ទស្សនៈព្រឹត្តិការណ៍ខ្មែរ

មធ្យោបាយ​ដែល​រដ្ឋាភិបាល​អាច​ស្តាប់​មតិ​យោបល់​របស់​ម្ចាស់ឆ្នោត​!

សំឡេង ០៥:១៥
ក្រុមគ្រូបង្រៀន​ទាមទារឲ្យដោះស្រាយ​បញ្ហាជីវភាព និងបំបាត់​អំពើ​ពុករលួយ​ក្នុងសាលា​
ក្រុមគ្រូបង្រៀន​ទាមទារឲ្យដោះស្រាយ​បញ្ហាជីវភាព និងបំបាត់​អំពើ​ពុករលួយ​ក្នុងសាលា​ Siv Channa/RFI

ក្នុង​ការ​ចាប់​ផ្តើម​ដឹក​នាំ​រដ្ឋាភិបាល​អាណត្តិ​ទី​៥​នេះ លោក​នាយក​រដ្ឋមន្ត្រី ហ៊ុន សែន បាន​ផ្តើម​រៀប​ចំ​វេទិកា​សាធារណៈ​មុន​គេ​ដើម្បី​ស្តាប់​សំណូមពរ​របស់​ពលរដ្ឋ​ម្ចាស់​ឆ្នោត។ វេទិកា​សាធារណៈ​នេះ​ត្រូវ​គេ​គ្រោង​រៀប​ចំ​ឡើង​នៅ​គ្រប់​ទិស​ទី និង​ជា​ញឹកញាប់​ដើម្បី​អនុញ្ញាត​ឲ្យ​ប្រជាជន​បាន​សម្តែង​មតិ​នៅ​ចំពោះ​មុខ​អាជ្ញា​ធរ​មាន​សមត្ថកិច្ច។ នេះ​ជា​កំណែទម្រង់​មួយ​ដែល​រដ្ឋាភិបាល​រំពឹង​ថា អាច​ធ្វើ​ឲ្យ​ការ​ដឹកនាំ​របស់​ខ្លួន​ឆ្លើយ​តប​ទៅ​នឹង​សេចក្តី​ត្រូវ​ការ​របស់​ប្រជាជន​ម្ចាស់​ឆ្នោត។ ប៉ុន្តែ តើ​វេទិកា​សាធារណៈ​នេះ​នឹង​មាន​ប្រសិទ្ធភាព​ដែរ​ឬ​ទេ?

ផ្សាយពាណិជ្ជកម្ម

នៅ​ក្នុង​អង្គ​ប្រជុំ​គណៈរដ្ឋមន្ត្រី​ដំបូង​នៃ​រដ្ឋាភិបាល​ថ្មី​អាណត្តិ​ទី​៥​កាល​ពី​ថ្ងៃ​ទី ២៥ កញ្ញា លោកនាយករដ្ឋមន្ត្រី ហ៊ុន សែន បាន​ដាក់​ចេញ​នូវ​គោលនយោបាយ​កំណែទម្រង់​មួយ​ចំនួន​ក្នុង​នោះ ការ​បង្ខិត​មន្ត្រី​អាជ្ញាធរ​ឲ្យ​ទៅ​កៀក​នឹង​ពលរដ្ឋ​គឺ​ជា​កិច្ចការ​ចាំ​បាច់​និង​ជា​បន្ទាន់​មួយ។ ដើម្បី​សម្រេច​គោល​ដៅ​នេះ រដ្ឋាភិបាល​គ្រោង​នឹង​រៀប​ចំ​វេទិកា​សាធារណៈ​នៅ​គ្រប់​ទិស​ទី និង​ឲ្យ​បាន​ញឹកញាប់​ទៀត​ផង។

 
គោល​ដៅ​នៃ​ការ​រៀប​ចំ​វេទិកា​សាធារណៈ​នេះ​គឺ​ដើម្បី​អនុញ្ញាត​ឲ្យ​ប្រជាពលរដ្ឋ​ម្ចាស់​ឆ្នោត​បាន​ឡើង​សម្តែង​មតិ និង​សំណូមពរ​របស់​ខ្លួន​នៅ​ចំពោះ​មុខ​មន្ត្រី​អាជ្ញាធរ។ ប្រជាពលរដ្ឋ​ក៏​អាច​រិះគន់​ឬ​ស្តី​បន្ទោស​ចំ​ៗ​ដល់​មន្ត្រី​ណា​ដែល​បាន​ប្រព្រឹត្ត​ខុសឆ្គង​ផង​ដែរ។ ប្រមុខ​រដ្ឋាភិបាល​សង្ឃឹម​ថា មធ្យោបាយ​នេះ​អាច​អនុញ្ញាត​ឲ្យ​មន្ត្រី​អាជ្ញាធរ និង​រដ្ឋាភិបាល​របស់​លោក​អាច​ស្វែងយល់​អំពី​សេចក្តី​ត្រូវ​ការ​របស់​ប្រជាពលរដ្ឋ​បាន​ស៊ីជម្រៅ​ជាង​មុន​ដើម្បី​កែ​តម្រូវ​គោលនយោបាយ​របស់​ខ្លួន​ឲ្យ​សម​ស្រប​ទៅ​តាម​ការ​ចង់​បាន​របស់​ម្ចាស់ឆ្នោត។

តាម​ពិត​ទៅ កិច្ចការ​ទាំង​នេះ​គួរ​តែ​ត្រូវ​បាន​អនុវត្ត​តាំង​ពី​យូរ​ណាស់​មក​ហើយ​គឺ​មិន​មែន​ជា​រឿង​ដែល​ទើបតែ​ត្រូវ​ប្រញាប់​ប្រញាល់​នៅ​ពេល​នេះ​ទេ ពី​ព្រោះនេះ​ជាគោលការណ៍​ដ៏​សាមញ្ញ​បំផុត​មួយ​សម្រាប់​លទ្ធិ​ប្រជាធិបតេយ្យ។ ប៉ុន្តែ គួរ​ឲ្យ​សោកស្តាយ មន្ត្រី​អាជ្ញាធរ និង​មន្ត្រី​រដ្ឋាភិបាល​មួយ​ចំនួន​បែរ​ជា​មើល​រំលង​បញ្ហា​នេះ។

ជា​ការ​ពិតណាស់ ភាព​អសកម្ម​ឬ​កំហុសឆ្គង​របស់​មន្ត្រីរ​ដ្ឋា​ភិ​បាល​និង​មន្ត្រី​អាជ្ញាធរ​ជាច្រើន​រាប់​តាំង​ពី​ថ្នាក់លើ​រហូត​ដល់​ថ្នាក់​ក្រោម​គឺ​ជា​ប្រភព​ដែល​ធ្វើ​ឲ្យ​គណបក្ស​កាន់​អំណាច​ស្រុតចុះ​ប្រជាប្រិយ​ភាព​យ៉ាង​ខ្លាំង​ក្នុង​ការ​បោះឆ្នោត​សភា​អាណត្តិ​ទី​៥​នេះ។ ស្រុត​ចុះ​ពី​ព្រោះ​តែម​ន្ត្រី​អាជ្ញាធរ​បាន​ធ្វើ​ឲ្យ​ប្រជាពលរដ្ឋ​មិន​សប្បាយ​ចិត្ត​ឬក៏​ឈឺចាប់​ដោយសារ​តែ​ទង្វើ​របស់​ខ្លួន។ ពួកគេ​មិន​បាន​ស្វែង​យល់​ពី​សំណូមពរ​របស់​ពលរដ្ឋ​ទេ តែ​បែរ​ជា​ធ្វើ​ខ្លួន​ឲ្យ​ខ្ពស់​ហួស​ឆ្ងាយ​ពី​ម្ចាស់ឆ្នោត​ទៅ​វិញ។

ជំនួស​ឲ្យ​ការ​បម្រើ​ពលរដ្ឋ ពួក​គេ​បែរ​ជា​យក​អំណាច​ទៅ​គាប​សង្កត់​ពលរដ្ឋ​ម្ចាស់​ឆ្នោត​ដើម្បី​លាភ​សក្ការៈ​ផ្ទាល់ខ្លួន​ទៅ​វិញ។ ជំនួស​ឲ្យ​កា​ស្វែង​យល់​ពី​សុខ​ទុក្ខ​ម្ចាស់ឆ្នោត ពួក​គេ​ច្រើន​តែ​គេច​វេស​មិន​សូវ​ចង់​ប្រឈមមុខ​ជាមួយ​ម្ចាស់ឆ្នោត​ទៅ​វិញ។ ជាក់​ស្តែង ពេល​មាន​វេទិកា​សាធារណៈ​ម្តងៗ មន្ត្រី​បក្ស​កាន់អំណាច​ច្រើន​តែ​មិនសូវ​ចូលរួម​ឡើយ។ មិន​តែ​ប៉ុណ្ណោះ នៅ​ពេលដែល​ពលរដ្ឋ​តវ៉ា ពួក​គេ​បែរ​ជា​គេចវេស​មិន​ទទួល​ខុសត្រូវ​ឬ​ចោទ​ប្រកាន់​អ្នក​តវ៉ា​ថា​ជា​ក្រុមប្រឆាំង​ទៅ​វិញ។ ទីបំផុត ពលរដ្ឋ​ទាំងនោះ​ក៏​បោះឆ្នោត​ឲ្យ​បក្ស​ប្រឆាំង​មែន។

នេះ​ជា​ហេតុផល​ដែល​ប្រមុខ​រដ្ឋាភិបាល​ប្រញាប់ប្រញាល់​បង្ខិត​មន្ត្រី​រប​ស់​ខ្លួន​ឲ្យ​ទៅ​កៀក​នឹង​ពលរដ្ឋ។ វា​ជា​កំណែទម្រង់​ក្នុង​ផ្លូវ​ត្រូវ​មួយ ហើយ​ក៏​មិន​ទាន់​ហួស​ពេល​ដែរ​បើ​ទោះ​បី​ជា​វា​យឺតយ៉ាវ​យ៉ាង​ខ្លាំង​ក៏​ដោយ។ ប៉ុន្តែ អ្វី​ដែល​រដ្ឋាភិបាល​គួរ​ប្រយ័ត្ន​គឺ ប្រសិទ្ធភាព​នៃ​ការ​រៀប​ចំ​វេទិកាសាធារណៈ។ អ្វី​ដែល​គួរស្វែងយល់​នោះ​គឺ មិនមែន​គ្រប់​វេទិកា​សុទ្ធ​តែ​ជា​ឱកាស​ដែល​ពលរដ្ឋ​ហ៊ាន​សម្តែង​មតិ​នោះ​ឡើយ។

ជា​ទូទៅ ប្រជាពលរដ្ឋ​ខ្មែរ​នៅ​តែ​មាន​អារម្មណ៍​ភ័យខ្លាច​អាជ្ញាធរ​នៅ​ឡើយ។ ក្នុង​ន័យ​នេះ ពួកគេ​ច្បាស់​ជា​មិន​ហ៊ាន​សម្តែង​មតិ​ដោយ​សេរី​ឡើយ ប្រសិនបើ​វេទិកា​នោះ​មិន​ធានា​បរិយាកាស​អព្យាក្រឹត​ដ៏​គួរ​ឲ្យ​ទុកចិត្ត​នោះ។ ដូច្នេះ អ្នករៀបចំ​វេទិកា​សម្តែង​មតិ គួរ​តែ​ជា​អង្គការ​សង្គម​ស៊ីវិល​ឯករាជ្យ គឺ​មិនមែន​ជា​អាជ្ញាធរ​ឡើយ។ នេះ​ជា​ចំណុច​គន្លឹះ​ដែល​ត្រូវ​យក​ចិត្ត​ទុក​ដាក់​ប្រសិន​បើ​រដ្ឋាភិបាល​ពិត​ជា​ចង់​ស្វែង​យល់​ពី​មតិ​របស់​ពលរដ្ឋ​មែន​នោះ។
ម្យ៉ាង​ទៀត ក្រៅ​ពី​វេទិកា​សាធារណៈ នៅ​មាន​មធ្យោបាយ​ជា​ច្រើន​ទៀត​ដែល​រដ្ឋាភិបាល​គួរ​ផ្តោត​ការ​យក​ចិត្ត​ទុកដាក់ ដូចជា ការ​ដាក់​ពង្រាយ​ប្រអប់​សំបុត្រ​នៅ​គ្រប់​ទី​កន្លែង​ដើម្បី​ទទួល​យក​មតិ​យោបល់​ឬ​ពាក្យ​បណ្តឹង​របស់​ពលរ​ដ្ឋ ការ​ស្តាប់​មតិ​របស់​ពលរដ្ឋ​តាមរយៈ​តុ​កាហ្វេ តាមរយៈ​សារព័ត៌មាន​ឯករាជ្យ វេទិកា​របស់​អង្គការ​សង្គម​ស៊ីវិល ឬ​ក៏​វេទិកា​របស់​គណបក្ស​ប្រឆាំង​ផង។

តាមពិត តាមរយៈ​មធ្យោបាយ​ទាំង​នេះ រដ្ឋាភិបាល​គួរ​តែ​ទទួល​បាន​ព័ត៌មាន​គ្រប់គ្រាន់​ទៅហើយ​ដើម្បី​យល់ដឹង​ពី​សំណូមពរ និង​បញ្ហា​របស់​ប្រជាពលរដ្ឋ ដោយ​គ្រាន់​តែ​បើក​ចិត្ត​ឲ្យ​ទូលាយ ហើយ​ស្តាប់​និង​ទទួល​យក​បញ្ហា​ទាំង​នោះ​មក​ដោះស្រាយ​ជា​ការ​ស្រេច។ ផ្ទុយ​ទៅ​វិញ ប្រសិន​បើ​មន្ត្រី​រដ្ឋាភិបាល នៅ​តែ​ពិ​រោះ​នឹង​ពាក្យ​បញ្ចើច​បញ្ចើ​ត​ទៅ​ទៀត ហើយ​មិន​ចូលចិត្ត​ស្តាប់​មតិ​រិះគន់​សោះ​នោះ គោលនយោបាយ​កំណែទម្រង់​របស់​រដ្ឋាភិបាល​នឹង​ច្បាស់​ជា​មិន​ទទួលបាន​លទ្ធផល​ឡើយ៕

 

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI