អានតួអត្ថបទ
គ្រុនចាញ់

ករណីស្លាប់​ដោយ​​ជំងឺ​គ្រុនចាញ់​នៅ​ទូទាំង​ពិភពលោក​មាន​ការធ្លាក់ចុះ

មូសដែកគោល​គឺ​ជា​ភ្នាក់ងារ​ចម្លង​មេរោគ​គ្រុនចាញ់
មូសដែកគោល​គឺ​ជា​ភ្នាក់ងារ​ចម្លង​មេរោគ​គ្រុនចាញ់ REUTERS/James Gathany
ដោយ៖ សេង ឌីណា
១២ នាទី

យុទ្ធនាការ​ប្រយុទ្ធប្រឆាំង​នឹង​ជំងឺ​គ្រុនចាញ់ បាន​ជួយជីវិត​មនុស្ស​ប្រមាណ​ជាង ៣លាន​នាក់ ចាប់តាំង​ពី​ឆ្នាំ​២០០០​មក។ នេះ​បើ​យោងតាម​របាយការណ៍​របស់​អង្គការ​សុខភាព​ពិភពលោក ចេញ​ផ្សាយ កាល​ពីថ្ងៃ​ពុធ។ ក៏ប៉ុន្តែ របាយការណ៍​នេះ​ក៏​បាន​បញ្ជាក់​ផងដែរ​ថា ចំនួន​អ្នក​ស្លាប់​ដោយ​ជំងឺ​គ្រុនចាញ់​នៅ​តែ​មាន​កម្រិត​ខ្ពស់ ដែល​ទាមទារ​​ចាំបាច់​ឲ្យ​មាន​ការខិតខំ​ប្រឹងប្រែង​កាន់តែ​ខ្លាំង​ថែមទៀត ដើម្បី​ទប់ទល់​នឹង​ជំងឺ​នេះ។

ផ្សាយពាណិជ្ជកម្ម

 

របាយការណ៍​ជំងឺ​គ្រុនចាញ់ ឆ្នាំ​២០១៣ ដែល​ចេញ​ផ្សាយ​ដោយ​អង្គការ​សុខភាព​ពិភពលោក កាល​ពីថ្ងៃ​ពុធ​​​នេះ បង្ហាញ​ថា ចាប់តាំង​ពី​ឆ្នាំ​២០០០ រហូតដល់​ឆ្នាំ​២០១២ អត្រា​អ្នក​ស្លាប់​ដោយ​ជំងឺ​គ្រុនចាញ់​នៅទូទាំង​ពិភពលោក​បាន​ធ្លាក់ចុះ ៤៥%។ ក៏ប៉ុន្តែ ចំនួន​អ្នក​ស្លាប់​នៅតែ​មាន​ច្រើន ដោយ​កាល​ពី​ឆ្នាំ​២០១២​កន្លងទៅនេះ មាន​​ករណី​គ្រុនចាញ់​ប្រមាណ​ជា ២០៧​លាន​នាក់ នៅទូទាំង​ពិភពលោក ក្នុងនោះ មាន ៦២៧ ០០០​នាក់​ស្លាប់។

របាយការណ៍​នេះ​ក៏​បាន​បញ្ជាក់​ផងដែរ​ថា កង្វះខាត​ខាង​ផ្នែក​ថវិកា និង​កង្វះខាត​​វិធានការ​បង្ការ​សាមញ្ញៗ ដូចជា មុង ជាដើម គឺ​ជា​មូលហេតុ​​ធ្វើ​ឲ្យ​មេរោគ​គ្រុនចាញ់​នៅតែជា​ការ​គំរាមកំហែង​ដ៏ធំមួយ សម្រាប់​ពិភពលោក ជាពិសេស​ នៅ​តំបន់​អាហ្វ្រិក និង​អាស៊ី​អាគ្នេយ៍។

លោកស្រី​ម៉ាហ្ការេត ចាន់ (Margaret Chan) អគ្គនាយិកា​អង្គការ​សុខភាព​ពិភពលោក បាន​ថ្លែង​​ថា “​ការណ៍​ដែល​មាន​មនុស្ស​យ៉ាងច្រើន​សន្ធឹកសន្ធាប់ ត្រូវ​ឈឺ​ និង​ស្លាប់ ដោយ​មូសខាំ​បែបនេះ គឺ​ជា​សោកនាដកម្ម​ដ៏ធំមួយ សម្រាប់​ពិភពលោក ក្នុង​សតវត្សរ៍​ទី​២១​នេះ”។

នៅ​ក្នុង​ពេល​បច្ចុប្បន្ន​នេះ មាន​មនុស្ស​ប្រមាណ​ជា ៣ ៤០០​លាននាក់ នៅទូទាំង​ពិភពលោក ដែល​កំពុង​ប្រឈមមុខ​នឹង​ការ​ឆ្លង​មេរោគ​គ្រុនចាញ់ ក្នុងនោះ ប្រមាណ​ជា ៨០% ស្ថិត​នៅ​ក្នុង​តំបន់​អាហ្វ្រិក។ សាធារណរដ្ឋ​ប្រជាធិបតេយ្យកុងហ្គោ និង​ប្រទេស​នីហ្សេរីយ៉ា ត្រូវ​បាន​គេ​ចាត់​ជា​ប្រទេស​​ដែល​កំពុង​ប្រឈមមុខ​​នឹង​ជំងឺ​គ្រុនចាញ់​ធ្ងន់ធ្ងរ​ជាងគេ។

យោងតាម​របាយការណ៍​របស់​អង្គការ​សុខភាព​ពិភពលោក បញ្ហា​ប្រឈម​មួយទៀត ​ដែល​កំពុង​តែ​ធ្វើ​ឲ្យ​គេ​​ព្រួយបារម្ភ គឺ​​​ការ​លេចឡើង​នៃ​ករណី​មេរោគ​គ្រុនចាញ់ ដែល​ធន់​នឹង​ថ្នាំពេទ្យ នៅ​ក្នុង​តំបន់​អាស៊ី​អាគ្នេយ៍ គឺ​ក្នុង​ប្រទេស​ថៃ វៀតណាម ភូមា និង​កម្ពុជា៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ