមែន​ទាក់ទង​តែ​នឹង​ការ​គំរាមកំហែង​នុយក្លេអ៊ែរ​របស់​កូរ៉េខាងជើង​មួយ​គត់​ទេ តែ​ក៏​មាន​ទាក់ទង​នឹង​ការ​គំរាម​ដោយ​ប្រើ​អាវុធប្រល័យលោក​គ្រប់ប្រភេទ ព្រម​ទំាង​អាវុធគីមី​របស់​កូរ៉េខាងជើង​ផងដែរ។ អាវុធគីមី​ដែល​កូរ៉េខាងជើង​មាន​ប្រមាណ​ជា ៥ ០០០តោន ពោល​គឺ​មាន​ច្រើន​ជាង​ប្រទេស​ស៊ីរី​ដល់​ទៅ ៥ដង នេះ​បើ​តាម​ការ​អះអាង​របស់​អ្នកទទួលខុសត្រូវ​ម្នាក់​នៃ​ក្រសួង​ការពារជាតិ​កូរ៉េខាងត្បូង។ ត្រង់​ចំណុច​នេះ លោក​ប្រមុខ​ការពារជាតិ​អាមេរិក​បាន​ព្រមាន​រួច​ជា​ស្រេច​ថា ការ​ប្រើ​អាវុធគីមី​ពី​សំណាក់​កូរ៉េខាងជើង គឺ​ជា​រឿង​មួយ​ដែល​មិន​អាច​អត់ឱន​​ឲ្យ​បាន​ទេ ទោះ​បី​ជា​នៅ​ក្រោម​រូបភាព និង​កាលៈទេសៈ​ណា​ក៏​ដោយ។

អាមេរិក​បន្ត​រក្សា​ចំនួន​ទ័ព​របស់​ខ្លួន​ចំនួន ២៨ ៥០០នាក់​នៅ​កូរ៉េខាងត្បូង

បច្ចុប្បន្ន​នេះ មាន​ទាហាន​អាមេរិកំាង​ចំនួន ២៨ ៥០០នាក់​ដែល​កំពុង​ឈរ​ជើង​ក្នុង​ទឹកដី​កូរ៉េខាងត្បូង។ លោក​ប្រមុខ​ការពារជាតិ​អាមេរិក Chuck Hagel បាន​បញ្ជាក់​ថា អាមេរិក​នឹង​បន្ត​រក្សា​ចំនួន​នេះ​នៅ​ដដែល ដោយ​មិន​បង្កើន​បន្ថែម ហើយ​ក៏​មិន​បន្ថយ​ដែរ។ ជាមួយ​គ្នា​នេះ លោក Chuck Hagel k ក៏​បាន​រម្លឹក​ជា​ថ្មី​ថា អាមេរិក​នឹង​បន្ត​ជួយ​ការពារ​កូរ៉េខាងត្បូង​តាម​គ្រប់​មធ្យោបាយ​ទំាង​អស់ មាន​ទំាង​ការ​ប្រើ​អាវុធ​នុយក្លេអ៊ែរ​ទៀត​ផង បើ​ចំា​បាច់។ ក្រៅ​ពី​វត្តមាន​ទាហាន​អាមេរិកំាង​ចំនួន ២៨ ៥០០នាក់ កូរ៉េខាងត្បូង​ក៏​មាន​ទាហាន​របស់​ខ្លួន​ចំនួន ៦៤០ ០០០នាក់​ដែរ។

តំាង​ពី​ក្រោយ​សង្រ្គាម​កូរ៉េ​បាន​បិទបញ្ចប់​ក្នុង​ឆ្នំា ១៩៥៣ អាមេរិក​ជា​អ្នកកាន់​បញ្ជាការ​ទ័ពអាមេរិក និង​ទ័ពកូរ៉េខាងត្បូង​ទំាង​នៅ​ក្នុង​ពេល​គ្មាន​សង្រ្គាម ក៏​ដូច​ជា​ពេល​ផ្ទុះសង្រ្គាម។ តែ​ចាប់​តំាង​ពី​ឆ្នំា ១៩៩៤ មក និង​ក្នុង​ពេល​គ្មាន​ផ្ទុះសង្រ្គាម ពោល​គឺ​ដូច​សព្វថ្ងៃ តួនាទី​បញ្ជាការ​ទ័ពកូរ៉េខាងត្បូង គឺ​ជា​ភារៈកិច្ច​របស់​រដ្ឋអំណាច​កូរ៉េខាងត្បូង។ តែ​នៅ​ក្នុង​ករណី​ណា​ដែល​មាន​ផ្ទុះសង្រ្គាម អាមេរិក​ជា​អ្នកកាន់​បញ្ជាការ ទំាង​ទ័ព​អាមេរិក និង​ទ័ព​កូរ៉េខាងត្បូង។ តាម​កិច្ចព្រមព្រៀង​រវាង​ទីក្រុង​វ៉ាស៊ីនតោន និង​សេអ៊ូល តួនាទី​បញ្ជាការ​ទ័ពកូរ៉េខាងត្បូង​នៅ​ពេល​ផ្ទុះសង្រ្គាម​នឹង​ត្រូវ​ផ្ទេរ​ទៅ​ឲ្យ​រដ្ឋអំណាច​ក្រុង​សេអ៊ូល​វិញ​នៅ​ឆ្នំា ២០១៥ ខាង​មុខ។ តែ​ពេល​នេះ របប​ក្រុង​សេអ៊ូល​បាន​ស្នើ​ឲ្យ​អាមេរិក​ពន្យារ​ពេល​បន្ថែម​ទៀត។

គួរ​បញ្ចាក់​ជូន​ថា កូរ៉េខាងត្បូង​ធ្លាប់​បាន​សុំ​ពន្យារពេល​ម្តង​ហើយ​កាល​ពី​ឆ្នំា ២០១០ បន្ទាប់​ពី​នាវាមុជទឹក​របស់​ខ្លួន​បាន​ទទួល​រង​ការបាញ់​ពន្លិច​ពី​នាវា​មុជទឹក​កូរ៉េខាងជើង។ ឥឡូវ​នេះ​ទៀត កូរ៉េខាងត្បូង​បាន​សុំ​ពន្យារពេល​បន្ថែម ដោយ​សំអាង​លើ​ការ​គំរាម​ថ្មីៗ​របស់​កូរ៉េខាងជើង ពិសេស​ការ​សាកល្បង​នុយក្លេអ៊ែរ​លើកទី៣ កាល​ពី​ខែ​កុម្ភៈ​កន្លង​ទៅ។

កន្លង​មក លោក​ប្រធានាធិបតី​អាមេរិក​អូបាម៉ា​បាន​អំពាវនាវ​ឲ្យ​មាន​ការ​គោរព​តាម​កាលវិភាគ​ដែល​បាន​ព្រមព្រៀង​គ្នា មាន​ន័យ​ថា កូរ៉េខាងត្បូង​ត្រូវ​តែ​ទទួល​តួនាទី​បញ្ជាការ​ទ័ព​របស់​ខ្លួន​នៅ​ឆ្នំា ២០១៥ ទោះ​បី​ជា​ក្នុង​ករណី​គ្មាន ឬ​ក៏​មាន​សង្រ្គាម​ក៏​ដោយ។ តែ​លោក​រដ្ឋមន្រ្តី​ការពារជាតិ​អាមេរិក Chuck Hagel បាន​ទទួល​ស្គាល់​ថា លោក​បាន​យល់​ពី​ក្តីបារម្ភ​របស់​កូរ៉េខាងត្បូង និង​ថា ការ​ផ្ទេរ ឬ​មិន​ផ្ទេរ​ត្រូវ​តែ​ផ្អែក​លើ​ស្ថានការណ៍​ជាក់ស្តែង៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI