ព្រឹត្តិការណ៍អន្តរជាតិប្រចាំថ្ងៃ

លោកស្រី​អ៊ុងសាន ស៊ូជី​ទៅ​ប្រទេស​ថៃ​ដើម្បី​ជួប​ប្រជាជន​ភូមា​ដែល​គាំទ្រ​គាត់

សំឡេង ០៦:៤៩
REUTERS/Sukree Sukplang

មេដឹកនាំបក្ស​ប្រឆាំង​ភូមា លោកស្រី​អ៊ុងសាន ស៊ូជី បាន​ធ្វើ​ដំណើរ​ទៅ​ដល់​ប្រទេស​ថៃ កាលពី​រាត្រី​ថ្ងៃ​អង្គារ​ទី ២៩ ឧសភា។ ក្នុង​រយៈពេល ២៤​ឆ្នាំ​ដែល​លោកស្រីអ៊ុងសាន ស៊ូជី​​ស្ថិតនៅក្នុង​ប្រទេស​ភូមា នេះ​ជា​ដំណើរ​ទស្សនកិច្ច​លើក​ទីមួយ ដែល​លោកស្រី បាន​ចេញ​ដំណើរទៅ​បរទេស។ លោកស្រី អ៊ុងសាន ស៊ូជី​បាន​ជ្រើសរើស​យក​ប្រទេស​ថៃ​មក​ធ្វើ​ជា​ប្រទេស​ទីមួយ​ដើម្បី​ធ្វើ​ទស្សនកិច្ច ព្រោះថៃ មាន​ព្រំដែន​ជាមួយ​ភូមាប្រមាណ ១៨០០​គីឡូម៉ែត្រ។ នៅក្នុង​ប្រទេស​ថៃ សម្បូរ​ប្រជាជន​ភូមា​រស់នៅ​ច្រើន​ជាងគេ។

ផ្សាយពាណិជ្ជកម្ម

នៅក្នុង​ប្រទេស​ថៃ លោកស្រី​អ៊ុងសាន ស៊ូជី បាន​ទទួល​ស្វាគម​យ៉ាងគគ្រឹកគគ្រេង​ពី​ប្រជាជន​ភូមា ដែល​រស់នៅក្នុង​ទឹកដី​ថៃ។ នៅថ្ងៃ​ពុធនេះ លោកស្រី​បាន​ជួប​ជាមួយ​ក្រុម​ប្រជាជន​ភូមា​ដែល​ប្រកប​របរ​ជា​​ពលករ​ អន្តោប្រវេសន៍ នៅខេត្ត​សាមុត សាកន។ បន្ទាប់មក លោកស្រី​នឹង​ទៅជួប​ក្រុម​ជនភៀសខ្លួន​ភូមា ជាង​មួយសែន ប្រាំម៉ឺន​នាក់ ដែល​កំពុង​រស់នៅ ក្នុង​ជំរំ​ដែល​ស្ថិតនៅ ភាគខាងជើង​ប្រទេស​ថៃ។ នៅប្រទេស​ថៃ លោកស្រី​អ៊ុងសាន ស៊ូជី នឹង​ឆ្លៀត​ទៅ​ជួប​ក្រុមជនភៀសខ្លួន​នយោបាយ។ សកម្មជន​ប្រឆាំង​ភូមា រាប់ម៉ឺន​នាក់ លួចរត់គេច​ចេញ​ពី​ការតាម​ចាប់ បង្រ្កាប​របស់​របបសឹក​ភូមា និងបាន​យក​ប្រទេស​ថៃ ជាទីតាំង​សម្រាប់​តវ៉ា រិះគន់ និង​ប្រឆាំង​នឹង​រដ្ឋាភិបាល​ក្នុង​ស្រុក។

គោលដៅ​របស់​លោកស្រី​អ៊ុងសាន ស៊ូជី​ទៅប្រទេស​ថៃ គឺ​ដើម្បី​ទៅ​ផ្សារភ្ជាប់​ ចំណង​ ឡើងវិញ ជាមួយ​ប្រជាជន​ភូមា​ដែល​បាន​ទន្ទឹង​រង់ចាំ​ជំនួយ​ពី​លោកស្រី ពោល គឺ​តាំងពី​ពេល​លោកស្រី អ៊ុងសាន ស៊ូជី កូនស្រី​របស់​មេទ័ព​អ៊ុងសាន បាន​ធ្វើដំណើរ​ទៅដល់​ភូមា​នៅឆ្នាំ ១៩៨៨ម្ល៉េះ។ ប្រជាជន​ភូមា ដែល​លោកស្រី​មិន​បាន​ទាក់ទង​ជាមួយ ដោយសារ​តែ​លោកស្រី​ត្រូវ​របបសឹក​ ចាប់ដាក់ឃុំ​ក្នុង​គេហដ្ឋាន អស់១៥ឆ្នាំ។

ម្យ៉ាងទៀត ទស្សនកិច្ច​របស់លោកស្រី​អ៊ុងសាន ស៊ូជី​​នៅថៃ ក៏​ជា​ឱកាស​ឲ្យ​លោកស្រី​អាច​ពង្រឹង​ទំនាក់ទំនង​ជាមួយ​ក្រុមមនុស្សដែល​​ ធ្លាប់គាំទ្រ​បុព្វហេតុ​នយោបាយ​របស់​លោកស្រី។ ក្រុម​បះបោរ​ភូមាទាំងនេះ បាន​រត់ទៅ​ជ្រក​នៅប្រទេសថៃ និង​បាន​តស៊ូ​ផ្នែក​នយោបាយ​តាំងពី​ទឹកដីថៃ​ ដើម្បី​ទាមទារ​សិទ្ធិសេរីភាព​ និង​លទ្ធិប្រជាធិបតេយ្យ​ឲ្យ​ប្រជាជន​ភូមា។

នៅព្រឹកថ្ងៃ​ពុធនេះ នៅក្នុង​ខេត្ត​សាមុត សាកន ប្រមុខបក្ស​ប្រឆាំង​ភូមា​បាន​សន្យា​ទៅកាន់​ប្រជាពលករ​ភូមា​ថា លោកស្រី​នឹង​ខំប្រឹង​អស់​ពី​សមត្ថភាព​ដើម្បី​ពួកគេ។ លោកស្រី​អ៊ុងសាន ស៊ូជី​បាននិយាយ​ផងដែរ​លើកទឹកចិត្ត​ឲ្យ​ប្រជាជន​ភូមា​នៅបរទេស​តស៊ូតទៅទៀត គឺ​កុំ​អស់សង្ឃឹម ព្រោះ​ថា ការផ្លាស់ប្តូរ​នឹង​នៅ​តែ​មាន​ជានិច្ច។

គួរបញ្ជាក់ថា នេះ​ជា​លើកទីមួយ ដែល​ប្រមុខ​បក្ស​ប្រឆាំង​ភូមា​បាន​ធ្វើ​ដំណើរ​ទៅបរទេស បន្ទាប់ពី​ស្ថិតនៅតែ​ក្នុង​ប្រទេស​ភូមា អស់ ២៤ឆ្នាំ។ ក្រៅពីជាប់ឃុំ​ក្នុង​គេហដ្ឋាន​របស់​របបសឹក លោកស្រី​អ៊ុងសាន ស៊ូជី បាន​បដិសេធ​មិន​ធ្វើ​ដំណើរ​ទៅបរទេស ដោយលោកស្រី​ខ្លាច​ថា របបសឹក​នឹង​មាន​ឱកាស​រារាំង មិន​ឲ្យ​លោកស្រី​ត្រលប់​ចូល​ភូមាវិញ។ លើកនេះ ការដែល​លោកស្រី​យល់ព្រម​ចាកចេញ​ពី​ភូមា ទៅ​ធ្វើ​ដំណើរទស្សនកិច្ច​នៅបរទេស ក៏ព្រោះ​លោកស្រី​ជឿទុកចិត្តថា ​ភូមា​បច្ចុប្បន្ន​កំពុង​ធ្វើការ​ផ្លាស់ប្តូរ។

លោកស្រី​អ៊ុងសាន ស៊ូជីដឹង​ថា រដ្ឋាភិបាល​ភូមា​ថ្មី ត្រូវការ​លោកស្រី និង​ប្រាកដ ជា​បើកផ្លូវ​ឲ្យ​លោកស្រី​ត្រលប់​ចូល​ប្រទេសវិញ។ ព្រោះថា គ្មាន​លោកស្រី ភូមា នឹង​មិន​អាច​ទទួល​បាន​ការដក​ទណ្ឌកម្ម​ពី​ប្រទេស​លោក​ខាងលិច។ អ៊ីចឹង​បើនិយាយ​ពី​រឿង​ទុកចិត្ត លោកស្រី​អ៊ុងសាន ស៊ូជី មិន​ជឿទុកចិត្ត​ទាំងស្រុង​លើ​រដ្ឋាភិបាលភូមា​ថ្មី​ទេ ព្រោះរដ្ឋាភិបាល​នៅតែ​គ្រប់គ្រង​ភាគច្រើន​ដោយ​ពួកយោធា​ដដែល។ ពួកយោធា​នេះ​ដែល​នៅតែ​មាន​មហិច្ឆតា​លុបបំបាត់​ចោល​មិន​ឲ្យ​មាន​ក្រុមប្រឆាំង ​នៅភូមា ព្រោះ​តាម​ឯកសារ​ សម្ងាត់ យោធា បើទោះជា​សេរីភាព​របស់​​លោកស្រី​អ៊ុងសាន ស៊ូជី​ធ្វើ​ឲ្យ​ភូមា​មាន​ទំនាក់ទំនង​ប្រសើរ​ឡើង​វិញ ជាមួយ​ប្រទេស​លោកខាងលិច ប៉ុន្តែ យ៉ាងណាក៏ដោយ គេត្រូវ​បង្រ្កាប​ក្រុម​អ្នកប្រឆាំង​ឲ្យ​ផុតពូជ នៅភូមា។

លោកស្រីអ៊ុងសាន ស៊ូជី​ធ្លាប់រំលឹក​ដល់​ប្រទេស​លោកខាងលិច​ ដោយ​​បាន​ និយាយ​ព្រមាន​ទុកមុន​​ថា កំណែទម្រង់​នយោបាយ​នៅភូមា គឺ​អាច​ផ្លាស់ប្តូរ លែងមាន​ទៅវិញ។ ដោយសារ​ជំហរ​របស់លោកស្រី ស៊ូជី ប្រទេស​លោកខាងលិច​មិន​បាន​ដក​ទណ្ឌកម្ម​ទាំងស្រុង គឺ​សម្រេច​ព្យួរផ្អាក​ត្រឹម​មួយឆ្នាំ ប៉ុណ្ណោះ គឺ​ដើម្បី​អាច​តាមដាន​មើល​ការវិវឌ្ឍ​នយោបាយ​របស់​រដ្ឋាភិបាល​ភូមា​តទៅទៀត៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI