ម៉ាឡេស៊ី-អូស្រ្តាលី

ការ​ស្វែងរក​យន្តហោះ Malaysia Airlines MH៣៧០ បាន​ចាប់​ផ្តើម​ជាថ្មី​នៅក្នុង​មហាសមុទ្រ​ឥណ្ឌា

ការ​ស្វែងរក​យន្តហោះ Malaysia Airlines MH៣៧០ បាន​ចាប់​ផ្តើម​ជាថ្មី​នៅក្នុង​មហាសមុទ្រ​ឥណ្ឌា
ការ​ស្វែងរក​យន្តហោះ Malaysia Airlines MH៣៧០ បាន​ចាប់​ផ្តើម​ជាថ្មី​នៅក្នុង​មហាសមុទ្រ​ឥណ្ឌា REUTERS/U.S. Navy

រដ្ឋអំណាច​នៃ​ប្រទេស​អូស្រ្តាលី​បាន​ប្រកាស​ឲ្យ​ដឹង​នៅ​ថ្ងៃ​ចន្ទ ទី៥ តុលា​នេះ​ថា ប្រតិបត្តិការ​ស្វែង​រក​យន្តហោះ​របស់ Malaysia Airlines បាន​ចាប់​ផ្តើម​ជា​ថ្មី​នៅ​ក្នុង​មហាសមុទ្រ​ឥណ្ឌា។ គួរ​រម្លឹក​ជូន​ឡើង​វិញ​ថា យន្តហោះ Malaysia Airlines ប្រភេទ​ប៊ូអ៊ីង ៧៧៧-២០០ ដែល​មាន​ជើង​ហោះហើរ​លេខ MH៣៧០ បាន​បាត់​ខ្លួន​កាល​ពី​ថ្ងៃទី៨ មីនា​កន្លង​ទៅ បន្ទាប់​ពី​បាន​ហោះ​ឡើង​ពី​អាកាសយានដ្ឋាន​ក្នុង​ទីក្រុង​គូឡាឡាំពួ​ឆ្ពោះ​ទៅ ​កាន់​ទីក្រុង​ប៉េកំាង​ប្រទេស​ចិន​ជាមួយ​នឹង​អ្នកដំណើរ​សរុប ២៣៩នាក់។

ផ្សាយពាណិជ្ជកម្ម

បន្ទាប់​ពី​បាន​បាត់​ដំណឹង​សូនឈឹង​កាល​ពី ៧ខែ​មក នេះ​ជា​ការ​ស្វែង​រក​ដំណាក់កាល​ទី២ នៅ​ក្នុង​មហាសមុទ្រ​ឥណ្ឌា​ដែល​គេ​សង្ស័យ​ថា យន្តហោះ Malaysia Airlines MH៣៧០ បាន​ជួប​គ្រោះថ្នាក់​ធ្លាក់​លិច​នៅ​ទីនោះ។ តែ​បញ្ហា​នៅ​ត្រង់​ថា​រហូត​មក​ដល់​ពេល​នេះ គេ​នៅ​មិន​ទាន់​ទទួល​បាន​សញ្ញា​តម្រុយ​ណា​មួយ​ដែល​បញ្ជាក់​ពី​វត្តមាន​បំណែក​យន្តហោះ​នោះ​នៅ​ឡើយ​ទេ។ ក្រៅ​ពី​នៅ​លើ​ផ្ទៃទឹកសមុទ្រ ការ​ស្រាវជ្រាវ​ស្វែង​ក៏​ត្រូវ​បាន​ធ្វើ​ឡើង​នៅ​បាតសមុទ្រ​ដែរ។

នាវា GO Phoenix របស់​ក្រុមហ៊ុន Phoenix International និង Fugro Discovery របស់​អូស្រ្តាលី​បាន​ដឹក​សម្ភារៈ និង​អ្នកឯកទេស​ទៅ​កាន់​មហាសមុទ្រ​ឥណ្ឌា​ប៉ែកខាង និង​បាន​ចាប់​ផ្តើម​ការ​ស្រាវជ្រាវ​ដោយ​មាន​មាន​ជំនួយ​ពី​ឧបករណ៍​យានយន្ត​មុជទឹក​ចំនួន​ពីរ គឺ GO Phoenix និង Fugro Discovery។ ឧបករណ៍​យានយន្ត​ទំាង​ពីរ​នេះ​នឹង​ត្រូវ​គេ​បញ្ជូន​ទៅ​បាតសមុទ្រ​ក្នុង​ជម្រៅ​ពី ៥ ០០០ ទៅ ៦ ០០០ម៉ែត្រ​ដើម្បី​ចាប់​សញ្ញា​វត្តមាន​បំណែក​យន្តហោះ​សំខាន់ៗ មាន​ដូច​ជា​ម៉ាស៊ីន ឬ​មួយ​ក៏​តួយន្តហោះ​ជា​ដើម។ តែ​ធុងអាគុយ​របស់​យានយន្ត​ទំាង​ពីរ​គ្រឿង​នេះ​មាន​ផ្ទុក​ថាមពល​សម្រាប់​តែ​រយៈពេល ១២ថ្ងៃ​ប៉ុណ្ណោះ។

ក្រុមហ៊ុន Phoenix International បាន​បញ្ជាក់​ថា រូបភាព​ដែល​យានយន្ត​ទំាង​ពីរ​គ្រឿង​ត្រូវ​បញ្ជូន​​ជា​អចិន្ត្រែយ៍​ពី​បាតសមុទ្រ​នឹង​ត្រូវ​យក​ទៅ​សិក្សា វិភាគ​ភ្លាមៗ​ក្នុង​ពេល​តែ​មួយ​ដើម្បី​ចង់​ដឹង​ថា តើ​មាន​បំណែក​យន្តហោះ​បាត់ខ្លួន ​នោះ ឬ​អត់។ គួរ​រម្លឹក​ជូន​ថា​កន្លង​មក នាវា​ចិន​ឈ្មោះ Zhu Kezhen និង​នាវា​អូស្រ្តាលី​ឈ្មោះ Fugro Equator ធ្លាប់​បាន​ចូលរួម​ប្រតិបត្តិការ​ស្រាវជ្រាវ​ដោយ​ប្រើ​ម៉ាស៊ីន​ស្កេន​ផ្ទែបាតសមុទ្រ​បាន​ទំហំ​ជិត ១១០ ០០០ម៉ែត្រការ៉េ។

ការ​ស្រាវជ្រាវ​កំពុង​បន្ត​មាន​ដោយ​នៅ​លើក​នេះ ក្រុមអ្នកស៊ើបអង្កេត​បាន​ទទួល​ជំនួយ​បន្ថែម​ពី​ក្រុមអ្នក​ឯកទេស​ដែល​បាន​ស្រាវជ្រាវ​រក​បំណែក​យន្តហោះ​មួយ​គ្រឿង​របស់​ក្រុមហ៊ុន​បារំាង Air France ដែល​បាន​ជួប​គ្រោះថ្នាក់​ធ្លាក់​ក្នុង​មហាសមុទ្រ​អាត្លង់ទិច​កាល​ពី​ខែ​មិថុនា ឆ្នំា ២០០៩។

រហូត​មក​ដល់​ពេល​នេះ មូលហេតុ​នៃ​ការ​ធ្លាក់​យន្តហោះ​ម៉ាឡេស៊ី​កាល​ពី​ថ្ងៃទី៨ មីនា​កន្លង​ទៅ​ត្រូវ​បាន​ក្រុមអ្នកស៊ើបអង្កេត​ប្រមើលមើល​ថា អាច​មក​ពី​កង្វះ​ខ្យល់​អុកស៊ីសែន​ក្នុង​យន្តហោះ​ដែល​ធ្វើ​ឲ្យ​មនុស្ស​ទំាងអស់​នៅ​ក្នុង​យន្តហោះ​ថប់ខ្យល់ បាត់​ស្មារតី និង​ដែល​យន្តហោះ​បាន​បន្ត​ដំណើរ​ដោយ​ប្រើ​ប្រព័ន្ធ​ស្វ័យប្រវត្តិ​រហូត​ដល់​អស់​សំាង​ធ្លាក់​ក្នុង​សមុទ្រ។ យ៉ាង​ណា​ក៏​ដោយ រដ្ឋអំណាច​អូស្រា្តលី និង​ម៉ាឡេស៊ី​ប្តេជ្ញា​បន្ត​ការ​ស្រាវជ្រាវ​រហូត​រក​ឃើញ​ការ​ពិត នោះ​បើ​ត្រូវ​ចំណាយ​ពេល​ប៉ុន្មាន​ក៏​ដោយ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI