អានតួអត្ថបទ
កម្ពុជា

ក្រសួង​ការងារ​ព្រម​ចរចា​បញ្ហា​ប្រាក់​ខែឡើង​វិញតែ​សហជីព​មិន​ទាន់​បញ្ឈប់​បាតុ​កម្ម​

កម្មករ​កាត់ដេរ​បាន​ប្រមូល​ផ្តុំគ្នា​តវ៉ា​នៅមុខ​ក្រសួង​ការងារ​​ ដោយ​បាន​បិទ​ផ្លូវ​សហព័ន្ធ​រុស្ស៊ី​នៅថ្ងៃ​សុក្រ​ទី ​២៧ ​ធ្នូ​។​
កម្មករ​កាត់ដេរ​បាន​ប្រមូល​ផ្តុំគ្នា​តវ៉ា​នៅមុខ​ក្រសួង​ការងារ​​ ដោយ​បាន​បិទ​ផ្លូវ​សហព័ន្ធ​រុស្ស៊ី​នៅថ្ងៃ​សុក្រ​ទី ​២៧ ​ធ្នូ​។​
ដោយ៖ គឹម យុទ្ធណា
១៥ នាទី

នៅក្នុង​ជំនួប​រវាង​មេដឹកនាំ​សហជីព​ និង​ក្រសួង​ការងារ​នៅ​រសៀល​ថ្ងៃ​សុក្រ​នេះ ក្រសួង​ការងារ​​បាន​យល់ព្រម​បើក​ឲ្យ​មានការ​ពិភាក្សា​បន្ថែមទៀត ​អំពី​បញ្ហា​ប្រាក់ខែ​កម្មករ។ កិច្ច​ពិភាក្សា​នេះ​​គ្រោង​នឹងធ្វើ​នៅ​ថ្ងៃ​ចន្ទ​ ដើម​សប្តាហ៍​ក្រោយនេះ។ ក្រសួង​បានស្នើ​ឲ្យ​សហជីព​កម្មករ​បញ្ឈប់​​បាតុកម្ម​ហើយ​ចូល​តុ​ចរចា​ឡើងវិញ។ ប៉ុន្តែ មេដឹកនាំ​សហជីព​អះអាងថា ​នឹង​នៅតែ​បន្ត​បាតុកម្ម​រហូត​ទាល់តែ​កម្មករ​ទទួលបាន​ប្រាក់ខែ ១៦០ ដុល្លារ ​ទើប​ឈប់។

ផ្សាយពាណិជ្ជកម្ម

ទីបំផុត​ទៅ ក្រសួង​ការងារ​បាន​យល់ព្រម​បើក​ឲ្យ​មានការ​ចរចា​បញ្ហា​ប្រាក់ខែ​កម្មករ​ឡើងវិញ​ដោយ​កំណត់​យក​ថ្ងៃ​ចន្ទ​ទី៣០ធ្នូ​ដើម​សប្តាហ៍​ក្រោយនេះ​ ជា​ថ្ងៃ​បើក​ការចរចា​ត្រីភាគី​ជាថ្មី​ម្តង​ទៀត។ ជា​ថ្នូរ​នឹង​ការយល់ព្រម​ចរចា​ឡើងវិញ​នេះ ក្រសួង​ការងារ​បាន​សុំ​ឲ្យ​សហជីព​បញ្ឈប់​​បាតុកម្ម និង​កូដកម្ម​កម្មករ​ហើយ​ចូលធ្វើការ​ជាធម្មតា​ឡើងវិញ។ ប៉ុន្តែ មេដឹកនាំ​សហ​ជីព​បាន​ប្រកាសថា​នឹងមិន​បញ្ឈប់​បាតុកម្ម​ទេ ​ដរាបណា​ការទាមទារ​ដំឡើង​ប្រាក់ខែ ១៦០ ដុល្លារ​​ក្នុង​មួយខែ ​មិនបាន​ដូច​បំណង​នោះ។

ការសម្រេច​បែបនេះ​បាន​កើតឡើង​បន្ទាប់ពី​មេដឹកនាំ​សហជីព​បាន​ជួបពិភាក្សា​ជាមួយ​តំណា​ង​​​ក្រសួង​ការងារ​និង​បណ្តុះបណ្តាល​វិជ្ជាជីវៈ​ នៅ​រសៀល​ថ្ងៃ​សុក្រ​នេះ។ កិច្ចប្រជុំ​នេះ​ត្រូវ​បាន​រៀបចំឡើង​បន្ទាប់ពី​ក្រសួង​ការងារ​បាន​កោះហៅ​តំណាង​សហជីព៦នាក់ ​ដែល​បាន​ដឹក​នាំ​​បាតុកម្ម និង​កូដកម្ម​កម្មករ​ឲ្យ​ជួបពិភាក្សា​ដោះស្រាយ​បញ្ហា។

សូមបញ្ជាក់ថា ក្រុមប្រឹក្សា​ការងារ​បានសម្រេច​កាល​ពី​ថ្ងៃទី​អង្គារ២៤ធ្នូ ដំឡើង​ប្រាក់ខែ​កម្មករពី៨០ដល់៩៥ដុល្លារ​ ក្នុង​ឆ្នាំ ២០១៤ ។ ការដំឡើង​នេះ​នឹង​ធ្វើឡើង​ចន្លោះ​ពី១៥ដល់​១៧​ដុល្លា​​រ ជា​រៀងរាល់ឆ្នាំ រហូតដល់ ១៦០ ដុល្លារ​ក្នុង​ឆ្នាំ ២០១៨ ។ ក្រុម​សហជីព​មួយចំនួន​បាន​យល់ព្រម​ទទួលយក​សេចក្តីសម្រេច​នេះ ប៉ុន្តែ សហជីព​មួយចំនួនទៀត​មិន​ទទួលយក​ទេ។ ទីបំផុត បាតុកម្ម​និង​កូដកម្ម​បានកើត​ឡើង​គ្រប់ទិសទី រហូតដល់​កើតមាន​អំពើហិង្សា​ទៀតផង​នៅ​ថ្ងៃ​សុក្រ​នេះ។

ប្រឈមមុខ​នឹង​ស្ថានការណ៍​នេះ ក្រសួង​ការងារ​បាន​កោះហៅ​តំណាង​សហជីព​ចំនួន ៦ នាក់​ឲ្យ​ចូលជួប​ពិភាក្សា​ជាថ្មី​នៅ​ថ្ងៃ​សុក្រ​នេះ។ ក្រោយពី​កិច្ចប្រជុំ​រយៈពេល​ជាង​ពីរ​ម៉ោង ក្រសួង​ការងារ​បានចេញ​សេចក្តីប្រកាស​មួយ​ដោយ​បញ្ជាក់ថា ខ្លួន​នឹង​ជំរុញ​ឲ្យ​មានការ​ពិភាក្សា​បន្ថែមទៀត​អំពី​បញ្ហា​ប្រាក់ខែ​កម្មករ។ ក្រសួង​ក៏បាន​ថ្កោលទោស​អំពើហិង្សា​បំផ្លិចបំផ្លាញ​ទ្រព្យសម្បត្តិ​សាធារណៈ ​និង​ឯកជន​របស់​កម្មករ​ផងដែរ។

ប៉ុន្តែ លោក អាត់ ធន់ បានប្រកាស​ប្រាប់​ក្រុមកម្មករ​នៅក្រោយ​ជំនួប​នោះ​ថា បាតុកម្ម​នឹង​បន្ត​ធ្វើ​រហូតដល់​ថ្ងៃ ៣០ ដើម្បី​រង់ចាំ​ស្តាប់​លទ្ធផល។ លោក​បញ្ជាក់ថា ប្រសិនបើ​ការដំឡើង​ប្រាក់​ខែ​មិនបាន​ដល់​កម្រិត ១៦០ ដុល្លារ ដូច​​ដែល​កម្មករ​ទាមទារ​ទេ បាតុកម្ម និង​កូដកម្ម​នឹង​បន្តធ្វើ​ដោយ​​គ្មាន​ឈប់ឈរ​ឡើយ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ